ବଲାଙ୍ଗିର ଓ ସୁବର୍ଣ୍ଣପୁର ଜିଲ୍ଲାକୁ ନୂଆବର୍ଷ ଭେଟି, ଲୋୟର ସୁକତେଲ ଜଳସେଚନ ପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ
ଆଜି ବଲାଙ୍ଗିର ଜିଲ୍ଲା ଗସ୍ତରେ ଯାଇ ବହୁ ପ୍ରତୀକ୍ଷିତ ଲୋୟର ସୁକତେଲ ଜଳସେଚନ ପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବଲାଙ୍ଗିର ଓ ସୋନପୁର ଜିଲ୍ଲାରେ ଜଳସେଚନର ଲାଇଫଲାଇନ୍ ହେବ ସୁକତେଲ ପ୍ରକଳ୍ପ ।
ବଲାଙ୍ଗିର (କେନ୍ୟୁଜ) : ସତ ହେବାକୁ ଯାଉଛି ପଶ୍ଚିମ ଓଡ଼ିଶାର ସୁକତେଲ୍ ସ୍ବପ୍ନ । ଆଜି ନେବ ବାସ୍ତବର ରୂପ । ଆଜି ବଲାଙ୍ଗିର ଜିଲ୍ଲା ଗସ୍ତରେ ଯାଇ ବହୁ ପ୍ରତୀକ୍ଷିତ ଲୋୟର ସୁକତେଲ ଜଳସେଚନ ପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ବଲାଙ୍ଗିର ଓ ସୁବର୍ଣ୍ଣପୁର ଜିଲ୍ଲାକୁ ନୂଆବର୍ଷ ଭେଟି ଦେବେ । ସୁତକେଲ୍ ପ୍ରକଳ୍ପ ସହ ୩୦୫ କୋଟି ଟଙ୍କାର ୬୯ଟି ପ୍ରକଳ୍ପର ଭିତ୍ତିଭୂମି ଉନ୍ନୟନ ପ୍ରକଳ୍ପର ଉଦଘାଟନ ଓ ୨ହଜାର ୨୨୦ କୋଟିର ୧୧୨ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ ମୁଖ୍ୟମନ୍ତ୍ରୀ । ବଲାଙ୍ଗିର ଓ ସୋନପୁର ଜିଲ୍ଲାରେ ଜଳସେଚନର ଲାଇଫଲାଇନ୍ ହେବ ସୁକତେଲ ପ୍ରକଳ୍ପ । ଦୁଇ ଜିଲ୍ଲାର ୨୦୦ରୁ ଅଧିକ ଗାଁର ୮୦ ହଜାରରୁ ଅଧିକ ଚାଷୀଙ୍କ ଲକ୍ଷାଧିକ ଏକର ଜମିକୁ ମାଡ଼ିବ ପାଣି । ୫ହଜାର ୨୮୪ କିଲୋମିଟର ଦୀର୍ଘ ଜଳସେଚନ ବ୍ୟବସ୍ଥା ହୋଇଛି । ବଲାଙ୍ଗିର ଜିଲ୍ଲାର ୨ଟି ସହରାଞ୍ଚଳର ହଜାର ହଜାର ଲୋକଙ୍କୁ ପାନୀୟ ଜଳ ଯୋଗାଇ ଦିଆଯିବ ।
ଏହି ପ୍ରକଳ୍ପରୁ ଭୂତଳ ପାଇପ ଯୋଗେ ଜଳସେଚନ ବ୍ୟବସ୍ଥା କରାଯିବ । ଯାହାଦ୍ବାରା ଜଳସେଚନ ସମୟରେ ଜଳ ଅପଚୟ ହେବ ନାହିଁ ଓ ଭୂତଳ ଜଳସ୍ତର ବି ବୃଦ୍ଧି ପାଇବ । ଲୋୟର ସୁକତେଲରୁ ଭୂତଳ ପାଇପରେ ଜଳସେଚନର ବ୍ୟବସ୍ଥା ରାଜ୍ୟରେ ପ୍ରଥମ । ଚାଷୀଙ୍କ ଜମି ଅଧିଗ୍ରହଣ ସମସ୍ୟାକୁ ବାଦ ଦେବା ପାଇଁ ସରକାର ଏହି ବ୍ୟବସ୍ଥା କରିଛନ୍ତି । ୧୯୯୯ ମସିହାରୁ ସୁକତେଲ ପ୍ରକଳ୍ପର ରୂପରେଖ ପ୍ରସ୍ତୁତ ହୋଇଥିଲା । ୨୩ ବର୍ଷ ଧରି ବାଦ ବିବାଦ ପରେ ଏବେ ପ୍ରକଳ୍ପ ପୂର୍ଣ୍ଣାଙ୍ଗ ରୂପ ନେବାକୁ ଯାଉଛି ।
