ପ୍ରଦ୍ୟୁମ୍ନ ବଳଙ୍କ ୮୮ ତମ ଜୟନ୍ତୀ : ପ୍ରଦ୍ୟୁମ୍ନ ବଳ ଥିଲେ ସାଲିସ୍ ବିହୀନ ରାଜନୀତିର ପ୍ରତିକ- ମୁଖ୍ୟମନ୍ତ୍ରୀ
ଭୁବନେଶ୍ୱର(କେନ୍ୟୁଜ୍) : ପ୍ରଦ୍ୟୁମନ୍ନ ବଳ ଛାତ୍ର ଜୀବନରେ ରାଜନୀତି ଆରମ୍ଭ କରି ସମାଜ ସେବା ଓ ସାମ୍ବାଦିକତାରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ମୂଲ୍ୟବୋଧକୁ ଜୀବନର ପ୍ରତିଟି କଷଟି ପଥରରେ ପାଳନ କରିବା ତାଙ୍କର ଆଦର୍ଶ ଥିଲା ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜନନାୟକ ପ୍ରଦ୍ୟୁମ୍ନ ବଳଙ୍କ ୮୮ ତମ ଜୟନ୍ତୀ ଅବସରରେ ଏହା କହିଛନ୍ତି । ଆଜି ଭର୍ଚ୍ଚୁଆଲ୍ କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ସ୍ୱର୍ଗତଃ ବଳଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିବା ସହ ତାଙ୍କୁ ସାଲିସ୍ ବିହୀନ ରାଜନୀତିର ପ୍ରତିକ ବୋଲି ଅଭିହିତ କରିଥିଲେ ।
ରବିବାର ପ୍ରଗତିବାଦୀ ପରିସରରେ ଅନୁଷ୍ଠିତ ସ୍ୱର୍ଗତ ବଳଙ୍କ ଜୟନ୍ତୀରେ ସଭାପତିତ୍ୱ କରି କନ୍ଧମାଳ ସାଂସଦ ତଥା ପ୍ରଦ୍ୟୁମ୍ନ ବଳ ମେମୋରିଆଲ୍ ଟ୍ରଷ୍ଟର ଟ୍ରଷ୍ଟି ଡକ୍ଟର ଅଚ୍ୟୁତ ସାମନ୍ତ ପ୍ରଦ୍ୟୁମ୍ନ ବଳଙ୍କ ସହ ଜୀବନର ଅନେକ ଅନୁଭୂତି ବାଣ୍ଟିଥିଲେ । ସମାଜରେ ଥିବା ଗରିବଙ୍କୁ ଉପରକୁ ଉଠାଇବା ତାଙ୍କର ଚିନ୍ତାଧାରା ଥିଲା । ଯାହାକୁ କିଟ୍ ଓ କିସ୍ ସମଗ୍ର ପୃଥିବୀରେ ପହଞ୍ଚାଇଛି । ସାଲିସ ବିହୀନ ରାଜନୀତି କରିବା ବେଳେ ସେ ପର ଓ ନିଜର ଭିତରେ ଫରକ ଦେଖୁନଥିଲେ । ଯାହା ନ୍ୟାୟ ସଂଗତ ଥିଲା ତାହା ଥିଲା ପ୍ରଦ୍ୟୁମ୍ନ ବଳଙ୍କ ଚିନ୍ତାଧାରା । ଆଜୀବନ ସେହି କଠୋରତାକୁ ପାଳନ କରି କେବେ ସ୍ୱାର୍ଥ ପାଇଁ ମୁଣ୍ଡ ନୁଆଁଇ ନଥିଲେ ବୋଲି ଡ. ସାମନ୍ତ ତାଙ୍କ ବକ୍ତବ୍ୟରେ କହିଥିଲେ ।
