ଗୁଜରାଟ ଯିବା ପୂର୍ବରୁ ଗୋପାଳ ହସୁଛି । ମନଖୋଲା ହସୁଥିବାର ଦେଖାଯାଉଛି । ନାର୍କୋ ଓ ପଲିଗ୍ରାଫ ଟେଷ୍ଟ ପାଇଁ ଗୁଜରାଟ ନିଆଯିବା ପୂର୍ବରୁ ଝାରସୁଗୁଡ଼ା ଏୟାରପୋର୍ଟରେ ବସିଥିବା ବେଳେ ହସୁଥିଲା ଗୋପାଳ । ଯାହାକୁ ନେଇ ଏବେ ସବୁଠି ଚର୍ଚ୍ଚା । ଡର-ଭୟ କି ଅନୁତାପ ନାହିଁ । ଅବଶୋଷ କି ଅନୁଶୋଚନା ନାହିଁ । ଏ ହସ ପଛର ରହସ୍ୟ କଣ ।
ଟେଷ୍ଟ ପାଇଁ ନିଆଯାଉଥିବା ଜଣେ ଅଭିଯୁକ୍ତର ଏଭଳି ହସକୁ ନେଇ ଚର୍ଚ୍ଚା । ଲାଗୁଛି ଜଣେ ହତ୍ୟା ଅଭିଯୁକ୍ତ ଆଦୌ ଅନୁତପ୍ତ ନୁହଁ । ଅବଶ୍ୟ କାହିଁକି ହସୁଛି ତାହା ସ୍ପଷ୍ଟ ହୋଇ ନଥିଲେ ମଧ୍ୟ, ଖବର କାଗଜରେ ନିଜର ଖବର କିମ୍ବା ଫଟୋ ଦେଖି ସେ ହସୁଥିବା କୁହାଯାଉଛି ।
ଏବେ ଆସନ୍ତୁ ଜାଣିବା ପଲିଗ୍ରାଫ୍ ଓ ନାର୍କୋ ଟେଷ୍ଟ କଣ । ପଲିଗ୍ରାଫ୍ ହେଉଛି ଲାଇ ଡିଟେକ୍ସନ୍ ଟେଷ୍ଟ । ଅର୍ଥାତ ମିଛ ଧରା ଟେଷ୍ଟ । ମିଛ କହିବା ସମୟରେ ଶରୀରରେ ଅନେକ ପ୍ରକାର ପରିବର୍ତ୍ତନ ହୋଇଥାଏ । ଯେପରି ଝାଳ ବାହାରିବା, ହୃଦ୍ସ୍ପନ୍ଦନ ବଢିବା, ନିଶ୍ୱାସ ପ୍ରଶ୍ୱାସ ବେଗ ବଢିବା ଏବଂ ରକ୍ତଚାପ ତଳ ଉପର ହେବା ।
ଏସବୁ ପରିବର୍ତ୍ତନକୁ ମନିଟର କରିଥାଏ ମେସିନ୍ । ସେଥିପାଇଁ ବ୍ୟକ୍ତିର ଶରୀରରେ ଅନେକ ତାର ଲଗାଯାଇଥାଏ । ଏହି ତାର ଦ୍ୱାରା ଶରୀର ଭିତରର ଗତିବିଧି ମନିଟର କରିଥାଏ ମେସିନ୍ । ତେବେ ପଲିଗ୍ରାଫ୍ ଟେଷ୍ଟରେ ବ୍ୟକ୍ତିକୁ କୌଣସି ପ୍ରକାର ଔଷଧ କିମ୍ବା ଇଞ୍ଜେକସନ୍ ଦିଆଯାଇନଥାଏ । ଅନ୍ୟପଟେ ନାର୍କୋ ଟେଷ୍ଟରେ ବ୍ୟକ୍ତିକୁ ଟ୍ରୁଥ୍ ସେରମ୍ ଦିଆଯାଇଥାଏ । ଏହା ଏପରି ଏକ ଡ୍ରଗ୍ସ ଯାହାକୁ ନେଲେ ବ୍ୟକ୍ତି ସତ କହିଥାଏ ।
ଏହି ଟ୍ରୁଥ୍ ସେରମ୍ରେ ଅନେକ ପ୍ରକାର ଔଷଧ ସାମିଲ ଥାଏ । ଏହାକୁ ଇଞ୍ଜେକ୍ସନ ମାଧ୍ୟମରେ ଦିଆଯାଏ । ଏହାକୁ ନେଲେ ଜଣ ଅଧା ବେହୋସ୍ ଅବସ୍ଥାକୁ ଚାଲିଯାଏ ବ୍ୟକ୍ତି । ଅର୍ଥାତ ବ୍ୟକ୍ତି ଜଣକ ନା ହୋସ୍ରେ ଥାଏ ନା ବେହୋସ୍ ହୋଇଥାଏ । ଏହି ଅବସ୍ଥାରେ ବ୍ୟକ୍ତି ମିଛ କହି ପାରିନଥାଏ । କାରଣ ମିଛ କହିବା ପାଇଁ ମୁଣ୍ଡ ଖର୍ଚ୍ଚ କରିବା ସହ କଳ୍ପନା କରିବାକୁ ପଡିଥାଏ । କିନ୍ତୁ ଟ୍ରୁଥ୍ ଡ୍ରଗ୍ସ ନେବା ପରେ ବ୍ୟକ୍ତି କଳ୍ପନା କରିବା ଶକ୍ତି ହରାଇଥାଏ । ତେଣୁ ମିଛ କହିନପାରି ଅର୍ଦ୍ଧଚେତନ ଅବସ୍ଥାରେ ସତ କହିଥାଏ ।