ବିଗ୍ ବିଙ୍କ ବିଗ୍ ହାର୍ଟ, କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ କାର୍ଯ୍ୟରେ ଅଭିଭୂତ ହୋଇ କିସ୍କୁ ଦେଲେ ୧୧ ଲକ୍ଷ ଟଙ୍କା
କେନ୍ୟୁଜ୍(ବ୍ୟୁରୋ): କିସ୍କୁ ୧୧ ଲକ୍ଷ ଟଙ୍କା ଦାନ କଲେ ବିଗ୍ ବି ଅମିତାଭ୍ ବଚ୍ଚନ । କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ କାର୍ଯ୍ୟରେ ଅଭିଭୂତ ହୋଇ କିସ୍କୁ ସହାୟତାର ହାତ ବଢ଼ାଇଛନ୍ତି ବିଗ୍ ବି । ଅମିତାଭ୍ ନିଜ ବ୍ୟକ୍ତିଗତ ପାଣ୍ଠିରୁ କିସ୍କୁ ୧୧ ଲକ୍ଷ ଟଙ୍କା ଦାନ କରିଛନ୍ତି । ଗତ ୧୫ ତାରିଖରେ କୌନ ବନେଗା କରୋଡ଼ପତିର କର୍ମବୀର ଶୋ’ରେ ଅମିତାଭଙ୍କ ସହ କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ସାକ୍ଷାତ ହେବାପରେ କିସ୍ ମାଧ୍ୟମରେ ଡକ୍ଟର ସାମନ୍ତ ଜନଜାତି ପିଲାଙ୍କ ପାଇଁ ଏତେ ସବୁ କାର୍ଯ୍ୟ କରୁଥିବା ଜାଣିବାକୁ ପାଇଥିଲେ । ଏହି ଶୋ ଜରିଆରେ ଅମିତାଭ୍ ଅଚ୍ୟୁତ ସାମନ୍ତଙ୍କ ସଂଘର୍ଷପୂର୍ଣ୍ଣ ଜବୀନ ସମ୍ପର୍କରେ ଜାଣିବାକୁ ପାଇଥିଲେ । ବହୁ ସଂଘର୍ଷ ଓ ଘାତ ପ୍ରତିଘାତ ମଧ୍ୟରେ ବଢ଼ି ଅଚ୍ୟୁତ ହଜାର ହଜାର ଜନଜାତି ପିଲାଙ୍କୁ କିସ୍ ରେ ଗୁଣାତ୍ମକ ଶିକ୍ଷା ପ୍ରଦାନ କରି ଜୀବନ ଜୀବିକା ନିଶ୍ଚିନ୍ତ କରାଇପାରିଛନ୍ତି ଜାଣି ଅମିତାଭ୍ ଅଭିଭୂତ ହୋଇପଡିଥିଲେ । ଅଚ୍ୟୁତଙ୍କ କାର୍ଯ୍ୟ ପ୍ରକୃତରେ ପ୍ରେରଣାଦାୟୀ ବୋଲି ସେ କହିଛନ୍ତି । ଅଚ୍ୟୁତଙ୍କ ଏଭଳି ଉଦାହରଣମୂଳକ କାର୍ଯ୍ୟରେ ପ୍ରଭାବିତ ହୋଇ ସହଯୋଗର ହାତ ବଢ଼ାଇଛନ୍ତି ଅମିତାଭ୍ । ସେ କିସ୍କୁ ଦାନ କରିଥିବା ୧୧ ଲକ୍ଷ ଟଙ୍କାର ଡ୍ରାଫ୍ଟ ଆଜି ପହଁଚିଛି । ଅମିତାଭଙ୍କ ଏହି ମହାନତା ପାଇଁ ଡକ୍ଟର ଅଚ୍ୟୁତ ସାମନ୍ତ ତାଙ୍କୁ କୃତଜ୍ଞତା ଜଣାଇବା ସହ କିସ୍ର ୩୦ ହଜାର ଜରଜାତି ଛାତ୍ରଛାତ୍ରୀଙ୍କ ଶୁଭେଚ୍ଛା ସର୍ବଦା ଅମିତାଭଙ୍କ ସହ ରହିବ ବୋଲି ଡକ୍ଟର ସାମନ୍ତ କହିଛନ୍ତି ।.