ଯାଜପୁର: ଦିନ ଦ୍ବିପ୍ରହରରେ ମହିଳାଙ୍କ ବେକରୁ ସୁନା ଚେନ ଝାମ୍ପି ନେଇ ଦୁର୍ବୃତ୍ତ ଫେରାର, ଗାଡ଼ିରୁ ଖସି ପଡି ମହିଳା ଗୁରୁତର
କେନ୍ୟୁଜ୍(ବ୍ୟୁରୋ): ଦିନ ଦ୍ବିପ୍ରହରରେ ମହିଳାଙ୍କ ବେକରୁ ସୁନା ଚେନ ଲୁଟିନେଲେ ଦୁର୍ବୁତ୍ତ। ବେକରୁ ସୁନା ଚେନ ଲୁଟିବା ସମୟରେ ମହିଳା ଜଣକ ଯାଉଥିବା ବାଇକରୁ ଖସିପିଡ଼ି ଗୁରୁତର ଆହତ। ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲା ଧର୍ମଶାଳା ଥାନା ଅଧିନ ନାକପୋଲ-ସାରୋଇକୁ ସଂଯୋଗ କରୁଥିବା ହାଇଲେଭଲ କେନାଲ ରାସ୍ତାରେ। ସୂଚନା ମୁତାବକ ସ୍ଥାନୀୟ ଗଡ଼ମଧୁପୁର ଗ୍ରାମର ସୁବ୍ରତ ବାରିକ, ତାଙ୍କ ପତ୍ନୀ ରଶ୍ମିତା ବାରିକ ଓ ଦୁଇ ଛୋଟ ପୁଅ ଝିଅଙ୍କୁ ସାଙ୍ଗରେ ନେଇ ଆଜି ନିଜ ବାଇକ ଯୋଗେ ଛତିଆ ସ୍ଥିତ ଶ୍ୱଶୁର ଘର ଅଭିମୁଖେ ଯାଉଥିବା ବେଳେ ନାକପୋଲ-ସାରୋଇ ହାଇଲେଭଲ କେନାଲ ରାସ୍ତାରେ ଏକ ଆପାଚି ବାଇକରେ ଜଣେ ଦୁର୍ବୁତ୍ତ ଆସି ତାଙ୍କ ବେକରୁ ସୁନା ଚେନ ଝାମ୍ପି ନେଇଥିଲେ।
ଏହି ସମୟରେ ମହିଳା ଜଣକ ବାଇକରୁ ଖସିପଡି ଗୁରୁତର ଭାବେ ଆହତ ହୋଇଛନ୍ତି। ସଙ୍ଗେ ସଙ୍ଗେ ତାଙ୍କୁ ନିକଟସ୍ଥ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇ ପ୍ରାଥମିକ ଚିକିତ୍ସା କରାଯାଇଛି। ତେବେ ମହିଳା ଜଣଙ୍କ ବେକରେ ଏକ ସୁନା ଚେନ ଓ ହାର ପିନ୍ଧିଥିବା ବେଳେ ଦୁଇଟି ଯାକ ଲୁଟ ହୋଇଥିବା ଅଭିଯୋଗ କରିଛନ୍ତି। ଲୁଟ ହୋଇଥିବା ସୁନାର ଓଜନ ପାଖାପାଖି ୫ଭରି ହେବ ବୋଲି ଜଣାଯାଇଛି। ଖବର ପାଇ ଧର୍ମଶାଳା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
