କରୋନା ଭୂତାଣୁ ସଂକ୍ରମଣରୁ ଲୋକଙ୍କୁ ସୁରକ୍ଷା ଦେବା ପାଇଁ ବିଶ୍ୱର ସମସ୍ତ ବୈଜ୍ଞାନିକମାନେ ଟିକା ବିକାଶରେ ଲାଗିଥିବା ବେଳେ ବିଶ୍ୱର ପ୍ରଥମ କରୋନା ଟିକା ଆଣିବାକୁ ଯାଉଛି ରୁଷ । ଚଳିତମାସ ୧୨ ତାରିଖରେ ରୁଷ ଏହି ଟିକାର ପଞ୍ଜିକରଣ କରାଇବ । ରୁଷ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ଏ ନେଇ ସ୍ପଷ୍ଟ କରାଯାଇଛି । ଅନ୍ୟପକ୍ଷରେ ଏହି ଟିକା ଉପରେ କିଛି ବିଶେଷଜ୍ଞ ପ୍ରଶ୍ନ ଉଠାଇଛନ୍ତି । ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) କହିଛି ଯେ ରୁଷ ଟିକା ସହ ଜଡ଼ିତ କୌଣସି ସରକାରୀ ତଥ୍ୟ ଏ ପର୍ଯ୍ୟନ୍ତ ଦିଆଯାଇ ନାହିଁ । ତେଣୁ ଏହାର ସୁରକ୍ଷା ଉପରେ ଡବ୍ଲ୍ୟୁଏଚ୍ଓ ପ୍ରଶ୍ନ ଉଠାଇପାରେ ବୋଲି ଆଶଙ୍କା କରାଯାଉଛି । ବିଶ୍ୱରେ ୧୭୭ କରୋନା ଭ୍ୟାକ୍ସିନ୍ର ପ୍ରସ୍ତୁତି ଚାଲିଛି । ସେଥି ମଧ୍ୟରୁ ୧୩୫ ଭ୍ୟାକ୍ସିନ୍ର ଟ୍ରାଏଲ୍ ପଶୁଙ୍କ ଉପରେ ହୋଇ ସାରିଛି । ୨୩ ଭ୍ୟାକ୍ସିନ୍ର ହ୍ୟୁମ୍ୟାନ୍ ଟ୍ରାଏଲ ଚାଲିଥିବା ବେଳେ ୧୪ ଭ୍ୟାକ୍ସିନ୍ ପ୍ରଥମ ଫେଜରେ ପଦାର୍ପଣ କରିଛି । ୩ଟି ଭ୍ୟାକ୍ସିନ୍ ୨ୟ ଫେଜ ଓ ୬ ଟି ଭ୍ୟାକ୍ସିନ୍ ୩ୟ ଫେଜ୍ ପରୀକ୍ଷଣରେ ପହଞ୍ଚିଛି ।
ସୂଚନା ମୁତାବକ, ରୁଷ ଟିକା ହେଉଛି ଏକ ଆଡେନୋଭାଇରସ ଭିତ୍ତିକ ଭାଇରାଲ୍ ଭେକ୍ଟର ଟିକା । ଏଥିରେ କରୋନା ଭୂତାଣୁର ସ୍ପାଇକ୍ ପ୍ରୋଟିକ୍କୁ ସାମିଲ କରାଯାଇଛି, ଏହାଦ୍ଦ୍ୱାରା ଏହା ଶରୀରରେ ପ୍ରତିରୋଧକ ପ୍ରତିକ୍ରିୟା ସୃଷ୍ଟି କରିପାରିବ । ଋୁଷ ଏହାର କ୍ଲିନିକାଲ ଟ୍ରାଏଲରେ ୧୦୦ ପ୍ରତିଶତ ସଫଳତା ହାସଲ କରିଛି ବୋଲି ଦାବି କରିଛି।
ଅନ୍ୟପକ୍ଷରେ ଆମେରିକାର ଦଳେ ଗବେଷକ ‘ନୂଆ ପିଢ଼ି’ର ଚିକିତ୍ସା ପଦ୍ଧତି ବାହାର କରିବା ପାଇଁ ଜୋରଦାର ଚେଷ୍ଟା ଚଳାଇଛନ୍ତି । ସେମାନେ ଦାବି କରିଛନ୍ତି ଯେ ଏହି ନୂଆ ପିଢ଼ିର ଅନୁସନ୍ଧାନ ଉଭୟ ଟିକା ଓ ଔଷଧ ଭଳି କାମ ଦେବ। ଅର୍ଥାତ୍ ସଂକ୍ରମଣ ହୋଇଥିଲେ, ଏହା ରୋଗୀଙ୍କୁ ସୁସ୍ଥ ହେବାରେ ସହାୟତା କରିବ ଏବଂ ସୁସ୍ଥ ଲୋକଙ୍କୁ କରୋନା କବଳରୁ ସୁରକ୍ଷା ଯୋଗାଇବ । ଯଦି ଏହି ଥେରାପି ମଣିଷଙ୍କ ଉପରେ ସଫଳ ହୁଏ, ତେବେ ୨୦୨୧ ବର୍ଷ ଆରମ୍ଭ ବେଳକୁ ଏହାର ପ୍ରସ୍ତୁତି ଶେଷ ହେବ । ଏହି ଥେରାପି ଉପଲବ୍ଧ ହେବା ପରେ ଲୋକଙ୍କୁ ଆଉ ସାମାଜିକ ଦୂରତା ରକ୍ଷା କରିବାକୁ ପଡ଼ିବ ନାହିଁ । ସେମାନେ ପୂର୍ବ ଭଳି ସ୍ୱାଧୀନ ଭାବେ ବୁଲାବୁଲି କରିପାରିବେ । ଏହି ସାର୍ସ-ଅବରୋଧ (ସାର୍ସ-ବ୍ଲକ୍) ଥେରାପିକୁ ଆମେରିକାରେ ବିକାଶ କରାଯାଉଛି ।
ଏହା ଉପରେ ୟୁନିଭର୍ସିଟି ଅଫ୍ କାଲିଫର୍ଣ୍ଣିଆର ବିଶେଷଜ୍ଞମାନେ ଅଧ୍ୟୟନ କରୁଛନ୍ତି । ଏ ପର୍ଯ୍ୟନ୍ତ ଜଣାପଡ଼ି ଯାଇଛି ଯେ ଏହା ୯୫-୧୦୦% ପର୍ଯ୍ୟନ୍ତ ଭୂତାଣୁକୁ ଶରୀର ମଧ୍ୟରେ ପ୍ରବେଶକୁ ରୋକିପାରିବ । ଏହା ଉପଲବ୍ଧ ହେବା ପରେ ଟିକାର ଆବଶ୍ୟକତା ଆଉ ପଡ଼ିବ ନାହିଁ ।