ସଂକ୍ରମଣକୁ ରୋକିବା ପାଇଁ ଲୋକମାନଙ୍କ ସହ ଏପରି ନିଷ୍ଠୁରତା କରୁଛନ୍ତି ଚୀନ ସରକାର, ସୋସିଆଲ ମିଡିଆରେ ଭାଇରଲ ହେଉଛି ଭିଡିଓ
ଚୀନରେ କରୋନା ଭାଇରସକୁ ରୋକିବା ପାଇଁ ସରକାର ଏବେ ଆକ୍ରମଣାତ୍ମକ ପନ୍ଥା ଆପଣେଇଛନ୍ତି । ସୋସିଆଲ ମିଡିଆରେ ଭାଇରଲ ହେଉଥିବା ଏକ ଭିଡିଓରେ ସରକାରୀ କର୍ମଚାରୀମାନେ ଘରେପଶି ଲୋକଙ୍କୁ ଜୋର ଜବରଦସ୍ତ ହସ୍ପିଟାଲ ନେଇଯାଉଥିବା ଦେଖିବାକୁ ମିଳିଛି । ଏହି ଭିଡିଓରେ ଲୋକଙ୍କୁ ଘର ଭିତରୁ ଘୋଷାଡ଼ି ଘୋଷାଡ଼ି ନେଉଥିବା ମଧ୍ୟ ଦେଖିବାକୁ ମିଳିଛି ।
ସୂଚନା ଅନୁଯାୟୀ କରୋନା ଭାଇରସ କାରଣରୁ ଚୀନରେ ୩୦ରୁ ଅଧିକ ସହରକୁ ଲକଡାଉନ କରିଦିଆଯାଇଛି । ପ୍ରାୟ ୬ କୋଟି ଲୋକଙ୍କ ଚଳାଚଳ ଉପରେ ରୋକ ଲଗାଇ ଦିଆଯାଇଛି । ତେବେ ଚୀନ ସରକାର କରୋନା ଭାଇରସ ସଂକ୍ରମିତଙ୍କୁ ଏକାଠି କରି ବାକି ଲୋକମାନଙ୍କ ଠାରୁ ଅଲଗା କରିଦେବାପାଇଁ ପୋଲିସମାନଙ୍କୁ ଆଦେଶ ଦେଇଛନ୍ତି । ତେବେ ଏହି ଭିଡ଼ିଓରେ କର୍ମଚାରିମାନେ ଘରେ ପଶି ଲୋକମାନଙ୍କୁ ଯାଞ୍ଚ ପାଇଁ ଘୋଷାଡ଼ି ଘୋଷାଡ଼ି ନେଉଥିବା ଦେଖିବାକୁ ମିଳିଛି ।
ଏହି ମହାମାରୀ ସହ ଲଢ଼ିବା ପାଇଁ ଚୀନର ଉପପ୍ରଧାନମନ୍ତ୍ରୀ ଲୋକମାନଙ୍କୁ ଆହ୍ୱାନ ଦେଇଥିଲେ ଯାହାପରେ ଏହି ଭିଡିଓ ସାମ୍ନାକୁ ଆସିଛି । କୁହାଯାଉଛି ଯେ ଏହି ଭିଡିଓ ଚୀନର ସବୁଠାରୁ ଅଧିକ ପ୍ରଭାବିତ ସହର ବୁହାନର ଅଟେ ଯେଉଁଠି ପ୍ରାୟ ୧.୪କୋଟି ଲୋକ ବାସ କରନ୍ତି । ଭିଡିଓରେ କର୍ମଚାରୀ ମାନେ ଫେସମାସ୍କ ପିନ୍ଧି ଲୋକଙ୍କୁ ଟାଣି ବାହାର କରୁଥିବା ଦେଖିବାକୁ ମିଳିଛି ।
ବୁହାନର ଅଧିକାରୀ ସଂକ୍ରମଣକୁ ଚିହ୍ନଟ କରିବା ପାଇଁ ଘର ଘର ବୁଲି ଯାଞ୍ଚ କରୁଛନ୍ତି । ତେବେ ଏଠାରେ ଚାରି ପ୍ରକାର ଲୋକଙ୍କୁ କ୍ଵରେଣ୍ଟାଇନ ଷ୍ଟେସନ ଆଣିବା ପାଇଁ କୁହାଯାଇଛି । ପ୍ରଥମତଃ ଯେଉଁମାନଙ୍କ ଠାରେ କରୋନା ଭାଇରସ ଚିହ୍ନଟ କରାଯାଇଛି । ଦ୍ଵିତୀୟତଃ ଯେଉଁମାନେ ସନ୍ଦିଗ୍ଧରେ ଅଛନ୍ତି । ତୃତୀୟତଃ ଯେଉଁମାନେ ସଂକ୍ରମିତ ଲୋକଙ୍କ ସମ୍ପର୍କରେ ଆସିଛନ୍ତି ଏବଂ ଚତୁର୍ଥରେ ଯେଉଁମାନଙ୍କୁ ଜ୍ଵର ହୋଇଛି । ତେବେ ଚୀନରେ ଗତକାଲି ଜଣେ ୬୦ ବର୍ଷୀୟ ଆମେରିକୀୟଙ୍କ ମୃତ୍ୟୁ ଘଟିଛି । ଏହା ଚୀନରେ ପ୍ରଥମ ବିଦେଶୀ ନାଗରିକଙ୍କ ମୃତ୍ୟୁ ବୋଲି କୁହାଯାଉଛି । ବର୍ତ୍ତମାନ ପର୍ଯ୍ୟନ୍ତ ୨୭ଟି ଦେଶରେ କରୋନା ଭାଇରସ ଚିହ୍ନଟ ହୋଇସାରିଛି ।