ଇରାକ୍ର ଏକ ପାହାଡ଼ ଉପରୁ ମିଳିଛି ଏକ ଏଭଳି ମୂର୍ତ୍ତି ଯାହାକୁ ନେଇ ଏବେ ଦୁଇ ଦେଶର ଗବେଷକଙ୍କ ମଧ୍ୟରେ ଆରମ୍ଭ ହୋଇଛି ବିବାଦ । ଇରାକ୍ ସ୍ଥିତ ଭାରତୀୟ ଦୂତାବାସ ଏହି ମୂର୍ତ୍ତିକୁ ଠାବ କରିଛି । ପାହାଡ଼ କାନ୍ଥରେ ଖୋଦେଇ ହୋଇଥିବା ଏହି ମୂର୍ତ୍ତି ୬ ହଜାର ବର୍ଷ ପୂର୍ବର ଅର୍ଥାତ୍ ଖ୍ରୀଷ୍ଟପୂର୍ବ ୨୦୦୦ ବର୍ଷ ତଳର ବୋଲି ଗବେଷକମାନଙ୍କର ମତ । ଇରାକ୍ର ହୋରେନ୍ ଶେଖାନ୍ ଅଞ୍ଚଳରେ ଥିବା ଏକ ପାହାଡ଼ରେ ଏହି ମୂର୍ତ୍ତି ଖୋଦେଇ ହୋଇଛି । ଯେଉଁଥିରେ ଜଣେ ରାଜା ଧନୁତୀର ଧରି ଠିଆ ହୋଇଛନ୍ତି । ତାଙ୍କ ଅଣ୍ଟାରେ ଏକ ଛୁରୀ ଭଳି ଅସ୍ତ୍ର ମଧ୍ୟ ରହିଛି । ତାଙ୍କ ସମ୍ମୁଖରେ ଆଉ ଏକ ଛୋଟ ମୂର୍ତ୍ତି ରହିଛି । ଏହି ମୂର୍ତ୍ତି ଶ୍ରୀରାମଙ୍କର ଏବଂ ଛୋଟ ମୂର୍ତ୍ତି ହନୁମାନଙ୍କ ବୋଲି କୁହାଯାଉଛି ।
ଭାରତର ଏକ ପ୍ରତିନିଧି ମଣ୍ଡଳ ସେହି ସ୍ଥାନକୁ ଯାଇ ମୂର୍ତ୍ତି ସମ୍ପର୍କରେ ତଥ୍ୟ ସଂଗ୍ରହ କରି ଫେରିଛି । ଅଯୋଧ୍ୟ ଗବେଷଣା ସଂସ୍ଥାର ନିର୍ଦ୍ଦେଶକ ଯୋଗେନ୍ଦ୍ର ପ୍ରତାପ ସିଂହଙ୍କ କହିବା କଥା, ସେହି ମୂର୍ତ୍ତି ହେଉଛି ରାମ ଏବଂ ହନୁମାନଙ୍କର । ଭାରତୀୟ ରାଷ୍ଟ୍ରଦୂତ ପ୍ରଦୀପ ସିଂହ ରାଜପୁରୋହିତଙ୍କ ନେତୃତ୍ୱରେ ଭାରତର ଏକ ପ୍ରତିନିଧି ମଣ୍ଡଳ ଚଳିତ ମାସ ସେଠାକୁ ଯାଇ ତଥ୍ୟ ସଂଗ୍ରହ କରିବା ପରେ ତା ଉପରେ ଅଧିକ ଅନୁସନ୍ଧାନ ଚାଲିଛି ।
ଅନ୍ୟପକ୍ଷରେ ଏହା ରାମ ଓ ହନୁମାନଙ୍କ ମୂର୍ତ୍ତି ନୁହେଁ ବୋଲି କହିଛନ୍ତି ଇରାକ୍ର ବିଶେଷଜ୍ଞ । ସେମାନଙ୍କ ଅନୁସାରେ ଏହା ସେଠାକାର ଆଦିବାସୀଙ୍କ ଚିତ୍ର ଅଟେ । ଏ ଚିତ୍ର ହେଉଛି ଆଦିବାସୀଙ୍କ ମୁଖିଆ ଟାର୍ଡୁନିଙ୍କର । ତେବେ ଏହାକୁ ପ୍ରମାଣ କରିବା ଲାଗି ସେମାନଙ୍କ ନିକଟରେ କୌଣସି ଠୋସ୍ ତଥ୍ୟ ନାହିଁ । ତେଣୁ ସେମାନେ ଅଧିକ ଗବେଷଣା ପାଇଁ ଇରାକ୍ ସରକାରଙ୍କ ଅନୁମତି ମାଗିଛନ୍ତି । ଜଣେ ଆକାଡ଼ି ଯୋଦ୍ଧା ହୁରିଆ ସୈନିକକୁ ଯୁଦ୍ଧରେ ହରାଇବା ପରେ ହୁରିଆ ବ୍ୟକ୍ତି ଜଣଙ୍କ ତାଙ୍କୁ କ୍ଷମାଭିକ୍ଷା କରୁଛନ୍ତି । ଯାହା ରାମଙ୍କ ଆଗରେ ହନୁମାନ ହାତଯୋଡ଼ି ବସିଥିବା ଭଳି ଲାଗୁଛି ।
ତେବେ ଅଯାଧ୍ୟା ଗବେଷଣା ସଂସ୍ଥା କହିଛି ଯେ ରମାୟାଣ କାହାଣୀ ସତ ଥିଲା ବୋଲି ଇଏ ହେଉଛି ତାର ପ୍ରମାଣ । ଏବେ ଦେଖିବାର କଥା କିଏ ଏହାକୁ ବାସ୍ତବ ବୋଲି ପ୍ରମାଣ କରି ପାରୁଛି । ଭାରତ ନା ଇରାକ୍ ?