ATM ଟଙ୍କା ଉଠାଣ ଉପରେ SBI ଆଣିଲା ନୂଆ ନିୟମ, OTP ସାହାଯ୍ୟରେ ବାହାରିବ ପଇସା; ଜାଣନ୍ତୁ କେମିତି କାମ କରିବ ସିଷ୍ଟମ୍
ଏଟିଏମ୍ କାର୍ଡ ସହ ଠକେଇ ମାମଲା ଲଗାତାର ଭାବେ ବଢ଼ି ଚାଲିଛି। ଏହାକୁ ନଜରରେ ରଖି ନିଜ ଗ୍ରାହକମାନଙ୍କୁ ଏଥିରୁ ସୁରକ୍ଷିତ ରଖିବା ତଥା ସେମାନଙ୍କ ଧନରାଶିକୁ ସୁରକ୍ଷା ଦେବା ନିମନ୍ତେ ଭାରତୀୟ ଷ୍ଟେଟ୍ ବ୍ୟାଙ୍କ (ଏସ୍ବିଆଇ) ଏକ ନୂତନ ପଦକ୍ଷେପ ଆରମ୍ଭ କରିଛି। ଏଣିକି ଏଟିଏମ୍ରୁ ପଇସା ବାହାର କରିବା ପାଇଁ ଏସ୍ବିଆଇ ଗ୍ରାହକମାନଙ୍କୁ ଓଟିପି କହିବାକୁ ପଡ଼ିବ, ଯାହାକି ସେମାନଙ୍କ ପଞ୍ଜୀକୃତ ମୋବାଇଲ୍ ନମ୍ବରକୁ ଆସିବ। ଏହା ଭେରିଫାଇ ହେବା ପରେ ହିଁ ସେମାନଙ୍କ ପଇସା ଏଟିଏମ୍ରୁ ବାହାରି ପାରିବ। ଏହି ନୂଆ ପଦକ୍ଷେପ ବିଷୟରେ ବ୍ୟାଙ୍କ ନିଜର ଅଫିସିଆଲ ଟ୍ଵିଟର ହ୍ୟାଣ୍ଡେଲରୁ ଟ୍ଵିଟ୍ କରି ଗ୍ରାହକମାନଙ୍କୁ ସୂଚନା ଦେଇଛି। ଏଥିରେ କୁହାଯାଇଛି କି, ‘ଏସ୍ବିଆଇ ଏଟିଏମ୍ରେ କାରବାର ପାଇଁ ଆମର ଓଟିପି ଆଧାରିତ ନଗଦ ପ୍ରତ୍ୟାହାର ବ୍ୟବସ୍ଥା ଠକମାନଙ୍କ ବିରୋଧରେ ଟିକାକରଣ। ଆପଣଙ୍କୁ ଠକାମିରୁ ରକ୍ଷା କରିବା ସବୁବେଳେ ଆମର ପ୍ରାଥମିକତା ରହିବ’।
ଏସ୍ବିଆଇ ଏଟିଏମ୍ରୁ ଓଟିପି ମାଧ୍ୟମରେ ପଇସା ବାହାର କରିବା ପାଇଁ ବ୍ୟାଙ୍କ ବହୁତ ସହଜ ଉପାୟ କରିଛି। ଏହାକୁ ବ୍ୟବହାର କରିବା ସମୟରେ ଆପଣଙ୍କ ପଞ୍ଜୀକୃତ ମୋବାଇଲ୍ ନମ୍ବରକୁ ୪ ଅଙ୍କର ଏକ ଓଟିପି ପଠାଯିବ। ବ୍ୟାଙ୍କ ଅନୁସାରେ, ଏହି ୪ ଅଙ୍କ ବିଶିଷ୍ଟ ଓଟିପି ଉପଯୋଗକର୍ତ୍ତାଙ୍କୁ ଏକକ ଦେଣନେଣ ପାଇଁ ପ୍ରମାଣିତ କରିଥାଏ। ଥରେ ଯେତେବେଳେ ଆପଣ ଏଟିଏମ୍ରେ ଯେତିକି ପଇସା ବାହାର କରିବାକୁ ଚାହୁଁଛନ୍ତି, ତାହା ଉଲ୍ଲେଖ କରିବେ, ତ ସ୍କ୍ରୀନ୍ ସ୍ୱଚାଳିତ ରୂପରେ ଏକ ଓ୍ଵିଣ୍ଡା ପ୍ରଦର୍ଶିତ କରିବ, ଯେଉଁଠାରେ ଆପଣଙ୍କୁ ନିଜର ପଇସା ପ୍ରାପ୍ତ କରିବା ପାଇଁ କୋଡ୍ ଦେବାକୁ ହେବ। ଯଦିଓ ଏହି ସେବାର ଲାଭ ସେହି ଲୋକ ଉଠାଇ ପାରିବେ, ଯାହାଙ୍କ ପାଖରେ ଏସ୍ବିଆଇ ଏଟିଏମ୍ କାର୍ଡ ଥିବ ଏବଂ ସେ ଏସ୍ବିଆଇ ଏଟିଏମ୍ରୁ ହିଁ ପଇସା ଉଠାଉଥିବେ।
ଅନ୍ୟ ବ୍ୟାଙ୍କଗୁଡ଼ିକର ଏଟିଏମ୍ରେ ଏହି ସୁବିଧାର ଲାଭ ବର୍ତ୍ତମାନ ମିଳିବ ନାହିଁ। ଏବେ ଏହି ବ୍ୟବସ୍ଥା National Financial Switch (NFS)ରେ ବନାଯାଇ ନାହିଁ। ବ୍ୟାଙ୍କ ସମ୍ପତ୍ତି, ଜମା, ଶାଖା, ଗ୍ରାହକ ଏବଂ କର୍ମଚାରୀଙ୍କ ମାମଲାରେ ଏସ୍ବିଆଇ ଦେଶର ସବୁଠାରୁ ବଡ଼ ବାଣିଜ୍ୟିକ ବ୍ୟାଙ୍କ। ଏଥି ପୂର୍ବରୁ ଏସ୍ବିଆଇ ବରିଷ୍ଠ ନାଗରିକମାନଙ୍କୁ ପୂଜା ଭେଟି ଦେଇଥିଲା। ବର୍ତ୍ତମାନ ଏସ୍ବିଆଇର ବିଶେଷ ଫିକ୍ସଡ ଡିପୋଜିଟ୍ ଯୋଜନାର ଫାଇଦା ୨୦୨୨ ମାର୍ଚ୍ଚ ସୁଦ୍ଧା ନିଆଯାଇ ପାରିବ। ଅର୍ଥାତ୍ ଏହି ସ୍ପେଶାଲ ସ୍କିମ୍କୁ ପୁଣି ଥରେ ବଢ଼ାଇ ଦିଆଯାଇଛି। ମେ’ ୨୦୨୦ରେ ଦେଶର ଶୀର୍ଷ ଋଣଦାତା ବରିଷ୍ଠ ନାଗରିକଙ୍କ ପାଇଁ ଏସ୍ବିଆଇ ‘WECARE’ ଫିକ୍ସଡ ଡିପୋଜିଟ୍ ଯୋଜନାର ଘୋଷଣା କରିଥିଲା, ଯାହା ପ୍ରଥମରୁ ସେପ୍ଟେମ୍ବର ୨୦୨୦ ପର୍ଯ୍ୟନ୍ତ ଥିଲା। କିନ୍ତୁ କୋଭିଡ୍-୧୯ ମହାମାରୀ ଭିତରେ ବିଶେଷ FD ଯୋଜନାକୁ ଅନେକ ବାର ବଢ଼ାଯାଇଛି। ବ୍ୟାଙ୍କ ଏହାକୁ ଆଗାମୀ ବର୍ଷ ମାର୍ଚ୍ଚ ଶେଷ ପର୍ଯ୍ୟନ୍ତ ବଢ଼ାଇ ଦେଇଛି।
