ଏତେ ସଂଘର୍ଷ ପରେ ବି କଣ ନାରୀ ପାଇଲାଣି ନିଜ ଅଧିକାର ? ଆଜି ବିଶ୍ୱ ମହିଳା ସମାନତା ଦିବସ
ଆଜି ଅଗଷ୍ଟ ୨୬ ତାରିଖ । ଏମିତି ତ ବର୍ଷର ୩୬୫ ଦିନରେ ବିଭିନ୍ନ ଦିବସ ପାଳନ କରାଯାଏ ହେଲେ ଆଜି ଦିବସ ମହତ୍ୱ କିଛି ଅଲଗା । ଆଜି ହେଉଛି ବିଶ୍ୱ ମହିଳା ସମାନତା ଦିବସ । ଅର୍ଥାତ୍ ପୁରୁଷଙ୍କ ସହ ମହିଳାଙ୍କୁ ସମାନ ଅଧିକାର ଦେବାର ଯେଉଁ ଆହ୍ଵାନ ଥିଲା ସେ ନେଇ ସଚେତନତା ସୃଷ୍ଟି ପାଇଁ ଏହି ଦିବସ ପାଳନ କରାଯାଉଛି ।
ଯଦି ଇତିହାସକୁ ଯିବା ତେବେ ଜଣାପଡ଼ିବ ଯେ ପ୍ରଥମେ ମହିଳାଙ୍କ ସମାନ ଅଧିକାର ପାଇଁ ନ୍ୟୁଜିଲାଣ୍ଡରେ ଆରମ୍ଭ ହୋଇଥିଲା ଏହି ଅଭିଯାନ । ୧୮୯୩ରୁ ଏହି ଅଭିଯାନ ଆରମ୍ଭ ହୋଇଥିଲା । ଆମେରିକାରେ ୧୯୨୦ ମସିହା ଅଗଷ୍ଟ ୨୬ରୁ ଏହି ଦିବସ ପାଳନ କରାଯାଉଛି । ତେବେ ଭାରତରେ ୧୯୭୧ରୁ ମହିଳା ସମାନତା ଦିବସ ପାଳନ ହେଉଛି ।
ଆମ ଦେଶରେ ସ୍ୱାଧୀନତା ପରେ ହିଁ ମହିଳାମାନଙ୍କୁ ଭୋଟ୍ ଦେବାର ଅଧିକାର ମିଳିଥିଲା । ହେଲେ ପଞ୍ଚାୟତ ନିର୍ବାଚନରେ ସେମାନଙ୍କ ପ୍ରାର୍ଥୀ ହେବାର ସୁଯୋଗ ମିଳୁନଥିଲା । ପରବର୍ତ୍ତୀ ସମୟରେ ସ୍ୱର୍ଗତ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସମୟରେ ସମ୍ବିଧାନରେ ସଂଶୋଧନ କରାଯାଇ ମହିଳାଙ୍କୁ ମଧ୍ୟ ନିର୍ବାଚନ ଲଢ଼ିବାର ସୁଯୋଗ ମିଳିଲା । ଭାରତରେ ଏହି ଦିବସ ପାଳନ ପୂର୍ବରୁ ମହିଳାଙ୍କ ସମାନ ଅଧିକାର ପାଇଁ ଖୁବ୍ ସଂଘର୍ଷ କରିଥିଲେ ଜଣେ ମହିଳା ଓକିଲ ବେଲ୍ଲା ଅବ୍ଜୁଗ।
ଆମ ଦେଶ କଥାକୁ ବିଚାରକୁ ନେଲେ ଦେଖାଯିବ ଯେ ପୂର୍ବ ଭଳି ଆଉ ମହିଳାଙ୍କୁ ଦ୍ୱିତୀୟ ଶ୍ରେଣୀ ନାଗରିକ ଭାବେ ଗ୍ରହଣ କରାଯାଉ ନାହିଁ । ସେମାନେ ମଧ୍ୟ ପୁରୁଷଙ୍କ ସହ କାନ୍ଧକୁ କାନ୍ଧ ମିଳାଇ ସବୁ କ୍ଷେତ୍ରରେ ନିଜର ଦକ୍ଷତା ଦେଖାଉଛନ୍ତି । ସେନା ଠାରୁ ଆରମ୍ଭ କରି କୃଷିକ୍ଷେତ୍ର ଯାଏ ସିଭିଲ ସର୍ଭିସ୍ରୁ ନେଇ ବିମାନ ଚଳାଇବା ଯାଏ ସବୁଠି ମହିଳାମାନେ ସଫଳତାର ସହ କାମ କରି ଚାଲିଛନ୍ତି । ତେବେ ଯେଉଁ ସମାନତା କଥା କୁହାଯାଉଛି ସେଥିରେ ସଂଖ୍ୟାରେ ପଛରେ ଅଛନ୍ତି ମହିଳାମାନେ । ସରକାରଙ୍କ ପକ୍ଷରୁ ସଂରକ୍ଷଣ ଆଦି ବ୍ୟବସ୍ଥା ସତ୍ତ୍ୱେ ଅଳ୍ପ କେତେକ ସଂସ୍ଥା କିମ୍ବା ଅନୁଷ୍ଠାନରେ ମହିଳା କର୍ମଚାରୀଙ୍କ ସଂଖ୍ୟା ଅଧିକ ରହିଥିଲେ ମଧ୍ୟ ଅନେକ ଅନୁଷ୍ଠାନରେ ଏବେବ ପୁରୁଷଙ୍କ ସଂଖ୍ୟା ବେଶି ରହିଛି ।
ସେହିପରି ସାକ୍ଷରତାରେ ମଧ୍ୟ ପୁରୁଷ ଠାରୁ ମହିଳାମାନେ ପଛରେ ଅଛନ୍ତି । ସେମାନଙ୍କୁ ଆଗକୁ ଆଣିବା ପାଇଁ ସ୍ୱତନ୍ତ୍ର ଭାବେ ମହିଳା ସଶକ୍ତୀକରଣ ମନ୍ତ୍ରାଳୟ ମଧ୍ୟ ରହିଛି । ଏ ଦିଗରେ ଲଗାତର ଭାବେ ପ୍ରୟାସ ଚାଲିଛି । ତଥାପି ଆମ ଦେଶରେ ମହିଳା ନିର୍ୟାତନା, ବଳାତ୍କାର, ହତ୍ୟା ଆଦି ଘଟଣା କମିବାର ନାଁ ନେଉ ନାହିଁ । ଯାହା ଏବେବି ମହିଳାଙ୍କ ପାଇଁ ସମାନ ସ୍ଥିତିକୁ ଆସିବାରେ ବଡ଼ ପ୍ରତିବନ୍ଧକ ହେଉଛି । ତେଣୁ ଏଥିପାଇଁ ସାମୂହିକ ପ୍ରୟାସ ଆବଶ୍ୟକ ଏବଂ ବିଶେଷ ଭାବେ ପୁରୁଷ ଏବଂ ରୁଢ଼ିବାଦୀ ମାନସିକତାରେ ଥିବା ମହିଳାମାନେ ନିଜ ଭିତରେ ପରିବର୍ତ୍ତନ ଆଣିବା ଦରକାର ।
