ଦୁନିଆର ତୃତୀୟ ବୃହତ୍ତ ଫୁଡ ଚେନ ଷ୍ଟାରବକ୍ସ ଚୀନର ଗ୍ବାଙ୍ଗଜୁ ଠାରେ ଏମିତି ଏକ କାଫେ ଖୋଲିଛି ଯାହାର ନାମ ରହିଛି ସାଇଲେଣ୍ଟ କାଫେ । ଏହି କାଫେର ନାମ କରଣ ଏପରି ହେବାର କାରଣ ହେଉଛି ଏଠି ଖାଦ୍ୟ ଅର୍ଡର କରିବା ପାଇଁ ଗ୍ରାହକଙ୍କୁ ଠାର କିମ୍ବା ସଂକେତ ବ୍ୟବହାର କରିବାକୁ ପଡିଥାଏ । ଏହା ଚୀନର ଏମିତି ଏକ ପ୍ରଥମ ରେସ୍ତୋରାଁ ଯେଉଁଠାରେ ୩୦ କର୍ମଚାରୀରୁ ୧୪ ଜଣ ବଧିର ଅଟନ୍ତି । ତେଣୁ ବଧିର ମାନଙ୍କ ଭାଷାକୁ ବୁଝି ସେମାନଙ୍କ ଉତ୍ସାହିତ କରିବା ପାଇଁ କମ୍ପାନୀ ଏହି ବ୍ୟବସ୍ଥା କରିଛି । ଏହି କମ୍ପାନୀର କେବଳ ଚୀନରେ ୩୮୦୦ ଷ୍ଟୋର ରହିଛି ।
ସାଇଲେଣ୍ଟ କାଫେର ଇଣ୍ଟରିୟରକୁ ବହୁତ ଆକର୍ଷଣୀୟ ଭାବେ ସଜା ଯାଇଛି । କାନ୍ଥ ଗୁଡିକରେ ବଧିର ମାନେ ବୁଝି ପାରୁଥିବା ଭାଷା ଓ ସଂକେତ ସବୁ ଚିତ୍ରିତ ହେଇଛି ଯାହାର ଅର୍ଥକୁ ଅନ୍ୟମାନେ ସହଜରେ ବୁଝିପାରିବେ । କାଫେରେ ଖାଦ୍ୟ ଅର୍ଡର କରିବାର ତରିକା ମଧ୍ୟ ବହୁତ ଚିତ୍ତାକର୍ଷକ ହୋଇଛି । ଗ୍ରାହକଙ୍କୁ ବିନା କଥାରେ ନିଜ ଅର୍ଡର ବୁଝିବାକୁ ପଡିଥାଏ ।ସବୁ ଖାଦ୍ୟ ଓ ମୃଦୁ ପାନୀୟକୁ ନମ୍ବର ଦିଆଯାଇଛି । ଯାହା ମାଗିବାକୁ ହେଲେ ଗ୍ରାହକଙ୍କୁ ସେହି ନମ୍ବର ହାତ ଦ୍ବାରା ସଂକେତ ଦେବାକୁ ପଡିଥାଏ । ଯଦି କେହି ଏପରି ସଂକେତକୁ ଠିକରେ କରି ପାରିବେ ନାହିଁ ତେବେ ସେମାନେ ନୋଟ ପ୍ୟାଡ ମାଧ୍ୟମରେ ଲେଖି ଅର୍ଡର କରିପାରିବେ । ଏହା ବ୍ୟତିତ ଗ୍ରାହାକ ଓ କର୍ମଚାରୀଙ୍କ ମଧ୍ୟରେ ଭାଷାର ଆଦାନ ପ୍ରଦାନ ପାଇଁ ଡିଜିଟାଲ କମ୍ୟୁନିକେସନର ବ୍ୟବସ୍ଥା କରାଯାଇଛି ।
ଗ୍ରାହକଙ୍କୁ ଭବିଷ୍ୟତରେ କିଛି ବି ଅସୁବିଧା ନହେବା ଓ ବଧିର ମାନଙ୍କୁ ଅଧିକ କର୍ମନିଯୁକ୍ତି ମିଳିବା ସେଥିପାଇଁ ମଧ୍ୟ କମ୍ପାନୀ ବ୍ୟବସ୍ଥା କରିଛି ।ଏହି କମ୍ପାନୀ ଗୁଆଙ୍ଗଡଙ୍ଗ ଡିଫ୍ ପିପୁଲ ଆସୋସିଏସନ ସହ ମିଶି ସାଂକେତିକ ଭାଷାର କାର୍ଯ୍ୟକ୍ରମ ଆରମ୍ଭ କରିଛି । ଯାହା ଦ୍ବାରା ଏଠାକୁ ଆସୁଥିବା ପ୍ରତ୍ୟେକ ଗ୍ରାହକ ଏହି ବଧିରମାନଙ୍କ ଭାଷାକୁ ବୁଝି ପାରିବେ ଓ ଶିଖି ପାରିବେ ।ଷ୍ଟାରବକ୍ସ ଏହା ପୂର୍ବରୁ ଏହି ସାଇଲେଣ୍ଟ କାଫେ ୨୦୧୬ରେ ମାଲେସିୟା ଓ ୨୦୧୮ରେ ୱାସିଂଟନର ଡିସିରେ ଆରମ୍ଭ କରିସାରିଛି । ନିଜର ଏହି ବିଶେଷ ପ୍ରୟାସ ପାଇଁ ଲୋକମାନେ ଓ ଗ୍ରାହକ ମାନେ କମ୍ପାନୀକୁ ବହୁତ ପ୍ରଶଂସା କରୁଛନ୍ତି ଆଉ କହୁଛନ୍ତି ଏହା ଏକ ଉତ୍ତମ ପଦକ୍ଷେପ ।