ଦିଲ୍ଲୀରେ NSA ଅନ୍ତରାଷ୍ଟ୍ରୀୟ ବୈଠକ : ୭ଟି ଦେଶ ଆଫଗାନିସ୍ତାନ ସ୍ଥିତି ଉପରେ କରିଛି ଆଲୋଚନା
ନୂଆଦିଲ୍ଲୀ: ଦିଲ୍ଲୀରେ NSA ବୈଠକ । ଆଫଗାନିସ୍ତାନ ଉପରେ ଭାରତ ସମେତ ୭ ଟି ଦେଶର NSA ସ୍ତରୀୟ ବୈଠକ ହୋଇଛି। ଏହି ବୈଠକର ଅଧ୍ୟକ୍ଷତା କରିଛନ୍ତି ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ । ବୈଠକରେ ଆଫଗାନିସ୍ତାନର ଭବିଷ୍ୟତ ନେଇ ଆଲୋଚନା ହୋଇଛି । ଏଥିରେ ଯୋଗ ଦେଇଛନ୍ତି ଭାରତ ସମେତ ୭ ରାଷ୍ଟ୍ରର ଜାତୀୟ ସୁରକ୍ଷା ପରାମର୍ଶ ଦାତା। ଉଜବେକିସ୍ତାନ, ତାଜିକିସ୍ତାନ, ରୁଷ, ଇରାନ ଓ କଜାକସ୍ତାନ, କିର୍ଗିସ୍ତାନ ଓ ତୁର୍କମେନିସ୍ତାନର ଶୀର୍ଷ ସୁରକ୍ଷା ଅଧିକାରୀ ସାମିଲ ହୋଇଛନ୍ତି।
ସୂଚନା ଅନୁଯାୟୀ ଆଫଗାନସ୍ତାନକୁ ତାଲିବାନ ଅକ୍ତିଆର କରିବା ପରେ ସୃଷ୍ଟି ହୋଇଥିବା ପରିସ୍ଥିତି ଉପରେ ବୈଠକରେ ଆଲୋଚନା ହୋଇଛି। ଆଫଗାନର ଏବେ ସାମାଜିକ ଓ ଆର୍ଥିକ ସ୍ଥିତି ଚିନ୍ତାଜନକ ରହିଛି। ଏଥିସହିତ ଦେଶ ମାନବୀୟ ସଙ୍କଟ ଦେଇ ଗତିକରୁଛି । ଏହା ସହ କିଛି ଦେଶ ସହ ଆଫଗାନ ସୀମା ଲାଗି ରହିଥିବାରୁ ଆତଙ୍କବାଦୀ ଆକ୍ରମଣର ବିପଦ ବଢିଯାଇଛି। ମାଦକ ପଦାର୍ଥ ତସ୍କରୀ ମଧ୍ୟ ବଢିଚାଲିଛି। ଏହାର ସ୍ଥାୟୀ ସମାଧାନ ନିମନ୍ତେ ବୈଠକରେ ଆଲୋଚନା ହୋଇଛି।
