ବାହାନଗା ଟ୍ରେନ ଦୁର୍ଘଟଣା : ପୋଷ୍ଟ ଟ୍ରମାଟିକ ଷ୍ଟ୍ରେସ ଡିସଅର୍ଡରର ଶିକାର ହୋଇଛନ୍ତି ଆହତ, କିଏ କାନ୍ଦୁଛି ତ କିଏ ହସୁଛି, ଆଉ କିଏ ଚିତ୍କାର କରୁଛି
ବାଲେଶ୍ବର ବାହାନଗାରେ ହୋଇଥିବା ଟ୍ରେନ ଦୁର୍ଘଟଣାରେ ବଞ୍ଚିଯାଇଥିବା ଆହତଙ୍କ କାହାଣୀ ସାଙ୍ଘାତିକ । ଟ୍ରେନ ଟ୍ରାଜେଡିରୁ ରକ୍ଷା ପାଇଥିବା ବ୍ୟକ୍ତିଙ୍କର ବିଗିଡିଯାଇଛି ମାନସିକ ସ୍ଥିତି । ସେମାନେ ପୋଷ୍ଟ ଟ୍ରମାଟିକ ଷ୍ଟ୍ରେସ ଡିସଅର୍ଡର ଶିକାର ହୋଇଛନ୍ତି । ଡାକ୍ତର ସେମାନଙ୍କୁ କାଉନସେଲିଂ କରୁଛନ୍ତି ।
ବାଲେଶ୍ବର ବାହାନଗାରେ ହୋଇଥିବା ଟ୍ରେନ ଦୁର୍ଘଟଣାର ଭୟାବହ କାହାଣୀ ସାମ୍ନାକୁ ଆସିଛି । ଏଭଳି ଭୟଙ୍କର ଦୁର୍ଘଟଣାରେ ଆହତ ହୋଇଥିବା ଯାତ୍ରୀ ଧୀରେ ଧୀରେ ସୁସ୍ଥ ହେଉଛନ୍ତି । କଟକ ଏସସିବି ମେଡିକାଲ କଲେଜ ଏବଂ ହସପିଟାଲରେ ଭର୍ତ୍ତି ହୋଇଥିବା ୧୦୫ ଆହତଙ୍କ ମଧ୍ୟରୁ ପାଖାପାଖି ୪୦ ଜଣ ପୋଷ୍ଟ ଟ୍ରମାଟିକ ଷ୍ଟ୍ରେସ ଡିସଅର୍ଡର (PTSD ) ରେ ରହିଛନ୍ତି । ଏମାନଙ୍କୁ କାଉନସିଲିଂ କରାଯାଉଛି । ପରିଜନଙ୍କ ଉପସ୍ଥିତିରେ ଆହତଙ୍କ ମନରୁ ଭୟ ଦୂର କରୁଛନ୍ତି ବିଶେଷଜ୍ଞ ।
ସୂଚନାଯୋଗ୍ୟ, ବାଲେଶ୍ବର ଟ୍ରେନ ଦୁର୍ଘଟଣାରେ ୨୮୮ ଜଣଙ୍କର ଜୀବନ ଚାଲିଯାଇଥିବା ବେଳେ ୧୧୦୦ରୁ ଅଧିକ ଆହତ ହୋଇଥିଲେ । କ୍ଲିନିକାଲ ସାଇକୋଲୋଜି ବିଭାଗର ଆସୋସିଏଟ ପ୍ରଫେସର ଡ. ଯଶୋବନ୍ତ ମହାପାତ୍ର କହିଛନ୍ତି, ଦୁର୍ଘଟଣାରୁ ବଞ୍ଚିଥିବା ଲୋକ ମାନସିକ ସ୍ଥିତିକୁ ଦେଖି ହସପିଟାଲରେ ସେମାନଙ୍କର କାଉନସେଲିଂ କରାଯାଉଛି । ଦୁର୍ଘଟଣାରୁ ଜୀବିତ ରହିଥିବା ଲୋକଙ୍କ ମସ୍ତିଷ୍କରେ ପ୍ରଭାବ ପଡିବା ସ୍ବାଭାବିକ ।
ସେ କହିଛନ୍ତି, ଆହତ ହୋଇଥିବା ଅନେକଙ୍କ ମଧ୍ୟରୁ କିଛି ଚିନ୍ତାଗ୍ରସ୍ତ, କିଛି ଭୟଭୀତ ଏବଂ ଆଉ କେତେକ ବିଚଳିତ ହେଉଛନ୍ତି । କିଛି ଚୁପ୍ ରହୁଥିବା ବେଳେ କିଛି କାନ୍ଦୁଛନ୍ତି, ଆଉ କିଛି ହସୁଛନ୍ତି ।
