‘ନର୍କରେ ସଢ଼ିଥାଏ ଗାଈର ହତ୍ୟାକାରୀ’! ଆହ୍ଲାବାଦ ହାଇକୋର୍ଟଙ୍କ ମୁସଲମାନ ଜଜ୍ କହିଲେ, ଗୋ ହତ୍ୟା ଉପରେ ପ୍ରତିବନ୍ଧକ ଲଗାଅ
ଆହ୍ଲାବାଦ ହାଇକୋର୍ଟଙ୍କ ଜଷ୍ଟିସ୍ ଗାଈକୁ ‘ସଂରକ୍ଷିତ ଜାତୀୟ ପଶୁ’ ଘୋଷଣା କରିବାକୁ କେନ୍ଦ୍ର ସରକାରଙ୍କୁ କହିଛନ୍ତି। ଜଷ୍ଟିସ୍ ଶମିନ୍ ଅହମ୍ମଦ କହିଛନ୍ତି କି, ଗାଈ ଏକ ସରୋଗେଟ୍ ମା’ର ଭୂମିକା ତୁଲାଇଥାଏ। ତେଣୁ ତାକୁ ମା’ ରୂପରେ ପୂଜା କରାଯାଇଥାଏ।
ଆହ୍ଲାବାଦ ହାଇକୋର୍ଟଙ୍କ ଲକ୍ଷ୍ନୌ ବେଞ୍ଚର ଜଷ୍ଟିସ୍ ଶମିନ୍ ଅହମ୍ମଦ ଗୋ ହତ୍ୟାକୁ ନେଇ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। ସେ ହିନ୍ଦୁ ଧର୍ମର ଗ୍ରନ୍ଥଗୁଡ଼ିକୁ ଦର୍ଶାଇ କହିଛନ୍ତି ଯେ ଗୋ ହତ୍ୟା କରିଥିବା ବ୍ୟକ୍ତି ନର୍କରେ ସଢ଼ିଥାଏ। ଜଷ୍ଟିସ୍ ଅହମ୍ମଦ କେନ୍ଦ୍ର ସରକାରଙ୍କୁ ଗୋ ହତ୍ୟା ଉପରେ ପ୍ରତିବନ୍ଧକ ଲଗାଇବା ଏବଂ ଗାଈକୁ ସଂରକ୍ଷିତ ପଶୁ ଘୋଷଣା କରିବା ପାଇଁ ଏକ ଆଇନ ପ୍ରଣୟନ କରିବାକୁ କହିଛନ୍ତି। ସେ ଏକ ମାମଲାର ଶୁଣାଣି କରି କହିଛନ୍ତି ଯେ ସମସ୍ତ ଧର୍ମକୁ ସମ୍ମାନ ଦେବା ଉଚିତ୍। କାରଣ, ଭାରତ ଏକ ଧର୍ମନିରପେକ୍ଷ ଦେଶ।
ଆହ୍ଲାବାଦ ହାଇକୋର୍ଟ କହିଛନ୍ତି, ପୁରାଣରେ କୁହାଯାଇଛି ଯେ ବ୍ରହ୍ମା ପୁରୋହିତ ଓ ଗାଈମାନଙ୍କୁ ଏକ ସମୟରେ ହିଁ ଜୀବନ ଦାନ କହିଥିଲେ, ଯେପରି ପୂଜାରୀମାନେ ଧାର୍ମିକ ଗ୍ରନ୍ଥ ପାଠ କରିପାରିବେ ଏବଂ ଗାଈ ଅନୁଷ୍ଠାନଗୁଡ଼ିକୁ ପ୍ରସାଦ ଆକାରରେ ଘିଅ ଦେଇପାରିବ। କୋର୍ଟ ଅନେକ ମାନ୍ୟତା ସମ୍ପର୍କରେ ମଧ୍ୟ ଉଲ୍ଲେଖ କରିଥିଲେ। ଏଥିରେ କୁହାଯାଇଥିଲା ଯେ ଗାଈ ଲୋକମାନଙ୍କୁ କ୍ଷୀର ଦେଇ ସେମାନଙ୍କୁ ଜୀବନ ଦେଇଥାଏ। ସେ ଏକ ସରୋଗେଟ୍ ମା’ର ଭୂମିକା ତୁଲାଇଥାଏ। ଏଥିପାଇଁ ତାକୁ ମା’ ରୂପରେ ପୂଜା କରାଯାଇଥାଏ।
ଆହ୍ଲାବାଦ ହାଇକୋର୍ଟ ଶୁଦ୍ଧିକରଣ ଉଦ୍ଦେଶ୍ୟରେ ମଧ୍ୟ ଗାଈର ମହତ୍ତ୍ୱ ବିଷୟରେ ଉଲ୍ଲେଖ କରିଥିଲେ, ଯେପରି ପଞ୍ଚାଙ୍ଗ, ଗାଈଠାରୁ ପ୍ରାପ୍ତ ୫ ଉତ୍ପାଦ ଯଥା କ୍ଷୀର, ଲହୁଣୀ, ଦହି, ପରିସ୍ରା ଓ ଗୋବର ଆଦି ମଣିଷର ବ୍ୟବହାରରେ ଲାଗିଥାଏ।
କ’ଣ ରହିଛି ମାମଲା
ବାରାବଙ୍କୀର ଜଣେ ବ୍ୟକ୍ତିଙ୍କ ବିରୋଧରେ ଗୋ ହତ୍ୟା ଏବଂ ମାଙ୍କଡ଼ ବିକ୍ରି ଅଭିଯୋଗରେ ମାମଲା ରୁଜୁ କରାଯାଇଥିଲା। କୋର୍ଟ ଏହି ମାମଲାକୁ ରଦ୍ଦ କରିବାକୁ ମନା କରିଦେଇଥିଲେ। କୋର୍ଟ କେନ୍ଦ୍ର ସରକାରଙ୍କୁ ଗୋ ହତ୍ୟା ଉପରେ ପ୍ରତିବନ୍ଧକ ଲଗାଇବା ପାଇଁ ଆଇନ ପ୍ରଣୟନ କରିବାକୁ ଏବଂ ଗାଈକୁ ‘ସଂରକ୍ଷିତ ଜାତୀୟ ପଶୁ’ ଘୋଷିତ କରିବାକୁ କହିଛନ୍ତି। କୋର୍ଟ କହିଛନ୍ତି ଯେ ଗାଈ ହତ୍ୟାକାରୀଙ୍କୁ କ୍ଷମା କରାଯାଇ ପାରିବ ନାହିଁ।
