ନୂଆଦିଲ୍ଲୀ : ରୁଷର ଜଣେ ପ୍ରଫେସର ଦାବି କରିଛନ୍ତି ଯେ ରାଷ୍ଟ୍ରପତି ଭ୍ଲାଦିମିର ପୁଟିନ ଗତ କିଛି ଦିନ ହେବ ସାଇବରିଆର ଏକ ଭୂତଳ ସହରର ଏକ ବଙ୍କରରେ ନିଜ ପରିବାର ସଦସ୍ୟଙ୍କୁ ଲୁଚାଇ ରଖିଥିଲେ ଯେଉଁଠାରେ ପରମାଣୁ ଆକ୍ରମଣକୁ ଏଡାଯାଇପାରିବ। ରାଜନୈତିକ ବୈଜ୍ଞାନିକ ଭାଲେରୀ ସୋଲୋଭି, କହିଛନ୍ତି ଯେ ବିଳାସପୂର୍ଣ୍ଣ ହାଇ-ଟେକ୍ ବଙ୍କର୍ ଅଲ୍ଟାଇ ପର୍ବତରେ ଅବସ୍ଥିତ ଏବଂ ଏହାକୁ ପରମାଣୁ ଯୁଦ୍ଧ ସମୟରେ ସୁରକ୍ଷା ପାଇଁ ଡିଜାଇନ୍ କରାଯାଇଛି। ପୂର୍ବରୁ ମସ୍କୋ ଷ୍ଟେଟ ଇନଷ୍ଟିଚ୍ୟୁଟ୍ ଅଫ୍ ଇଣ୍ଟରନ୍ୟାସନାଲ ରିଲେସନସିପ୍ (MGIMO) ରେ କାର୍ଯ୍ୟ କରୁଥିବା ପ୍ରଫେସର ସୋଲୋଭି କିଛି ଦିନ ଆଗରୁ ପୁଟିନଙ୍କ ସ୍ୱାସ୍ଥ୍ୟଗତ ସମସ୍ୟାରେ ପୀଡିତ ଥିବା ଏବଂ ରୁଷର ଜନସାଧାରଣଙ୍କଠାରୁ ଲୁଚି ରହିଥିବା ଦାବି କରିଥିଲେ। ଏହା ମଧ୍ୟ କୁହାଯାଇଥିଲା ଯେ ପୁଟିନ ତାଙ୍କ ପ୍ରତିରକ୍ଷା ମନ୍ତ୍ରୀ ସରୋଜ ଶୋଏଗୁଙ୍କ ସହ ଗୁପ୍ତ ରୀତିନୀତିରେ ଭାଗ ନେଇଥିଲେ।
ଏକ ଭିଡିଓ ବାର୍ତ୍ତାରେ ସୋଲୋଭି କହିଛନ୍ତି, ୟୁକ୍ରେନ୍ ଉପରେ ରୁଷ ଆଣବିକ ବା ପରମାଣୁ ବୋମା ପକାଇବା ନେଇ ଆଶଙ୍କା ଉପୁଜିଛି । ପୁଟିନ୍ କୌଣସିମତେ ପଛକୁ ହଟିବେ ନାହିଁ । ତେଣୁ ଆଗକୁ ଆଣବିକ ଯୁଦ୍ଧ ହୋଇପାରେ । ଏଭଳି ସ୍ଥିତିରେ ପୁଟିନ୍ ଆଗୁଆ ତାଙ୍କ ପରିବାର ସଦସ୍ୟଙ୍କୁ ଏହି ସ୍ୱତନ୍ତ୍ର ବଙ୍କର ମଧ୍ୟକୁ ପଠାଇ ଦେଇଛନ୍ତି । ସାଇବେରିଆର ଅଲ୍ଟାଇ ରିପବ୍ଲିକ୍ଠାରେ ଏହି ବଙ୍କର ରହିଛି । ଏହି ବଙ୍କର ହେଉଛି ଏକ ଛୋଟ ସହର ଭଳି । ଏଠାରେ ଅତ୍ୟାଧୁନିକ ଟେକ୍ନୋଲୋଜି ବ୍ୟବହାର କରାଯାଇଛି । ୧୦ ବର୍ଷ ତଳେ ଏହାକୁ ନିର୍ମାଣ କରାଯାଇଥିଲା । ନିୟମିତ ଭାବେ ଏହାର ସୁରକ୍ଷା ବ୍ୟବସ୍ଥା ଆହୁରି ସୁଦୃଢ଼ କରାଯାଉଛି । ଏହି ବଙ୍କର ସହର ମଧ୍ୟକୁ ଉପଯୁକ୍ତ ବାୟୁ ଚଳାଚଳ ପାଇଁ ଏକାଧିକ ଭେଣ୍ଟିଲେସନ୍ ପଏଣ୍ଟ ରହିଛି । ଏହାକୁ ଅନେକ ପର୍ବତ ଘେରି ରହିଛି ।
