ବନ୍ୟା ଛାଡି ଯାଇଛି ସତ ହେଲେ ଲୋକଙ୍କୁ ଦେଇଯାଇଛି ଅନେକ ଦୁଃଖ, ଦେଖନ୍ତୁ ବନ୍ୟାର କରାଳ ତାଣ୍ଡବ
କାହାର ଘର ଭାଙ୍ଗିଛି ତ ଆଉ କାହାର ମୁହଁରୁ ଛଡାଇ ନେଇଛି ବର୍ଷ ଯାକର ଆହାର । କେହି କେହି ସର୍ବହରାହୋଇ ଭାଗ୍ୟକୁ ଆଦରି ପଡି ରହିଛନ୍ତି ଘର ଅଗଣାରେ ।
ସୁବର୍ଣ୍ଣପୁର (କେନ୍ୟୁଜ) : ବନ୍ୟା ଛାଡି ଯାଇଛି ସତ ହେଲେ ଲୋକଙ୍କୁ ଦେଇଯାଇଛି ଅନେକ ଦୁଃଖ । ବନ୍ୟାର କରାଳ ତାଣ୍ଡବରେ କାହାର ଘର ଭାଙ୍ଗିଛି ତ ଆଉ କାହାର ମୁହଁରୁ ଛଡାଇ ନେଇଛି ବର୍ଷ ଯାକର ଆହାର । କେହି କେହି ସର୍ବହରାହୋଇ ଭାଗ୍ୟକୁ ଆଦରି ପଡି ରହିଛନ୍ତି ଘର ଅଗଣାରେ । ଚଳିତ ବର୍ଷ ବାଦଲ ଫଟା ଲଗାଣ ବର୍ଷାରେ ବେହାଲ ହୋଇଥିଲା ସୁବର୍ଣ୍ଣପୁର ଜିଲ୍ଲା । ଦେଖା ଦେଇଥିଲା ବନ୍ୟା ପରିସ୍ଥିତି । ଯୋଗାଯୋଗ ବିଛିନ୍ନ ହେବା ସହ ଲୋକଙ୍କ ଧନ ଜୀବନ ନଷ୍ଟ ହୋଇଯାଇଥିଲା । କେହି କେହି ବେସାହାରା ହୋଇଯାଇଥିବା ବେଳେ କାହାର ବୁଡିଯାଇଥିଲା କୂଳ ବେଉସା । ବନ୍ୟାର ତାଣ୍ଡବରେ ରାସ୍ତାଘାଟ ଧୋଇ ଯାଇଥିବା ବେଳେ ଶହଶହ ଏକର ଚାଷଜମି ହୋଇଯାଇଥିଲା ବାଲିଚର । ବନ୍ୟା ପାଣିରେ ଭାସି ଯାଇଛି ଚାଷିଙ୍କ ଅନେକ ସାମଗ୍ରୀ । ବାଡିରେ ପାଣି ଜମି ପଚି ସଢି ନଷ୍ଟ ହୋଇଯାଇଥିଲା ପନି ପରିବା ଚାଷ । ଭାଙ୍ଗି ଯାଇଛି ଅନେକ ଲୋକଙ୍କ କଚ୍ଚା ଘର । ଫଳରେ ଅଂଟା ସଳଖି ପାରୁ ନାହିଁ ଚାଷୀ । ତୁରନ୍ତ କ୍ଷୟ କ୍ଷତିର ଆକଳନ କରି କ୍ଷତି ପୁରଣ ଯୋଗାଇ ଦେବାକୁ ଚାଷି ଦାବି କରୁଥିବା ବେଳେ କେବଳ ଜରିଖଣ୍ଡେ ଦେଇ ଚୁପ ବସିଛି ପ୍ରଶାସନ । ଏଯାଏଁ କ୍ଷୟ କ୍ଷତିର ସଠିକ ଆକଳନ କରାଯାଇ ନଥିବା ବେଳେ ପ୍ରଶାସନିକ ଅବହେଳାକୁ ଦାୟୀ କରି ପୀଡିତ ଅଛନ୍ତି ଦୁଃଖରେ ।
ଖାଲି ସେତିକି ନୂହେଁ ବନ୍ୟାର ତାଉରେ ଯୁବ ଉଦ୍ଦେ୍ୟାଗୀ ଦେବ ରଂଜନ ଦେହୁରୀଙ୍କ କୁକୁଡା ଫାର୍ମରେ ବନ୍ୟାଜଳ 6ଫୁଟ ହୋଇଯିବାରୁ 1500କୁକୁଡା ପାଣିରେ ବୁଡି ମରିଗଲେ । ଘରର କାନ୍ଥ ଭାଙ୍ଗିଜିବାସହ ଫାର୍ମ ଭିତରେ ଥିବା କୁକୁଡା ଦାନା,ସ୍ପେୟର ମେସିନ ଭଳି ଲକ୍ଷାଧିକ ଟଙ୍କାର ସଂମ୍ପତି ନଷ୍ଟ ହୋଇଗଲା । ସେହିପରି କୃଷ୍ଣପାଲିର ଚାଷି ଦାମୋଦର ହୋତାଙ୍କ ବଗିଚାରେ ପବନ୍ୟାପାଣି ପଶି 