ସୋସିଆଲ ମିଡିଆରେ ଘୁରି ବୁଲୁଛି ତୁର୍କୀ ଓ ସିରିଆରେ ନିଜ ପ୍ରିୟଜନଙ୍କୁ ଖୋଜୁଥିବାର ଲୋମଟାଙ୍କୁରା ଦୃଶ୍ୟ। ମାଟିରେ ମିଶିଯାଇଛି ଶହଶହ ବର୍ଷର ଅନେକ ଐତିହ୍ୟ । ତେବେ ଏହାରି ଭିତରେ ଟ୍ୱିଟରରେ ଏମିତି ଏକ ଫଟୋ ସାମ୍ନାକୁ ଆସିଛି ଯାହାକୁ ଦେଖି ଶିହରି ଉଠିଛି ଲୋମ। ସିରିଆରେ ଏକ ସାତ ବର୍ଷର ଝିଅ ଏବଂ ତାର ସାନଭାଇ ଭଗ୍ନ ବିଲ୍ଡିଂ ତଳେ ଫସି ରହିଥିବାର ଦେଖିବାକୁ ମିଳୁଛି। ଚିତ୍ରରେ ଥିବା ଝିଅଟି ତା ସାନଭାଇକୁ ଖସିପଡିଥିବା ବିଲ୍ଡିଂ ଭିତରେ ରକ୍ଷା କରୁଥିବାର ଦେଖାଯାଉଛି। ତେବେ ପରେ ଭୁଶୁଡ଼ି ପଡ଼ିଥିବା କୋଠାର ଅଳିଆ ଆବର୍ଜନା ଭିତରୁ ଉଭୟଙ୍କୁ ଉଦ୍ଧାର କରାଯାଇଥିଲା। ଯେଉଁଠାରେ ସେମାନେ ଘଣ୍ଟା ଘଣ୍ଟା ଧରି ଫସି ରହିଥିଲେ।
ଏହି ଚିତ୍ରଟିକୁ ଜାତିସଂଘର ପ୍ରତିନିଧୀ ମହମ୍ମଦ ସଫା ସେୟାର କରିଛନ୍ତି। କିଭିଳି ସିରିଆ ଏବଂ ତୁର୍କୀ ଉଭୟ ଦେଶ ସବୁଠାରୁ ବିପଦପୂର୍ଣ୍ଣ ଭୂକମ୍ପରୁ ବାହାରକୁ ଆସିବ ସେନେଇ ଲୋକଙ୍କୁ ସକରାତ୍ମକ ଭାବନା ଆଣିବାକୁ ସେ ଅନୁରୋଧ କରିଥିଲେ। ସାଫା ତାଙ୍କ ଟ୍ୱିଟ୍ରେ କହିଛନ୍ତି ଯେ, ୭ ବର୍ଷର ବାଳିକା ୧୭ ଘଣ୍ଟା ଧରି ଭଗ୍ନ ବିଲ୍ଡିଂ ତଳେ ଚାପି ହୋଇ ଥିବାବେଳେ, ସୁରକ୍ଷା ଦେବା ପାଇଁ ସେ ନିଜ ସାନଭାଇର ମୁଣ୍ଡ ଉପରେ ହାତ ରଖିଥିବା ଦେଖିବାକୁ ମିଳିଥିଲା।
The 7 year old girl who kept her hand on her little brother’s head to protect him while they were under the rubble for 17 hours has made it safely. I see no one sharing. If she were dead, everyone would share! Share positivity… pic.twitter.com/J2sU5A5uvO
— Mohamad Safa (@mhdksafa) February 7, 2023
ସୂଚନା ଥାଉକି, ଦିନକୁ ଦିନ ମୃତ୍ୟୁସଂଖ୍ୟା ବୃଦ୍ଧି ପାଉଛି। ତୁର୍କୀ ଓ ସିରିଆରେ ବର୍ତ୍ତମାନ ସୁଦ୍ଧା ୮ ହଜାର ଲୋକଙ୍କ ମୃତ୍ୟୁ ହେଲାଣି । କେବଳ ତୁର୍କୀରେ ୫ହଜାର ୮୯୪ ଜଣଙ୍କର ଜୀବନ ଯାଇଛି । ସିରିଆରେ ଏହି ସଂଖ୍ୟା ୧ହଜାର ୯୩୨ । କୁହାଯାଉଛି ଆଗକୁ ମୃତ୍ୟୁସଂଖ୍ୟା ଆହୁରି ବଢ଼ିପାରେ । ତେବେ ବର୍ତ୍ତମାନ ଧ୍ୱଂସାବଶେଷ ତଳୁ ଜୀବନ ଖୋଜୁଛନ୍ତି ଉଦ୍ଧାରକାରୀ ଟିମ୍ ।
ଏବେ ବି ଭାଙ୍ଗିଯାଇଥିବା କୋଠା ତଳେ ଅନେକ ଲୋକ ଚାପି ହୋଇ ରହିଛନ୍ତି । ଧ୍ୱଂସସ୍ତୁପ ପାଲଟିଛି ଅନେକ ଅଞ୍ଚଳ । ଦିନ ରାତି ଅହରହ ଚାଲିଛି ରେସକ୍ୟୁ ଅପରେସନ୍ । ମୃତ୍ୟୁସଂଖ୍ୟା ବଢିଚାଲିଥିବା ବେଳେ ବର୍ତ୍ତମାନ ସୁଦ୍ଧା ଆହତ ହୋଇଛନ୍ତି ୩୦ ହଜାରରୁ ଅଧିକ ଲୋକ । ଯୁଆଡ଼େ ଚାହିଁଲେ ହାହାକାର ପରିସ୍ଥିତି । ଭଙ୍ଗା କୋଠା ତଳୁ ତ୍ରାହି ତ୍ରାହି ଡାକ ଶୁଭୁଛି । ମାଟିରେ ମିଶିଛି ୬ ହଜାରରୁ ଅଧିକ ବିଲଡିଂ ।