ସାଧାରଣ ଭାବେ ଆସିଲେ, ଲୋକଙ୍କୁ ମୁଣ୍ଡିଆ ମାରିଲେ ଏବଂ ଧାଡିରେ ଛିଡା ହୋଇ ନିଜ ପାଇଁ ଭୋଟ୍ ଦେଲେ ମନ୍ମଥ୍
ହାତରେ ପରିଚୟ ପତ୍ର ଧରି ଏକଦମ୍ ସାଧାରଣ ଲୋକ ଭଳି ଛିଡା ହୋଇଛନ୍ତି ମତଦାନ କେନ୍ଦ୍ରରେ ।
ଖୋର୍ଦ୍ଧା (କେନ୍ୟୁଜ) : କଦମ୍ ସାଧାରଣ ଭଳି ଆସିଲେ, ଆଉ ନିଜର ମତଦାନ କଲେ । ପୁଣି ବାଟରେ ରହି ରହି ପଚାରୁଥାନ୍ତି ମାଉସୀ ଭୋଟ୍ ଦେଲ ତ, ସମସ୍ତେ ଭୋଟ ଦିଅନ୍ତୁ । ନିଜର ଅଧିକାର ରଖନ୍ତୁ । ଲୋକଙ୍କ ସହ ଧାଡିରେ ଛିଡା ହୋଇଛନ୍ତି ମନ୍ମଥ୍ ରାଉତରାୟ । ହାତରେ ପରିଚୟ ପତ୍ର ଧରି ଏକଦମ୍ ସାଧାରଣ ଲୋକ ଭଳି ଛିଡା ହୋଇଛନ୍ତି ମତଦାନ କେନ୍ଦ୍ରରେ ।
ଲୋକଙ୍କୁ ମୁଣ୍ଡିଆ ମାରି ବେଶ୍ ଗପି ଗପି ପହଁଚିଲେ ମତଦାନ କେନ୍ଦ୍ରରେ । ତାଙ୍କୁ ଦେଖିଲେ ଜମା ବି ଲାଗିବନି ସେ ବି ଜଣେ ପ୍ରାର୍ଥୀ । ସେ ଯେଉଁ ଧାଡିରେ ଛିଡା ହୋଇଛନ୍ତି ସେଠି ଲୋକ ତାଙ୍କୁ ବି ଭୋଟ୍ ଦେବାକୁ ଛିଡା ହୋଇଥିଲେ । ହେଲେ ସେ ଜଣେ ପ୍ରାର୍ଥୀ ହିସାବରେ ନୁହେଁ ବରଂ ଜଣେ ସାଧାରଣ ଲୋକ ଭଳି ଯାଇ ଛିଡା ହେଲେ । ଧିରେ ଧିରେ କରି ଆଗକୁ ଆଗକୁ ଗଲା ପରେ ପଡିଲା ତାଙ୍କର ପାଳି । ତାପରେ ଭରିଲେ ନିଜର ମତଦାନ ।
ଆଜ୍ଞା ଏ ଚିତ୍ର ହେଉଛି କୁଶୁମାଟି ଛଣଘରରେ । ଆଜି ଜଟଣୀ ନିର୍ବାଚନ ମଣ୍ଡଳୀର ବୁଥ ନଂ ୧୪୮ରେ ନିଜ ମତାଧିକାର ସାବ୍ୟସ୍ତ କରିଛନ୍ତି ଭୁବନେଶ୍ୱର ଲୋକସଭା ପ୍ରାର୍ଥୀ ମନ୍ମଥ ରାଉତରାୟ । ନିଜ ଗାଁ କୁଶୁମାଟି ଛଣଘରରେ ପହଂଚି ଧାଡିରେ ରହି ମତଦାନ କରିଛନ୍ତି । ପ୍ରତି ନିର୍ବାଚନରେ ନିଜ ବାପାଙ୍କ ପାଇଁ ମତଦାନ କରୁଥିବା ବେଳେ ଏଥର ନିଜ ପାଇଁ ମତଦାନ କରିଥିବା କହିଛନ୍ତି । ଏଥର ମତଦାନ ହାର ବଢାଇବା ପାଇଁ ଆମେ ଲୋକଙ୍କୁ ଅନୁରୋଧ କରିଥିଲୁ ଏବଂ ଆଜି ଭୁବନେଶ୍ୱର ଲୋକସଭା କ୍ଷେତ୍ରର ସମସ୍ତ ବୁଥରେ ଭୋଟ ଦେବାକୁ ଗହଳି ଦେଖିବାକୁ ମିଳିଛି ଏବଂ ସେ ବେସ ଉତ୍ସାହିତ ବୋଲି କହିଛନ୍ତି ।
ସେପଟେ କୁଶୁମାଟି ଛଣଘର ମତଦାନ କେନ୍ଦ୍ରରେ ଭୋଟରଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା ଦେଖିବାକୁ ମିଳିଛି । ବୁଥରେ କେନ୍ଦ୍ରୀୟ ସୁରକ୍ଷା ଟିମ ଓ କମିଶନରେଟ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବା ଦେଖିବାକୁ ମିଳିଛି । ସେହିପରି ଖରାକୁ ଦୃଷ୍ଟିରେ ରଖି ଦହି ପଣାର ବ୍ୟବସ୍ଥା ସହ ସେଲ୍ଫି ପଏଣ୍ଟ କରାଯାଇଛି । ଖରା ସତ୍ୱେ ଶହ ଶହ ସଂଖ୍ୟାରେ ଜନସାଧାରଣ ଲମ୍ବା ଧାଡିରେ ରହି ମତଦାନ କରୁଥିବା ଦେଖିବାକୁ ମିଳିଛି ।