ତେଣୁ ତାଙ୍କୁ ହସପିଟାଲରେ କାଉନସେଲିଂ କରିବା ଚାରି ଜଣିଆ ଟିମ୍ ଗଠନ କରାଯାଇଛି । ପ୍ରତ୍ୟେକ ଟିମରେ ଜଣେ ମନୋ ଚିକିତ୍ସକ, ମନୋବୈଜ୍ଞାନକ, ଜଣେ ସାମାଜିକ କର୍ମକର୍ତ୍ତା, ଆଉ ଜଣେ ରୋଗୀଙ୍କ ପରିଜନ ରହିଛନ୍ତି । ଯେଉଁମାନେ ବଞ୍ଚିଯାଇଛନ୍ତି, ଦୁର୍ଘଟଣା ବିଷୟରେ ସ୍ବପ୍ନ ଆସିବାରୁ ସେମାନେ ଠିକ୍ ଭାବେ ଶୋଇପାରୁନାହାନ୍ତି ।
କିଛି ରୋଗୀ ରାତିରେ କାନ୍ଦୁଛନ୍ତି, ଆଉ କିଛି ଜୋର ଜୋରରେ ହସୁଛନ୍ତି । ଏମାନଙ୍କୁ ଠିକ୍ କରିବା ପାଇଁ କାଉନସେଲିଂ କରାଯାଉଛି । କିଛି ସମ୍ବେଦନଶୀଳ ରୋଗୀଙ୍କୁ ଅନ୍ୟ ରୋଗୀ ତୁଳନାରେ ଅଧିକ ସମୟ ଦିଆଯାଉଛି ବୋଲି ଡା. ମହାପାତ୍ର କହିଛନ୍ତି ।
ସୂଚନାଯୋଗ୍ୟ, ନିକଟରେ ବାଲେଶ୍ବର ବାହାନଗା ଷ୍ଟେସନରେ ହୋଇଥିବା କରମଣ୍ଡଳ ଏକ୍ସପ୍ରେସ ଦୁର୍ଘଟଣାରେ ୨୮୮ ଜଣଙ୍କର ପ୍ରାଣ ଚାଲିଯାଇଥିବା ବେଳେ ୧୧୦୦ରୁ ଅଧିକ ଆହତ ହୋଇଥିଲେ । ବାହାନଗା ଷ୍ଟେସନରେ ମାଲଗାଡି ଲୁପ୍ ଲାଇନରେ ଥିବା ବେଳେ ମେନ ଲାଇନରେ କରମଣ୍ଡଳ ଏକ୍ସପ୍ରେସକୁ ଗ୍ରୀନ ସିଗନାଲ ମିଳିଥିଲା । କରମଣ୍ଡଳ ମେନ ଲାଇନରେ ଆସୁଥିବା ବେଳେ ହଠାତ୍ ପୁଣି ଲୁପ୍ ଲାଇନରେ ଯିବାକୁ ସିଗନାଲ ମିଳିଥିଲା । ଟ୍ରେନକୁ ଲୁପ୍ ଲାଇନ ସିଗନାଲ ମିଳିବା ପରେ କରମଣ୍ଡଳ ଡ୍ରାଇଭର ଗାଡିକୁ ଲୁପ୍ ଲାଇନକୁ ନେଇଥିଲେ । ଧକ୍କା ଏତେ ଭୟଙ୍କର ଥିଲା ଯେ, ଏକ୍ସପ୍ରେସର ଇଂଜିନ ମାଲଗାଡି ଉପରେ ଚଢିଯାଇଥିଲା । ଆଉ ୨୧ଟି ବଗି ଲାଇନଚ୍ୟୁତ ହୋଇଥିଲା। ବଗିଗୁଡିକୁ ଲାଇନଚ୍ୟୁତ ହୋଇ ଅନ୍ୟ ଲାଇନରେ ପଡିଥିଲା । ଆଉ ଡାଉନ ଲାଇନରେ ଆସୁଥିବା ଯଶବନ୍ତପୁର ହାୱାଡା ଏକ୍ସପ୍ରେସ ଏହି ବଗି ସହିତ ଧକ୍କା ହୋଇଥିଲା । ଫଳରେ ଆଉ ଏକ ଟ୍ରେନ ଦୁର୍ଘଟଣାର ଶିକାର ହୋଇଥିଲା।
