ସାଧାରଣତଃ ଶୀତଦିନେ ଜଳବାୟୁ ଶୁଷ୍କ ରହିଥାଏ। ଫଳରେ କେଶ ରୁକ୍ଷ, ଶୁଷ୍କ, କେଶ ତଳ ଫାଟିବା ଏବଂ ଝଡ଼ିବା ଭଳି ସମସ୍ୟା ଦେଖାଦେଇଥାଏ। ଅଧିକାଂଶ ଲୋକ ଶୀତଦିନେ ତ୍ବଚାର ଯତ୍ନ ନିଅନ୍ତି କିନ୍ତୁ କେଶ ପ୍ରତି ଧ୍ୟାନ ଦିଅନ୍ତି ନାହିଁ । ଶୀତଦିନେ ତ୍ବଚା ବ୍ୟତୀତ କେଶ ପ୍ରତି ମଧ୍ୟ ଧ୍ୟାନ ଦେବା ଆବଶ୍ୟକ । ଏହି ଋତୁରେ ଗରମ ପାଣି ବ୍ୟବହାର କରିବା ଦ୍ୱାରା କେଶର ଶୁଷ୍କତା ବଢିଯାଏ ଏବଂ ଦୁର୍ବଳ ହୋଇଯାଇ ଝଡି ଯାଇଥାଏ । ଏହାସହ ଏହି ଋତୁରେ ରୁପି ସମସ୍ୟା ମଧ୍ୟ ଦେଖାଯାଇଥାଏ । କେଶର ଏହି ସବୁ ସମସ୍ୟାର ସମାଧାନ କେବଳ ସାମ୍ପୁ ଏବଂ କଣ୍ଡିସନରରେ ସମ୍ଭବ ହୋଇନଥାଏ । ଏଥିପାଇଁ ଶୀତଦିନେ କେଶର ପ୍ରାକୃତିକ ଯତ୍ନର ଆବଶ୍ୟକତା ରହିଛି ।
ସେଥିପାଇଁ କେଶରେ ଅଖରୋଟ ତେଲ ଲଗାଇବା ଅତ୍ୟନ୍ତ ପ୍ରଭାବଶାଳୀ ହୋଇଥାଏ । କାରଣ ଏହି ତେଲରେ ଭିଟାମିନ୍ ଏ, ଭିଟାମିନ୍ ଡି, ଓମେଗା -୩ ଫ୍ୟାଟ୍, ଆଣ୍ଟିଅକ୍ସିଡାଣ୍ଟ ଏବଂ ମ୍ୟାଗ୍ନେସିୟମ୍ ଭରପୂର ଥାଏ, ଯାହା କେଶକୁ ପୋଷଣ ଦେଇଥାଏ । କେଶର ମୂଳରେ ପ୍ରତିଦିନ ଅଖରୋଟ ତେଲ ଲଗାଇବା ଦ୍ୱାରା କେଶ ଦୃଢ ଏବଂ ସୁସ୍ଥ ରହିଥାଏ ।ତେବେ ଆସନ୍ତୁ ଜାଣିବା କେଶରେ ଅଖରୋଟ ତେଲ ଲଗାଇଲେ ଆମର କ’ଣ ଲାଭ ହୋଇଥାଏ ?
ଅଖରୋଟରେ ଭିଟାମିନ୍ ଏବଂ ବାୟୋଟିନ୍ ଥାଏ ଯାହା କେଶର ବୃଦ୍ଧି କରିଥାଏ । ଏହି ତେଲରେ ଥିବା ପୋଟାସିୟମ୍ କେଶକୁ ମଜବୁତ କରିବା ସହ ଚମକ ମଧ୍ୟ ଆଣିଥାଏ ।
ଯଦି ଆପଣଙ୍କର ଧଳା କେଶ ଅଛି ଏବଂ ଏହାକୁ କଲରିଂ କରନ୍ତି ତେବେ ଏହି ତେଲ ବ୍ୟବହାର କରନ୍ତୁ । ଅଖରୋଟ ତେଲ ବ୍ୟବହାର କରିବା ଦ୍ୱାରା କେଶରେ ଲଗାଇଥିବା କଲର ବେଶି ସମୟ ପର୍ଯ୍ୟନ୍ତ ରହିଥାଏ ।
ଶୀତଦିନେ ରୁପି ବହୁ କଷ୍ଟ ଦେଇଥାଏ । ଏହା କେବଳ କେଶକୁ ଦୂର୍ବଳ କରିନଥାଏ ବରଂ କୁଣ୍ଡେଇ ମଧ୍ୟ ହୋଇଥାଏ । ଏହି ସମୟରେ ଏହି ତେଲ ଅତ୍ୟନ୍ତ ଲାଭଦାୟକ ହୋଇଥାଏ । ସପ୍ତାହରେ ଦୁଇଥର ଅଖରୋଟ ତେଲ ଲଗାଇଲେ କେଶରେ ବହୁ ପାର୍ଥକ୍ୟ ଦେଖାଯିବ ।
ଶୀତଦିନେ କେଶ ଝଡିବା ସମସ୍ୟା ଅଧିକ ରହିଥାଏ । ଏହି ଋତୁରେ କେଶ ଶୁଷ୍କ ହୋଇଯାଇଥାଏ,ଯାହାଫଳରେ କେଶ ଝଡିବା ସମସ୍ୟା ବଢିଯାଇଥାଏ । ଏପରି ପରିସ୍ଥିତିରେ ଅଖରୋଟ ତେଲ ବହୁ ଲାଭଦାୟକ ପ୍ରମାଣିତ ହୋଇଥାଏ । କାରଣ ଏହି ତେଲରେ ଓମେଗା ୩ ଫ୍ୟାଟି ଏସିଡ୍ ଥାଏ ଯାହା ତ୍ୱଚାକୁ ସୁସ୍ଥ ରଖିଥାଏ । ଏଥିପାଇଁ ରାତିରେ ତେଲ ଲଗାଇ ସକାଳେ ଧୋଇଦିଅନ୍ତୁ ।
କେଶକୁ ଘନ ଏବଂ ଶକ୍ତିଶାଳୀ କରିବା ପାଇଁ ଏହି ତେଲ ଲଗାଇବା ଉଚିତ । କାରଣ ଅଖରୋଟ ତେଲ କେଶକୁ ପୋଷଣ ଦେଇଥାଏ ଏବଂ ଝଡିବାରୁ ରୋକିଥାଏ ।