ଫୁଲଡୁମେରରେ ମାଓ ପୋଷ୍ଟର, ନିୟମଗିରି ପାହାଡ ଅଞ୍ଚଳରେ ରାସ୍ତା କାମକୁ ବିରୋଧ
କଳାହାଣ୍ଡି(କେନ୍ୟୁଜ୍): କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ବିଜେପୁର ଥାନା ତ୍ରିଲୋଚନପୁର ପଞ୍ଚାୟତର ନିୟମଗିରି ପାହାଡ ପାଦଦେଶରେ ଥିବା ଫୁଲଡୁମେର ଗାଁ ଠାରେ ଏକ ମାଓ ପୋଷ୍ଟର ଓ ବ୍ୟାନର ଦେଖିବାକୁ ମିଳିଛି। ନିୟମଗିରି ଅଞ୍ଚଳରେ ମାଓ ସଂଗଠନ ସକ୍ରିୟ ହୋଇ ବଂଶୀଧାର-ଘୁମୁସର-ନାଗାବଳୀ ଡିଭିଜନରେ ପୋଷ୍ଟର ମାରି ରାସ୍ତା କାମକୁ ବିରୋଧ କରି ଉପସ୍ଥିତ ଜାହିର କରିଛି। ଫୁଲଡୁମେର ଗାଁଠାରୁ ନିୟମଗିରି ପାହାଡ ଅଞ୍ଚଳରେ ଯଦି ରାସ୍ତା କରାଯାଏ ତେବେ ଦଣ୍ଡ ଦିଆଯିବ ବୋଲି ପୋଷ୍ଟରେ ଉଲ୍ଲେଖ ରହିଛି।
ସୂଚନା ମୁତାବକ କେନ୍ଦ୍ର ସରକାର ଓ ରାଜ୍ୟ ସରକାରଙ୍କୁ ଉକ୍ତ ପୋଷ୍ଟରରେ ବିରୋଧ କରିଥିବା ଉଲ୍ଲେଖ ରହିଛି। ବିଭିନ୍ନ ଗ୍ରାମକୁ ଯୋଗାଯୋଗ କରିବା ପାଇଁ ରାସ୍ତା ନଥିବାରୁ ଜିଲ୍ଲା ପ୍ରଶାସନ ଓ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏଥି ନିମନ୍ତେ ପଦକ୍ଷେପ ନିଆଯାଇଛି। ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ରାସ୍ତା କାମ ଚାଲିଥିବା ବେଳେ ଏହାକୁ ବିରୋଧ କରିଛି ମାଓ ସଂଘଠନ। ବହୁ ରାଷ୍ଟ୍ରୀୟ କମ୍ପାନୀ ଓ ଦଲାଲ ହାତରେ ନିୟମଗିରି ପାହାଡ ଟେକିଦେବା ପାଇଁ ଚକ୍ରାନ୍ତ ଚଳାଇଥିବା ଅଭିଯୋଗ କରି ରାସ୍ତା କାମକୁ ମାଓ ସଂଘଠନ ବିରୋଧ କରିଛି। ଅନ୍ୟପଟେ ବ୍ୟାନରେ ଆସନ୍ତା ଡିସେମ୍ବର ୨ ରୁ ୮ ତାରିଖ ପର୍ଯ୍ୟନ୍ତ ପିଏଲଜିଏ ସପ୍ତାହ ପାଳନ କରିବା ପାଇଁ ବାଘୁନା ଡିଭିଜନ ପକ୍ଷରୁ ଜନ ସାଧାରଣଙ୍କୁ ନିବେଦନ କରାଯାଇଛି।