ଖୁବଶୀଘ୍ର କମିବ ଗ୍ୟାସ୍ ସିଲିଣ୍ଡର ଦାମ୍, ସରକାର ନେଲେ ଏମିତି ପଦକ୍ଷେପ
ସାଧାରଣ ଲୋକଙ୍କୁ ମିଳିବ ଆଶ୍ୱସ୍ତି। ବଢୁଥିବା ଗ୍ୟାସ ଦରରୁ ମିଳିବ ମୁକ୍ତି। ଯଦି ଆପଣ ପ୍ରତି ମାସରେ ଗ୍ୟାସ୍ ସିଲିଣ୍ଡର ନେଉଛନ୍ତି ଏବଂ ଗ୍ୟାସର ବଢ଼ୁଥିବା ଦାମକୁ ନେଇ ଚିନ୍ତିତ ରହିଛନ୍ତି, ତେବେ ଆପଣଙ୍କ ପାଇଁ ଖୁସି ଖବର। ଓଏନଜିସି ଓ ରିଲାଏନ୍ସ ଭଳି ବଡ଼ ତୈଳ ଉତ୍ପାଦନକାରୀ କମ୍ପାନୀ ପକ୍ଷରୁ ଉତ୍ପାଦିତ ଗ୍ୟାସର ଦାମ୍ ସ୍ଥିର କରିବାର ଫର୍ମୂଲାର ସମୀକ୍ଷା ପାଇଁ ଏକ କମିଟି ଗଠନ କରିଛନ୍ତି ସରକାର । ପେଟ୍ରୋଲିୟମ ଏବଂ ଗ୍ୟାସ ମନ୍ତ୍ରଣାଳୟ ଏକ ନିର୍ଦ୍ଦେଶ ଜାରି କରି ଯୋଜନା ଆୟୋଗର ପୂର୍ବତନ ସଦସ୍ୟ କିରିଟ ଏସ ପାରିକଙ୍କ ନେତୃତ୍ୱରେ ଏହି ସମୀକ୍ଷା କମିଟି ଗଠନ କରିଛି ।
ସରକାରଙ୍କ ପକ୍ଷରୁ ଗଠନ କରାଯାଇଥିବା ଏହି କମିଟି ଗ୍ୟାସ ଗ୍ରାହକଙ୍କୁ ଗ୍ୟାସର ଉଚିତ ମୂଲ୍ୟ ବିଷୟରେ ପରାମର୍ଶ ଦେବ । ଏହି କମିଟି ସହରୀ ଗ୍ୟାସ ବିତରଣ ସହ ଜଡ଼ିତ ଘରୋଇ କମ୍ପାନୀ, ପବ୍ଲିକ୍ ଗ୍ୟାସ କମ୍ପାନୀ ଗେଲ ଇଣ୍ଡିଆ ଲିମିଟେଡ୍, ଇଣ୍ଡିଆନ୍ ଅଏଲ୍ କର୍ପୋରେସନ୍ ଏବଂ ସାର ମନ୍ତ୍ରଣାଳୟ ସହିତ ଜଡିତ ବେସରକାରୀ କମ୍ପାନୀଗୁଡିକର ପ୍ରତ୍ୟେକ ପ୍ରତିନିଧିଙ୍କୁ ମଧ୍ୟ ଏହି କମିଟିରେ ସାମିଲ କରାଯାଇଛି। ସରକାର ୨୦୧୪ ରେ ଘରୋଇ ଉତ୍ପାଦିତ ଗ୍ୟାସର ମୂଲ୍ୟ ନିର୍ଣ୍ଣୟ କରିବା ପାଇଁ ଏକ ଫର୍ମୁଲା ଖୋଜିବାରେ ଦେଶଗୁଡିକର ଗ୍ୟାସ ମୂଲ୍ୟ ବ୍ୟବହାର କରିଥିଲେ ।
