ଭୁବନେଶ୍ୱର (କେ ନ୍ୟୁଜ୍) : କଟକର ଷଷ୍ଠ ପଜେଟିଭ୍ ଦିଲ୍ଲୀରୁ ଫେରିଥିଲେ । ତେଣୁ ଏହା ପରେ ଭୁବନେଶ୍ୱର, ଭଦ୍ରକ ସମେତ କଟକ ସହରକୁ ୪୮ ଘଣ୍ଟା ସଟ୍ ଡାଉନ୍ ଘୋଷଣା କରାଯାଇଛି । ତେବେ କଟକ ଓ ଭଦ୍ରକରେ କେବଳ ପୌରାଞ୍ଚଳରେ ଏହି ସଟ୍ଡାଉନ୍ ହେଉଥିବା ବେଳେ ଭୁବନେଶ୍ୱର ପୌରାଞ୍ଚଳ ସମେତ ଏହାର କିଛି ଗ୍ରାମ ପଞ୍ଚାୟତରେ ମଧ୍ୟ ସଟ୍ଡାଉନ୍ କରାଯାଉଛି। ଏହାର ତାଲିକା ମଧ୍ୟ ସେ ପଢ଼ି ଶୁଣାଇଛନ୍ତି ।
କଣ ବନ୍ଦ, କଣ ବାଦ୍
ସଟ୍ଡାଉନ୍ରୁ ବାଦ୍ ଡାକ୍ତରଖାନା ଓ ଡାକ୍ତର, ପୋଲିସ୍, ଅଗ୍ନିଶମ, ଆମ୍ବୁଲାନ୍ସ, ଜଳଯୋଗାଣ, ପରିମଳ, ବିଦ୍ୟୁତ୍ ସେବା ଖୋଲା ରହିବ। ଏହି ସମୟରେ ଅଧିକ ଆମ୍ବୁଲାନ୍ସ ରଖାଯିବ। କାହାର ସ୍ୱାସ୍ଥ୍ୟ ଖରାପ ହେଲେ ତୁରନ୍ତ ତାଙ୍କୁ ନେଇ ଡାକ୍ତରଖାନା ପହଞ୍ଚାଇବ । ସ୍ଥାନୀୟ ପୋଲିସ୍ର ଅନୁମତି ଅନୁସାରେ ଅଳ୍ପ କିଛି ଔଷଧ ଦୋକାନ ଖୋଲା ରହିବ । ସେହିପରି ମାଲ ପରିବହନ କରୁଥିବା ବିମାନ ଏବଂ ମାଲଗାଡ଼ି ଚଳାଚଳ କରିବ ।
ରାଜ୍ୟରେ କରୋନା ସ୍ଥିତି
ରାଜ୍ୟରେ ଆଜି ସୁଦ୍ଧା ୧୧୧୩ ଜଣଙ୍କର ନମୂନା ଯାଞ୍ଚ ସରିଛି । ସେଥିରୁ ୬ ଜଣଙ୍କର ପଜେଟିଭ୍ ଆସିଛି । ଏମାନଙ୍କ ମଧ୍ୟରୁ ପ୍ରଥମ ଓ ଦ୍ୱିତୀୟ ପଜେଟିଭ୍ ବ୍ୟକ୍ତି ସୁସ୍ଥ ହେବା ଏକ ବହୁତ ଭଲ ଖବର ବୋଲି ବାଗଚୀ କହିଛନ୍ତି । ଆଜି ସୁଦ୍ଧା ୬୦ ଜଣ ରାଜ୍ୟର ବିଭିନ୍ନ ହସପିଟାଲରେ ଆଇସୋଲେସନ୍ରେ ରହିଛନ୍ତି । ଗତକାଲି ସୁଦ୍ଧା ଏହି ସଂଖ୍ୟା ୮୫ ଥିଲା ବେଳେ ସେଥିରୁ ୨୫ ଜଣ ସୁସ୍ଥ ହୋଇଛନ୍ତି ।
ନିଜାମୁଦ୍ଦିନ୍ ଫେରନ୍ତାଙ୍କ କଥା
ଦିଲ୍ଲୀ ନିଜାମୁଦ୍ଦିନରୁ ଓଡ଼ିଶାକୁ ୨୭ ଜଣ ଫେରିଛନ୍ତି । ଏଥିରେ ୭ ଜଣ ବିଦେଶୀ ଅଛନ୍ତି । ନମୂନା ପରୀକ୍ଷା ପରେ ଏମାନଙ୍କ ମଧ୍ୟରୁ ୨୧ ଜଣଙ୍କର ନେଗେଟିଭ୍ ଓ ଜଣଙ୍କର ପଜେଟିଭ୍ଆସିଛି। ସମସ୍ତ ସନ୍ଦିଗ୍ଧଙ୍କ ପରିବାରବର୍ଗଙ୍କର ମଧ୍ୟ ପରୀକ୍ଷା କରାଯିବା ସହ ସେମାନଙ୍କୁ ଆଇସୋଲେସନ୍ରେ ରଖାଯାଇଛି । ତେବେ ରାଜ୍ୟ ବାହାରେ ଆହୁରି ୪୦ ଜଣ ଜମାତି ଅଟକି ରହିଛନ୍ତି। ବର୍ତ୍ତମାନ ସେମାନେ ଦିଲ୍ଲୀ, ବିହାର, ଆନ୍ଧ୍ର ପ୍ରଦେଶ ଓ ପଶ୍ଚିମବଙ୍ଗ ଆଦି ରାଜ୍ୟରେ ଅଟକି ଥିବା ସୂଚନା ମିଳିଛି । ଆହୁରି ମଧ୍ୟ ପଶ୍ଚିମବଙ୍ଗର କିଛି ଜମାତି ତାଳଚେର ଆସି ଫେରିଥିବା ଜଣାପଡ଼ିଛି । ସେମାନଙ୍କ ଉପରେ ମଧ୍ୟ ନଜର ରଖାଯାଇଛି ବୋଲି ବାଗଚୀ କହିଛନ୍ତି ।
ପୁଣି ଥରେ ବାଗଚୀ ଆହ୍ଵାନ ଦେଇଛନ୍ତି କି କରୋନାରେ ସଂକ୍ରମିତ ହେବା କୌଣସି ଲୋକଲଜ୍ଜାର କାରଣ ନୁହେଁ । ତେଣୁ ଲକ୍ଷଣ ଜଣାପଡ଼ିଲେ ଭୟ ନକରି ଆଗକୁ ଆସି କୁହନ୍ତୁ ବୋଲି ସେ କହିଛନ୍ତି ।
All areas of Bhubaneswar coming under @bmcbbsr
& the GP/Villages mentioned in the advisory, Cuttack Municipal Corporation area and Bhadrak Municipality area are under complete shutdown from 3rd April, 8 PM to 5th April, 8 PM. 1/2 pic.twitter.com/gkj4JiLNMH— H & FW Dept Odisha (@HFWOdisha) April 3, 2020