ଏକ ଅତ୍ୟାଧୁନିକ ୧୧୦ କିଲୋଭୋଲ୍ଟ ସବ୍ଷ୍ଟେସନ୍ ଏଥିସହ ସଂଯୋଗ ହୋଇଛି । ଏକ ଛୋଟ ସହର ପାଇଁ ଏହି ସବ୍ଷ୍ଟେସନ୍ ପର୍ଯ୍ୟାପ୍ତ ବିଜୁଳି ସେବା ଯୋଗାଇ ଦେଇପାରିବ । ନିର୍ମାଣ ବେଳେ ଜର୍ମାନୀର ଅନେକ ଖୋଳାଳି ଏଥିରେ ସାମିଲ ହୋଇଥିଲେ । ତେବେ ପୁଟିନ୍ଙ୍କ ପରିବାରର କେଉଁମାନଙ୍କୁ ଏହି ଭୂତଳ ସହର ମଧ୍ୟରେ ରଖାଯାଇଛି ସେ ବାବଦରେ ସୋଲୋଭି ଅବଗତ କରାଇନାହାନ୍ତି । ୩୮ ବର୍ଷୀୟ ଅଲିମ୍ପିକ୍ ସ୍ୱର୍ଣ୍ଣ ବିଜୟିନୀ ରିଦ୍ମିକ୍ ଜିମ୍ନାଷ୍ଟ ଅଲିନା କାବେଭା ରୁଷ ରାଷ୍ଟ୍ରପତି ପୁଟିନ୍ଙ୍କ ଗୋପନ ପତ୍ନୀ ବୋଲି ଦାବି କରାଯାଉଛି । କାବେଭା ହେଉଛନ୍ତି ତାଙ୍କର ପ୍ରକୃତ ପରିବାର ଏବଂ ତାଙ୍କ ନିଷ୍ପତ୍ତି ପୁଟିନ୍ଙ୍କ ଉପରେ ପ୍ରଭାବ ପକାଇ ଥାଏ ବୋଲି ଗତବର୍ଷ ସୋଲୋଭି କହିଥିଲେ ।
ସୂଚନା ଯୋଗ୍ୟ ପ୍ରଫେସର ସୋଲୋଭି ଏଭଳି ଦାବି କରିବା ପରେ ତାଙ୍କୁ ତୁରନ୍ତ ଗିରଫ କରାଯାଇ ପଚରାଉଚରା କରାଯାଇଛି । ଏହା ପୂର୍ବରୁ ପୁଟିନ୍ଙ୍କ ଠାରେ ଗୁରୁତର ସ୍ୱାସ୍ଥ୍ୟଗତ ସମସ୍ୟା ରହିଥିବା ସେ ଦାବି କରିଥିଲେ । ଏହାପରେ ତାଙ୍କର ଏକାଧିକ ଇଲେକ୍ଟ୍ରୋନିକ୍ ଡିଭାଇସ୍କୁ ଜବତ କରାଯାଇଥିଲା । ପରେ ତାଙ୍କୁ ଜେଲରୁ ମୁକ୍ତ କରାଯାଇଥିଲା । କିନ୍ତୁ ଏହି ମାମଲା ବନ୍ଦ ହୋଇନାହିଁ । ସୋଲୋଭିଙ୍କ ଏହି ଦାବି ସେତେବେଳେ ସାମ୍ନାକୁ ଆସିଥିଲା ଯେତେବେ ରୁଷ ମିସାଇଲ ହମ୍ମଲା ସହିତ କ୍ୱିଭ୍ ଓ ଖାରକିଭକୁ ଟାର୍ଗେଟ କରିଥିଲା । ଏହା ପରେ ଅସହାୟ ନାଗରିକଙ୍କ ଉପରେ ପୁଟିନ ବିନାଶକାରୀ କ୍ଲଷ୍ଟର ବୋମା ଫିଙ୍ଗି ଯୁଦ୍ଧ ଅପରାଧ କରୁଛନ୍ତି ବୋଲି ଅଭିଯୋଗ ହୋଇଛି।
ଆହୁରି ପଢନ୍ତୁ : ଏପ୍ରିଲ ମାସରେ ହେବ ଜେଇଇ ମେନ୍, ଏଥର ଚାରିଟି ବଦଳରେ ଦୁଇଟି ପର୍ଯ୍ୟାୟରେ ହେବ ପରୀକ୍ଷା