ବିଶେଷ ଅତିଥି ଭାବେ କେନ୍ଦ୍ର ପେଟ୍ରୋଲିୟମ୍ ଓ ପ୍ରାକୃତିକ ଗ୍ୟାସ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଭର୍ଚ୍ଚୁଆଲରେ ଯୋଗଦେଇ ସ୍ୱର୍ଗତ ବଳଙ୍କୁ ଯୁବକର ସ୍ୱାଭିମାନ, ଗରିବ,ଅସହାୟ ଓ ନିଷ୍ପେସିତ ଲୋକଙ୍କ ସ୍ୱର ବୋଲି ଅଭିହିତ କରିଥିଲେ । ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ସମ୍ମାନୀତ ଅତିଥି ଭାବେ ଯୋଗଦେଇ କହିଥିଲେ ଯେ ଛାତ୍ର ଓ ଯୁବ ରାଜନୀତି ପ୍ରଦ୍ୟୁମ୍ନ ବଳଙ୍କ ବିନା ଚିନ୍ତା କରାଯାଇ ପାରେନା । ସେ ହେଉଛନ୍ତି ସାଲିସ ବିହୀନ ନିଚ୍ଛକ ସାମାଜ ସଂସ୍କାରକ ବୋଲି ଶ୍ରୀ ଜେନା କହିଥିଲେ । ମୁଖ୍ୟବକ୍ତା ଭାବେ ସାଂସଦ ଭର୍ତ୍ତୁହରି ମହତାବ ଯୋଗଦେଇ ପ୍ରଗତିବାଦୀ ଓ ପ୍ରଦ୍ୟୁମ୍ନ ବଳଙ୍କ ନିରପେକ୍ଷତା ଉପରେ ବକ୍ତବ୍ୟ ରଖିଥିଲେ ।
ପ୍ରଗତିବାଦୀର ନିର୍ଦ୍ଦେଶିକା ଡ. ମୋନାଲିସା ବଳ ସ୍ୱାଗତ ଅଭିଭାଷଣରେ ସ୍ୱର୍ଗତ ବଳଙ୍କ ନିର୍ଭୀକତା ସମ୍ପର୍କରେ ଆଲୋକପାତ କରିଥିଲେ । ପ୍ରଗତିବାଦୀର ଅଧ୍ୟକ୍ଷ ଶାଶ୍ୱତୀ ବଳ ଉପସ୍ଥିତ ଥିବାବେଳେ କାର୍ଯ୍ୟନିର୍ବାହୀ ସମ୍ପାଦକ ବିରୂପାକ୍ଷ ତ୍ରିପାଠି ଧନ୍ୟବାଦ ଦେଇଥିଲେ । ଏହି ଅବସରରେ ସମାଜସେବୀ କ୍ରିଷ୍ଣା ରାଣୀ ବୋଷଙ୍କୁ ପ୍ରଦ୍ୟୁମ୍ନ ବଳ ସମ୍ମାନ ପ୍ରଦାନ କରାଯିବା ସହ ୧୦ କୋଭିଡ୍ ଯୋଦ୍ଧାଙ୍କୁ ସମ୍ବର୍ଦ୍ଧିତ କରାଯାଇଥିଲା ।
ପରବର୍ତ୍ତୀ ଅଧିବେସନରେ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ମନ୍ତ୍ରୀ ଅରୁଣ ସାହୁ, ମନ୍ତ୍ରୀ ସମୀର ରଞ୍ଜନ ଦାଶ, ପୂର୍ବତନ ମନ୍ତ୍ରୀ ପଞ୍ଚାନନ କାନୁନଗୋ, ବିଷ୍ଣୁ ସେଠୀ, ପ୍ରସାଦ ହରିଚନ୍ଦନ ପ୍ରମୁଖ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଓଁକାର ମହାନ୍ତି, ଜଷ୍ଟିସ ଚୈାଧୁରୀ ପ୍ରତାପ କେଶରୀ ମିଶ୍ର, କ୍ରୀଷ୍ଣା ମହାନ୍ତି,ଜଗଦାନନ୍ଦ ଓ ବରେଣ୍ୟ ଅତିଥି ଶାଶ୍ୱତୀ ବଳ ଯୋଗଦେଇଥିବା ବେଳେ ସଂଯୋଜକ ରହିଥିଲେ ସନ୍ଦୀପ ମିଶ୍ର ।
