କର ଦାଖଲ ବ୍ୟବସ୍ଥାରେ ଆସିଲା ପରିବର୍ତ୍ତନ, ପ୍ରଧାନମନ୍ତ୍ରୀ ଲଞ୍ଚ କଲେ “ଟ୍ରାନ୍ସପ୍ୟାରେଣ୍ଟ ଟାକ୍ସସେସନ” ବ୍ୟବସ୍ଥା
୭୪ ତମ ସ୍ୱାଧୀନତା ଦିବସ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ଟ୍ୟାକ୍ସ ବ୍ୟବସ୍ଥାରେ କିଛିଟା ପରିବର୍ତ୍ତନ ଆଣିବା ନେଇ ଏକ ଯୋଜନାର ଶୁଭାରମ୍ଭ କରିଛନ୍ତି । ଶ୍ରୀ ମୋଦି “ଟ୍ରାନ୍ସପ୍ୟାରେଣ୍ଟ ଟାକ୍ସସେସନ” ବ୍ୟବସ୍ଥାର ଶୁଭାରମ୍ଭ କରିଛନ୍ତି । ଏହି ନୂଆ ବ୍ୟବସ୍ଥା କର ଦାଖଲ ପ୍ରକ୍ରିୟାକୁ ସୁବ୍ୟସ୍ଥିତ କରିବା ସହ ଦୁର୍ନୀତିକୁ ମଧ୍ୟ ଅନେକ ପରିମାଣରେ ହ୍ରାସ କରିପାରିବ । ପ୍ରଧାନମନ୍ତ୍ରୀଙ୍କ ଅନୁଯାୟୀ ଦେଶର ପ୍ରତ୍ୟକ ନାଗରିକ ଏହି ନୂଆ କର ବ୍ୟବସ୍ଥା ବାବଦରେ ଜାଣି ରଖିବା ଉଚିତ । କାରଣ ଏହି ନୂଆ ବ୍ୟବସ୍ଥା ପ୍ରତ୍ୟକ୍ଷ ବା ପରୋକ୍ଷ ଭାବରେ ଦେଶର ଅଧିକାଂଶ ନାଗରିକଙ୍କ ସହ ଜଡିତ । କର କାରବାରରେ ହେରଫେରକୁ ରୋକିବା ପାଇଁ ଏହି ନୂଆ ବ୍ୟବସ୍ଥାରେ ସମ୍ପତ୍ତି ବାବଦ କର, ଚିକିତ୍ସା, ଜୀବନ ବୀମା, ପ୍ରିମିୟମ ଭରିବା, ବ୍ୟାପାର ଶ୍ରେଣୀ ଏୟାରଲାଇନ୍ସ ଯାତ୍ରା ଓ ହୋଟେଲ ବିଲ ଆଦିକୁ ମଧ୍ୟ ସାମିଲ କରାଯାଇଛି ।
ଏହାର ଅର୍ଥ ଏହିକି ଯେ ଯଦି ଜଣେ ବ୍ୟକ୍ତି ୨୦ ହଜାର ଟଙ୍କାରୁ ଅଧିକ ହୋଟେଲ ବିଲ କିମ୍ବା ଚିକିତ୍ସା ବୀମା ପ୍ରମିୟମ ଭରୁଥିଲେ, ୫୦୦୦୦ଟଙ୍କାରୁ ଅଧିକ ଟଙ୍କାର ଜୀବନ ବୀମା, ୧ ଲକ୍ଷ ଟଙ୍କାରୁ ଅଧିକ ସ୍କୁଲ ଫି, ମୂଲ୍ୟବାନ ଜିନିଷ କ୍ରୟ , ସୁନା ଗହଣା, ସୌଖିନ ପଦାର୍ଥ କ୍ରୟ, ଅଥବା କୌଣସି ଅନୁଷ୍ଠାନକୁ ବଡ ଆକାରର ଦେୟ ଦେବାକୁ ଥିଲେ ସରକାରଙ୍କ ଠାରୁ ଅନୁମତି ଆଣିବାକୁ ବାଧ୍ୟତାମୂଳକ କରାଯାଇଛି । ଏହାବାଦ ସମ୍ପତ୍ତି କର ଓ ବିଦ୍ୟୁତ ବିଲ ବାବଦରେ ଯଦି ଯଥାକ୍ରମେ ୨୦୦୦୦ ଟଙ୍କା ଓ ଏକ ଲକ୍ଷ ଟଙ୍କାରୁ ଅଧିକ ହେଉଥାଏ ତେବେ ଏନେଇ ବି ସରକାରଙ୍କୁ ଜଣାଇବାକୁ ବାଧ୍ୟତାମୂଳକ କରାଯାଇଛି । ଏହି ନୀତି ନିୟମ ଗୁଡିକୁ ଫର୍ମ ନମ୍ବର 26 ASରେ ବର୍ଣ୍ଣନା କରାଯାଇଛି । ପୂର୍ବରୁ ଉଚ୍ଚ ମୂଲ୍ୟ ନେଣଦେଣ କାରବାରକୁ ବ୍ୟାଙ୍କ ଖାତା ସହ ଯୋଡ଼ା ଯିବା ନେଇ ବ୍ୟବସ୍ଥା ଥିବା ବେଳେ , କିନ୍ତୁ ନୂଆ ବ୍ୟବସ୍ଥାରେ ସମସ୍ତ ଆର୍ଥିକ ଅନୁଷ୍ଠାନ ସାମିଲ ହୋଇପାରିବେ ।
ଖାଲି ସେତିକି ନୁହେଁ ୩୦ଲକ୍ଷ ଟଙ୍କାରୁ ଅଧିକ ସମ୍ପତ୍ତି କାରବାର, ୧୦ ଲକ୍ଷ ଟଙ୍କାରୁ ଅଧିକ ଟଙ୍କାର ସେୟାର ନିବେଶ, ମ୍ୟୁଚୁଆଲ ଫଣ୍ଡ, କ୍ରେଡିଟ କାର୍ଡ, ୧୦ଲକ୍ଷ ଟଙ୍କାରୁ ଅଧିକ ଜମାରାଶିକୁ ଏହି ନେଣ ଦେଣ ଅନ୍ତର୍ଭୁକ୍ତ କରାଯାଇଛି । ଏହାବାଦ ଜମା ଖାତା ପାଇଁ ବ୍ୟାଙ୍କ ଗୁଡିକରେ ନଗଦ ଜମା ରାଶି ଜମା ସୀମାକୁ ୧୦ ଲକ୍ଷରୁ ୨୫ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି ।
