କୋରାପୁଟ: ଦୁର୍ଘଟଣାରେ ଯୁବକଙ୍କ ମୃତ୍ୟୁକୁ ନେଇ ଲଙ୍କାକାଣ୍ଡ, ହାଇୱା ପୋଡିବା ସହ ଡ୍ରାଇଭରକୁ ମାଡ଼ ମାରି ଲୋକେ କଲେ ଗୁରୁତର

ଜୟପୁର(କେନ୍ୟୁଜ୍): ହାଇୱା ଚାପରେ ଯୁବକଙ୍କ ମୃତ୍ୟୁ । ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା । ୨୬ ନମ୍ବର ଜାତୀୟ ରାଜପଥର ଭିଜିଲାନ୍ସ ଅଫିସ ନିକଟରେ ଦୁଇଟି ବାଇକକୁ ଧକ୍କା ଦେଇଥିଲା ହାଇୱା । ଘଟଣାସ୍ଥଳରେ ମିଟୁ ଖରାଙ୍କର ମୃତ୍ୟୁ ହୋଇଥିବା ବେଳେ ଗୁରୁତର ରାହୁଲ ପଟ୍ଟନାୟକଙ୍କର ଜିଲ୍ଲା ଡାକ୍ତରଖାନାରେ ମୃତ୍ୟୁ ହୋଇଛି । ଏହାକୁ ନେଇ ଘଟଣା ସ୍ଥଳରେ ଲଙ୍କାକାଣ୍ଡ ହୋଇଥିଲା। ସ୍ଥାନୀୟ ଲୋକମାନେ ହାଇୱା ଡ୍ରାଇଭରକୁ ମାଡ଼ ମରି ଗୁରୁତର କରିବା ପରେ ହାଇୱାକୁ ଜାଳି ଦେଇଛନ୍ତି।

ହାଇୱାଟି ଜଳିବା ପରେ ଘଟଣା ସ୍ଥଳରେ ପୋଲିସ ଓ ଅଗ୍ନିଶମ କର୍ମଚାରୀ ପହଞ୍ଚି ଗୁରୁତର ଡ୍ରାଇଭର ଓ ଦୁର୍ଘଟଣାର ଶିକାର ହୋଇଥିବା ଯୁବକଙ୍କୁ  ଉଦ୍ଧାର କରିବା ସହ ଟ୍ରକ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। କିନ୍ତୁ ଉତ୍ୟେକ୍ତ ଜନତାଙ୍କ ଆକ୍ରୋଶରୁ ପୋଲିସ କର୍ମଚାରୀ ଓ ଅଗ୍ନିଶମ କର୍ମଚାରୀ ବର୍ତ୍ତି ପାରିନଥିଲେ। ପରେ ଜୟପୁର  ଟାଉନଥାନା ଅଧିକାରୀ ବାଲେଶ୍ବର ଗିଧି ଓ ଏସଡିପିଓ ଅରୁପ ଅଭିଷେଖ ବେହେରା ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ଟ୍ରକ ଡ୍ରାଇଭରକୁ  ଉଦ୍ଧାର କରି ଜୟପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। କିନ୍ତୁ ଦୁର୍ଘଟଣାର ଶିକାର ହୋଇଥିବା ଯୁବକଙ୍କର  ମୃତ୍ୟୁ ଘଟିଛି।