କେନ୍ୟୁଜ୍(ବ୍ୟୁରୋ): ଆଇଏଫ୍ଏସ୍ ଅଭୟକାନ୍ତ ପାଠକଙ୍କୁ ମିଳିଲା ଜାମିନ୍ । ସର୍ତ୍ତମୂଳକ ଜାମିନ୍ ପ୍ରଦାନ କରିଛନ୍ତି ହାଇକୋର୍ଟ । ଟାଟା କମ୍ପାନୀରେ ଚାକିରି ଦେବା ନାଁରେ ଠକେଇ ନେଇ ବୈଦନାଥପୁର ଥାନାରେ ରୁଜୁ ମାମଲାରେ ଅଭୟକାନ୍ତଙ୍କୁ ଜାମିନ ମିଳିଛି । ୨ ଲକ୍ଷ ଟଙ୍କିଆ ଦୁଇ ଜଣ ଜାମିନଦାର୍ ବଦଳରେ ଜେଲରୁ ମୁକୁଳିବାକୁ କୋର୍ଟ ସର୍ତ୍ତ ରଖିଛନ୍ତି । ଏଥିସହ ଅଭୟକାନ୍ତ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବେ । ସାକ୍ଷୀମାନଙ୍କୁ ପ୍ରଭାବିତ କରିବେ ନାହିଁ ବୋଲି କୋର୍ଟ ସର୍ତ୍ତ ରଖିଛନ୍ତି । ଏହି ମାମଲାରେ ପୂର୍ବରୁ ଗୋପାଳପୁର ବିଧାୟକଙ୍କୁ ଜାମିନ ମିଳି ସାରିଛି । ତେବେ ଅଭୟ ପାଠକ ପୂର୍ବରୁ ତିନିଟି ମାମଲାରେ ଜାମିନ ପାଇ ସାରିଛନ୍ତି । ଫଳରେ ସେ ଜେଲରୁ ମୁକୁଳିବା ପାଇଁ ବାଟ ଫିଟିଛି ।
ଅଭୟକାନ୍ତ ପାଠକଙ୍କୁ ସିନା ଜାମିନ ମିଳିବ କିନ୍ତୁ ତାଙ୍କ ପୁଅ ଆକାଶ ପାଠକଙ୍କୁ ଜାମିନ ମିଳିପାରିନାହିଁ । ଟାଟା କମ୍ପାନୀରେ ଚାକିର କରାଇଦେବା ନାଁ ରେ ଠକେଇ ଘଟଣାରେ ଆକାଶ ପାଠକଙ୍କ ଜାମିନ ଆବେଦନ ଖାରଜ କରିଛନ୍ତି ହାଇକୋର୍ଟ।କ୍ରାଇମବ୍ରାଞ୍ଚ ଦ୍ୱାରା ଦାୟର କରାଯାଇଥିବା ମାମଲାରେ ଜାମିନ ଆବେଦନ ଖାରଜ।ପୂର୍ବରୁ ଏହି ମାମଲାରେ ଅଭିଯୁକ୍ତ ଥିବା ଅଭୟ ପାଠକ ଓ ସର୍ବେଶ୍ୱର ରାଓ ଙ୍କୁ ଜାମିନ ମିଳିଥିବା ବେଳେ ଆକାଶଙ୍କୁ ନିରାଶ ହେବାକୁ ପଡିଛି। ଅନ୍ୟ ତିନୋଟି ମାମଲାରେ ଆକାଶ ଙ୍କୁ ଜାମିନ ମିଳିଥିବା ବେଳେ ଏହି ମାମଲାରେ ଜାମିନ ଖାରଜ ହେବାରୁ ଏବେ ଜେଲ ରୁ ମୁକୁଳିବା ଆଶା ମଉଳି ଯାଇଛି।