ଟାଙ୍ଗୀ: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅଧିନସ୍ଥ ଦେଓଗାଁ ପଞ୍ଚାୟତର ୭୬ଟି ମହିଳା ଏସ୍.ଏଚ୍.ଜି ଗ୍ରୁପର ଶତାଧିକ ମହିଳା ସଦସ୍ୟା ବାଣପୁର ବ୍ଲକ ଆଗରେ ଧାରଣାରେ ବସିଛନ୍ତି। ପଂଚାୟତର ମହିଳା ମହାସଂଘର ଏମ୍.ବି.କେ, ସି.ଆର.ପି, ମହାସଂଘ ସଭାପତି, ସମ୍ପାଦିକା ମିଳିତ ପ୍ରିୟାପ୍ରୀତିରେ ଅର୍ଥ କାରବାରଠାରୁ ଆରମ୍ଭ କରି ବିଭିନ୍ନ ପ୍ରକାରର ଦୁର୍ନୀତିରେ ଲିପ୍ତ ରହିଛନ୍ତି । ଏଣୁ ସେମାନଙ୍କୁ ବହିଷ୍କାର କରି ନୂତନ କମିଟି ଗଠନ କରି ନୂଆ କର୍ମକର୍ତା ଚୟନ କରିବାକୁ ସେମାନେ ଦାବି କରିଛନ୍ତି ।
ମହାସଂଘର ସୂଚନା ମୁତାବକ, ମହିଳା ମହାସଂଘକୁ ଆସୁଥିବା ସରକାରୀ ଓ ବେସରକାରୀ ଆର୍ଥିକ ରାଶିର ଆୟ ବ୍ୟୟ ମହାସଂଘର ଏମ୍ବିକେ କଲ୍ୟାଣୀ ପରିଡା, ସାତ ଜଣ ସିଆରପି, ମହାସଂଘ ସଭାପତି ଗୀତାଞ୍ଜଳି ପରିଡା ଓ ସମ୍ପାଦିକା ଲିଲି ସାମନ୍ତରାୟ ମହାସଂଘର ସମସ୍ତ ସଭ୍ୟା ତଥା ଇସି ମେମ୍ବରମାନଙ୍କୁ ଜଣାଉନାହାନ୍ତି। ଏ ସମ୍ପର୍କରେ ଏସ୍.ଏଚ୍.ଜି ଗ୍ରୁପର ମା ମାନେ ସମ୍ପାଦିକାଙ୍କୁ ଅଭିଯୋଗ କଲେ ସମ୍ପାଦିକା ସେମାନଙ୍କୁ ଦୁର୍ବ୍ୟବହାର ଦେଖାଇବା ସହ ଗାଳି ଗୁଲଜ କରୁଥିବା ଅଭିଯୋଗ ଆଣିଛନ୍ତି ।
ଅପରପକ୍ଷରେ ଏମ୍ବିକେ ଏବଂ ସିଆରପିମାନେ ଅନୁରୂପ ଭାବେ ମହିଳାମାନଙ୍କୁ ଦୁର୍ବ୍ୟବହାର କରିବା ସହ କୌଣସି କାର୍ଯ୍ୟରେ ସହଯୋଗ କରୁନାହାନ୍ତି କି ଆୟ ବ୍ୟୟର ସୂଚନା ଦେଉନାହାନ୍ତି। ଏ ସମ୍ପର୍କରେ ଗତ ଅକ୍ଟୋବର ମାସରେ ନିଜ ପଂଚାୟତ ସ୍ତରରେ ସମସ୍ୟାର ସମାଧାନ ପାଇଁ ଏକ ବୈଠକ ଡାକିଥିଲେ। ଯେଉଁଥିରେ ସି.ଆର.ପି ଓ ଏମ୍.ବି.କେ ମାନେ ଯୋଗଦେଇନଥିଲେ । କିନ୍ତୁ ମହାସଂଘର ସମ୍ପାଦିକା ଲିଲି ସାମନ୍ତରାୟ ବୈଠକରେ ଯୋଗ ଦେଇଥିଲେ । ବୈଠକ ସ୍ଥଳରେ ଆରୋପ ପ୍ରତ୍ୟାରୋପ କରି ସମସ୍ତେ ଉଠି ପଳାଇଥିଲେ।
ଏ ସଂକ୍ରାନ୍ତରେ ଗତ ଅକ୍ଟୋବର ୧୯ ତାରିଖରେ ଏସ୍.ଏଚ୍.ଜି ଗ୍ରୁପର ମା ମାନେ ବାଣପୁର ବିଡିଓଙ୍କ ସମସ୍ୟାର ସମାଧାନ ପାଇଁ ଦାବିପତ୍ର ଦେଇଥିଲେ। କିନ୍ତୁ ନଭେମ୍ବର ୨ ତାରିଖ ସୁଦ୍ଧା ବାଣପୁର ବ୍ଲକର ଓ.ଏଲ.ଏମ ବିଭାଗ କିମ୍ବା ବିଡିଓଙ୍କ ଦ୍ବାରା ପ୍ରତିଶୃତି ମୁତାବକ କୌଣସି ସମସ୍ୟାର ସମାଧାନ ନ କରାଯିବାରୁ ଆଜି ନ୍ୟାୟ ଦାବିରେ ଶତାଧିକ ଏସ୍.ଏଚ୍.ଜି ଗ୍ରୁପର ମା ମାନେ ବ୍ଲକ ଆଗରେ ଧାରଣାରେ ବସିଛନ୍ତି। ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବା ଆଶଙ୍କାରେ ବାଣପୁର ପୋଲିସ୍ ଘଟଣା ସ୍ଥଳରେ ଉପସ୍ଥିତ ଅଛନ୍ତି ।