ଧର୍ମଶାଳା ତହସିଲ ଅଧିନ ବିଛାଖଣ୍ଡି ପାହାଡରେ ଆଜି ସ୍ଥାନୀୟ ତାଳଜଙ୍ଗ, ରାଇଛନ୍ଦା, ଏଣ୍ଡଳବା, ରେଖିଦେଇପୁର ଆଦି ପଂଚାୟତର ଶତାଧିକ ଜନସାଧାରଣ ଖାଦାନରେ ଚାଲିଥିବା ବ୍ଲାଷ୍ଟିଂକୁ ବନ୍ଦ କରିବା ସହ ଏହାର ତୀବ୍ର ବିରୋଧ କରିଥିଲେ । ବିଛାଖଣ୍ଡି ପାହାଡରେ ଦୀର୍ଘ ମିଆଦି ସୂତ୍ରରେ ୧୧ଗୋଟି ଖଣି ଲିଜ ଦିଆଯାଇଥିବା ବେଳେ ଜୈନକ ଲିଜଧାରୀ ସରକାରଙ୍କ ୱାଗନ୍ ଡ୍ରିଲ କରିବାକୁ ଅନୁମତି ବା ପ୍ରମାଣପତ୍ର ନଥାଇ ଏହି ବେଆଇନ କାର୍ଯ୍ୟ କରୁଥିବା ଅଂଚଳବାସୀ ଅଭିଯୋଗ କରିଛନ୍ତି ।
ଫଳରେ ସ୍ଥାନୀୟ ଜନସାଧାରଣ ବହୁ ଅସୁବିଧାରେ ପଡିବା ସହ କୃଷକମାନଙ୍କର ଫସଲହାନୀ, ଏମୋନିଆ ସାର ପ୍ରୟୋଗ ଦ୍ୱାରା ଲୋକମାନେ ଚର୍ମରୋଗର ଶିକାର ହେଉଛନ୍ତି । ଏଥିସହ ଜଳସ୍ତର ନିମ୍ନଗାମୀ ହେବା ସହ ଜଳ ପ୍ରଦୂଷଣ ହେବା ଦ୍ୱାରା କିଡନୀ ରୋଗରେ ଜୀବନ ଯାଉଥିବା ଭଳି ସଂଗୀନ ଅଭିଯୋଗ ଆଣିଛନ୍ତି ଅଂଚଳବାସୀ । ଏନେଇ ଅଂଚଳବାସୀଙ୍କ ତରଫରୁ ଜିଲ୍ଲା ପ୍ରଶାସନ ଓ ତହସିଲ ପ୍ରଶାସନକୁ ଅବଗତ କରାଯାଇଛି । ଏହି ବେଆଇନ କାର୍ଯ୍ୟକୁ ତୁରନ୍ତ ବନ୍ଦ କରାନଗଲେ ସଂପୃକ୍ତ ପଂଚାୟତବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।