6ଏକର ପରିମିତ ପନିପରିବା ସବୁ ନଷ୍ଟ ହୋଇଗଲା । ପୋଟଳ,ଟମାଟୋ,ବିଲାତି କଖାରୁ,ଭେଣ୍ଡି ,କଲରାଆଦି ଚାଷ କରିଥିବା ବେଳେ ପାଣିର ସୁଅରେ ଭାସିଗଲା ସାର,ଔଷଧ,ପନି ପରିବା ମଞି,ସ୍ପିଙ୍କଲର ଭଳି ବହୁ ମୂଲ୍ୟବାନ ଯନ୍ତ୍ରାଶଂ । ଏସବୁର କ୍ଷୟକ୍ଷତିକୁ ଆକଳନ କରି ତୁରନ୍ତ ସହୟତା ପ୍ରଦାନ କରିବାକୁ ଦାବୀ କରିଛନ୍ତି ଚାଷୀ ।
ସୁବର୍ଣ୍ଣପୁର ଜିଲ୍ଲାରେ ପ୍ରବାହିତ ହେଉଛି ଛୋଟ ବଡ 16ଟି ନଦୀ ଓ ନାଳ । ସେଥିମଧ୍ୟରୁ ମହାନଦୀ ସୁବର୍ଣ୍ଣପୁର ଜିଲ୍ଲାରେ ବାମ ପାର୍ଶ୍ଵରେ 60 କିଲୋମିଟର ବାଟ ଏବଂ ଡାହାଣ ପାର୍ଶ୍ଵରେ 48 କିଲୋମିଟର ଦେଇ ପ୍ରବାହିତ ହେଉଛି । ମହାନଦୀର ଉଭୟ ପାଶ୍ଵରେ84 ଖଣ୍ଡ ଗାଁ ରହିଛି । ସେହିପରି ବୀରମହାରାଜପୁରର ହରିହର ଯୋର ଠେଙ୍ଗୋ ଡ୍ୟାମରୁ ପାଣି ଛାଡିଲେ ବନ୍ୟା ହୋଇ ପ୍ରଭାବିତ ହୁଅନ୍ତି 28 ଖଣ୍ଡ ଗାଁର ଲୋକେ । ଲଗାଣ ବର୍ଷା ସାଙ୍ଗକୁ ଠେଙ୍ଗୋ ଡ୍ୟମରୁ 6ଟି ଗେଟ ଏବଂ ହୀରାକୁଦ ନଦୀବନ୍ଧ ଯୋଜନାରୁ 20ଟି ଗେଟ ଦେଇ ବନ୍ୟାଜଳ ନିସ୍କାସନ କରାଜିବାପରେ ବେହାଲ ବୀରମହାରାଜପୁରର ସ୍ଥିତି ସଂଙ୍ଗୀନ ହୋଇଥିଲା । ମିଳିଥିବା ସୁଚନା ଅନୁଶାରେ ଜିଲ୍ଲାରେ 17ଟି ଗ୍ରାମ ପଂଚାୟତ ର 20ଟି ଗାଁ ,2ଟି ଏନଏସିରେ ମୋଟ 725ଜଣ ଲୋକ ଏବଂ 340ଜଣ ମହିଳା ଓ ଶିଶୁଙ୍କୁ ଉଦ୍ଧାର କରାଯାଇରନ୍ଧା ଖାଦ୍ୟ/ସୁଖିଲା ଖାଦ୍ୟ ଦିଆଯାଇଥିଲା । ବାଦଲଫଟା ବର୍ଷା ସମେତ ବନ୍ୟାର ତାଉରେ 1000ରୁ ଉର୍ଦ୍ଧ କଚ୍ଚା ଘର ଆଂଶିକ ଭାଙ୍ଗିଥିବା ବେଳେ 43 ଗୋଟି କଚ୍ଚା ଘର ସଂମ୍ପୁର୍ଣ୍ଣ ଭାଙ୍ଗି ଯାଇଥିଲା । ସେହିପରି ପାଣିରେ ବୁଡି 1500 ହେକ୍ଟର ରୁ ଉର୍ଦ୍ଧ ଚାଷ ଜମି ନଷ୍ଟ ହୋଥିବା ବେଳେ 239 ହେକଟର ଚାଷ ଜମି ବାଲିଚର ହୋଇଯାଇଛି । ଅନେକ ସ୍ଥାନରେ ପୋଲ ଭାଙ୍ଘିଛ,ଧୋଇ ନେଇଛି ରାସ୍ତାଘାଟ ଫଳରେ ବିଛିନ୍ନ ହୋଇଥିଲା ଯୋଗାଯୋଗ । ପ୍ରଶାସନ ପକ୍ଷରୁ ବନ୍ୟା ବିପନ୍ନଙ୍କ ପାଇଁ ସମସ୍ତ ବ୍ୟବସ୍ଥା କରାଯିବାସହ ଖୁବ ଶିଘ୍ର କ୍ଷୟକ୍ଷତିର ଆକଳନ କରି କ୍ଷତି ପୁରଣ ଯୋଗାଇ ଦିଆଯିବା ସହ ରାସ୍ତାଘାଟର ମରାମତି ଖୁବ ଶିଘ୍ର କରାଯିବ ବୋଲି ବିଭାଗିୟ କତୃପକ୍ଷ ଜିଲ୍ଲାପାଳ ଏବଂ ଏଡିଏମ କହିଛନ୍ତି।