ଏହି ଫର୍ମୁଲା ଅନୁସାରେ, ମାର୍ଚ୍ଚ ୨୦୨୨ ପର୍ଯ୍ୟନ୍ତ ଉତ୍ପାଦନ ମୂଲ୍ୟଠାରୁ ଗ୍ୟାସର ମୂଲ୍ୟ ଅନେକ ଗୁଣ କମ୍ ଥିଲା । କିନ୍ତୁ ୟୁକ୍ରେନ-ରୁଷ ଯୁଦ୍ଧ ଆରମ୍ଭ ହେବାର ଗତ କିଛି ମାସ ମଧ୍ୟରେ ଏହି ହାର ଦ୍ରୁତ ଗତିରେ ବୃଦ୍ଧି ପାଇଛି । ପୁରୁଣା ଗ୍ୟାସ କ୍ଷେତ୍ରରୁ ଗ୍ୟାସର ମୂଲ୍ୟ ଏପ୍ରିଲରୁ ଦୁଇଗୁଣ ବୃଦ୍ଧି ହୋଇ ୟୁନିଟ୍ ପିଛା ୬.୧ ଡଲାର (MMBTU) ଏବଂ ଆସନ୍ତା ମାସ ସୁଦ୍ଧା ୟୁନିଟ୍ ପିଛା ୯ ଡଲାର ଅତିକ୍ରମ କରିବ ବୋଲି ଆଶା କରାଯାଉଛି । ମନ୍ତ୍ରଣାଳୟ ଏହି କମିଟିକୁ କହିଛି କି, ସେମାନେ ଉପଭୋକ୍ତାଙ୍କୁ ମିଳୁଥିବା ଗ୍ୟାସର ଉଚିତ ଦାମ୍ ପାଇଁ ପରାମର୍ଶ ଦିଅନ୍ତୁ।
ନିକଟରେ ଅଗଷ୍ଟ ୧୮ ତାରିଖରେ ଗ୍ୟାସ ସିଲିଣ୍ଡର ଦାମ୍ ୨୫ ଟଙ୍କା ପଡିଥିଲା। ଏହା ପୂର୍ବରୁ ଜୁଲାଇରେ ରୋଷେଇ ଗ୍ୟାସ୍ ସିଲିଣ୍ଡରର ଦାମ୍ ୨୫.୫୦ ଟଙ୍କା ବଢ଼ିଥିଲା। ଜୁନ୍ ମାସରେ ଘରୋଇ ଗ୍ୟାସ୍ ସିଲିଣ୍ଡର ଦାମ୍ ୮୦୯ ଟଙ୍କା ଥିଲା। ଏହା ଜୁଲାଇରେ ବଢ଼ି ୮୩୪ ଟଙ୍କା ହୋଇଥିଲା। ଅନ୍ୟପଟେ ଯଦି ଜାନୁଆରୀରୁ ଆରମ୍ଭ କରି ବର୍ତ୍ତମାନ ପର୍ଯ୍ୟନ୍ତ ବଢ଼ିଥିବା ଗ୍ୟାସ୍ ଦରକୁ ଦେଖିବା ତେବେ ବିଗତ ୮ ମାସ ମଧ୍ୟରେ ସିଲିଣ୍ଡରର ଦାମ୍ ୧୬୫ ଟଙ୍କା ବଢ଼ିଛି।
ସୂଚନାଯୋଗ୍ୟ ଯେ ତେଲ କମ୍ପାନୀ ପ୍ରତିମାସରେ ଏଲ୍ପିଜି ସିଲିଣ୍ଡର ଦାମ୍ ସମୀକ୍ଷା କରିଥାନ୍ତି ଓ ତା’ ପରେ ବଢ଼ାଇବେ କି କମାଇବେ ସେ ନେଇ ନିଷ୍ପତ୍ତି ନେଇଥାନ୍ତି। ପ୍ରତି ରାଜ୍ୟରେ ଭିନ୍ନ ଭିନ୍ନ ଟ୍ୟାକ୍ସ ଆଦାୟ ହେଉଥିବାରୁ ସିଲିଣ୍ଡରର ଦାମ୍ ବି ଉଣା ଅଧିକେ ଏପଟ ସେପଟ ରହିଥାଏ।
Also Read : ଓଡିଶାରେ ଖାଲିପଡିଛି ଡ୍ରଗ୍ ଇନ୍ସପେକ୍ଟର ପଦବୀ, ଜାଣନ୍ତୁ କେବେଠୁ ଆରମ୍ଭ ହେଉଛି ପ୍ରକ୍ରିୟା
