କୋଭିଡ ମୃତକ ପରିବାର କନ୍ଯା ସନ୍ତାନଙ୍କୁ ବରୀ ବିଧାୟିକାଙ୍କ ସହାୟତା, ଝିଅଙ୍କ ନାଁରେ ଜମା କଲେ ଅର୍ଥ
ଯାଜପୁର (କେନ୍ୟୁଜ୍) : ଯାଜପୁର ଜିଲ୍ଲାର ବରୀ ବିଧାୟିକା ସୁନନ୍ଦା ଦାସ ସରକାରଙ୍କ ଯୋଜନା ସହିତ ନିଜସ୍ୱ କିଛି କାର୍ଯ୍ଯକ୍ରମ ଯୋଡି ସଦାସର୍ବଦା ଚର୍ଚ୍ଚାରେ ରହିଥାନ୍ତି । ଯାହାର ଉଦାହରଣ ଦେଖିବାକୁ ମିଳିଛି ବରୀ ନିର୍ବାଚନମଣ୍ଡଳୀରେ । କୋଭିଡରେ ମୃତ୍ୟୁ ବରଣ କରିଥିବା ବ୍ଯକ୍ତିମାନଙ୍କର କନ୍ଯା ସନ୍ତାନମାନଙ୍କୁ ସହାୟତା ଦେବା ଆରମ୍ଭ କରିଛନ୍ତି । ସେମାନଙ୍କୁ ସିଧାସଳଖ ଅର୍ଥରାଶି ନଦେଇ ଡାକଘରର କିଶାନ ବିକାଶ ପତ୍ର ମାଧ୍ୟମରେ ୫ହଜାର ଟଙ୍କାର ଏକ ସ୍ଥାୟୀ ଜମା ବଣ୍ଡ ପ୍ରଦାନ କରିଛନ୍ତି।
ପ୍ରଥମ ପର୍ଯ୍ଯାୟରେ ବିଧାୟିକା ୬ଟି ପଞ୍ଚାୟତର ଏଭଳି ୧୩ଟି ପରିବାରର ୨୨ଜଣ କନ୍ୟା ସନ୍ତାନଙ୍କୁ ସହାୟତା ଦେଇଛନ୍ତି । ପଞ୍ଚାୟତ ଗୁଡିକ ହେଲା ସ୍ୱାଇଁଖଣ୍ଡ, ଗୋଳକୁଣ୍ଡ, ଧାରପୁର, ସେରପୁର, ଚନ୍ଦନପୁର,ବାଇଁଶିରିଆ ପ୍ରଭୃତି।
ବିଧାୟିକାଙ୍କ ଏଭଳି ପଦକ୍ଷେପକୁ ବିଭିନ୍ନ ମହଲରେ ପ୍ରଶଂସା କରାଯାଇଛି। କରୋନା ଯୁଦ୍ଧରେ ପରିବାରର ମୁଖ୍ଯ ବା ପିତାଙ୍କୁ ହରାଇଥିବା ଝିଅମାନଙ୍କ ନାମରେ ବିଧାୟିକା ସୁନନ୍ଦା ଦାସ ନିଜ ଦରମାରୁ ୫ ହଜାର ଟଙ୍କା ଡାକଘର ମାଧ୍ୟମରେ ଫିକ୍ସଡ ଡିପୋଜିଟ କରି ବଣ୍ଡ ପ୍ରଦାନ କରୁଛନ୍ତି। ତାଙ୍କ ନିର୍ବାଚନମଣ୍ଡଳୀ ମଧ୍ୟରେ ଥିବା ସମସ୍ତ ପଞ୍ଚାୟତରେ କୋଭିଡ ମୃତକମାନଙ୍କର କନ୍ଯାମାନଙ୍କୁ ଏହି ସହାୟତା ଯୋଗାଇ ଦେବାକୁ ନିଷ୍ପତ୍ତି ନେଇଛନ୍ତି।
