ସୂର୍ଯ୍ୟରେ ଫାଟ! ଭାଙ୍ଗି ଅଲଗା ହେଲା ଏକ ବଡ଼ ଅଂଶ; ପୃଥିବୀ ଉପରେ କ’ଣ ହେବ ଏହାର ପ୍ରଭାବ?
ଭାଙ୍ଗିଗଲା ସୂର୍ଯ୍ୟଙ୍କର ଏକ ବଡ଼ ଅଂଶ! ନିକଟରେ ବୈଜ୍ଞାନିକମାନେ ଆବିଷ୍କାର କରିଛନ୍ତି ଯେ ସୂର୍ଯ୍ୟଙ୍କର ଏକ ବଡ଼ ଅଂଶ ଭାଙ୍ଗି ଅଲଗା ହୋଇଯାଇଛି, ଯାହାକୁ ନେଇ ବୈଜ୍ଞାନିକମାନେ ଆଶ୍ଚର୍ଯ୍ୟଚକିତ ହୋଇଯାଇଛନ୍ତି।
ନିକଟରେ ବୈଜ୍ଞାନିକମାନେ ଏକ ଅଦ୍ଭୁତପୂର୍ବ ଆବିଷ୍କାର କରିଛନ୍ତି। ବୈଜ୍ଞାନିକଙ୍କ ଅନୁସାରେ, ସୂର୍ଯ୍ୟଙ୍କର ଏକ ବଡ଼ ଅଂଶ ଭାଙ୍ଗି ଅଲଗା ହୋଇଯାଇଛି। ଜେମ୍ସ ୱେବ୍ ସ୍ପେସ୍ ଟେଲିସ୍କୋପ୍ ସୂର୍ଯ୍ୟ ଭାଙ୍ଗିବାର ଏହି ଘଟଣା ଦେଖିଛି, ଯାହାକୁ ନେଇ ବୈଜ୍ଞାନିକମାନେ ଆଶ୍ଚର୍ଯ୍ୟଚକିତ ହୋଇ ଯାଇଛନ୍ତି। କେବଳ ଆଶ୍ଚର୍ଯ୍ୟ ନୁହେଁ, ଏହି ଘଟଣା ସେମାନଙ୍କୁ ଉତ୍ସାହିତ କରିବା ସହ ଚିନ୍ତିତ ମଧ୍ୟ କରିଦେଇଛି। ସୂର୍ଯ୍ୟଙ୍କର ଏହି ଭଙ୍ଗା ଅଂଶ ଏବେ ମଧ୍ୟ ସୂର୍ଯ୍ୟ ଚାରିପାଖରେ ଘୂରି ବୁଲୁଛି। ରିପୋର୍ଟ ମୁତାବକ, ଭଙ୍ଗା ଅଂଶ ସୂର୍ଯ୍ୟଙ୍କ ଉତ୍ତର ଧ୍ରୁବ୍କୁ ଘୂର୍ଣ୍ଣିବାତ୍ୟା ପରି ପରିକ୍ରମା କରୁଛି।
ନାସାର ଜେମ୍ସ ୱେବ୍ ସ୍ପେସ୍ ଟେଲିସ୍କୋପ୍ ଚଳିତ ସପ୍ତାହ ଆରମ୍ଭରେ ସ୍ପେସ୍ ପାଣିପାଗ ବିଶେଷଜ୍ଞ ତାମିଥା ସ୍କୋଭ୍ଙ୍କ ସହିତ ଏହି ଅଦ୍ଭୁତପୂର୍ବ ଆବିଷ୍କାର କରିଛି, ଯେଉଁଥିରେ ତାମିଥା ଅସାଧାରଣ ଦୃଶ୍ୟର ଫୁଟେଜ୍ ସେୟାର କରିଛନ୍ତି। ତାମିଥା ସ୍କୋଭ୍ କହିଛନ୍ତି, ‘ପୋଲାର ଭର୍ଟେକ୍ସ ବିଷୟରେ କଥା ହେବା। ଉତ୍ତର ଭାଗ ପ୍ରମୁଖତାରୁ ଏକ ବଡ଼ ଅଂଶ ମୁଖ୍ୟ ଫିଲାମେଣ୍ଟରୁ ପୃଥକ ହୋଇଛି ଏବଂ ବର୍ତ୍ତମାନ ଆମ ତାରାର ଉତ୍ତର ଧ୍ରୁବ ଚାରି ପାଖରେ ଏକ ବିଶାଳ ଧ୍ରୁବୀୟ ଭର୍ଟେକ୍ସରେ ଏହା ଘୂରି ବୁଲୁଛି। ଏଠାରେ ୫୫ ଡିଗ୍ରୀ ଅକ୍ଷାଂଶରୁ ଅଧିକ ସୂର୍ଯ୍ୟଙ୍କ ବାୟୁମଣ୍ଡଳୀୟ ଗତିଶୀଳତା ବୁଝିବାର ଆବଶ୍ୟକତା ଅଛି’।
Talk about Polar Vortex! Material from a northern prominence just broke away from the main filament & is now circulating in a massive polar vortex around the north pole of our Star. Implications for understanding the Sun’s atmospheric dynamics above 55° here cannot be overstated! pic.twitter.com/1SKhunaXvP
— Dr. Tamitha Skov (@TamithaSkov) February 2, 2023
ପୃଥିବୀ ଉପରେ ପ୍ରଭାବ
Spaceweather.com ଅନୁସାରେ, ଏକ ମଧ୍ୟମ ଆକାରର, ଶକ୍ତିଶାଳୀ ସୌର ଫ୍ଲେୟରରୁ ମଙ୍ଗଳବାର (୭ ଫେବୃଆରୀ) ପ୍ରଶାନ୍ତ ମହାସାଗରରେ ଏକ ସର୍ଟୱେଭ୍ ରେଡିଓ ବ୍ଲାକଆଉଟ୍ ବି ହୋଇଛି। କଲରାଡୋର ବୋଲ୍ଡରରେ ନ୍ୟାସନାଲ ସେଣ୍ଟର ଫର୍ ଆଟମୋସଫେରିକ୍ ରିସର୍ଚ୍ଚର ଜଣେ ଉପ ନିର୍ଦ୍ଦେଶକ ତଥା ସୌର ଭୌତିକ ବିଜ୍ଞାନୀ ସ୍କଟ୍ ମ୍ୟାକ୍ଇଣ୍ଟୋସ୍ ବୁଝାଇଛନ୍ତି ଯେ ପ୍ରତ୍ୟେକ ସୌର ଚକ୍ରରେ ଥରେ ସୂର୍ଯ୍ୟଙ୍କର ୫୫ ଡିଗ୍ରୀ ଅକ୍ଷାଂଶ ସହିତ କିଛି ଅଜବ ଘଟଣା ଘଟିବା ଅସାଧାରଣ ନୁହେଁ। କିନ୍ତୁ ସେ ଏହା ମଧ୍ୟ ସ୍ୱୀକାର କରିଛନ୍ତି ଯେ ସେ ଏହି ଦୃଶ୍ୟ କେବେ ବି ଦେଖି ନ ଥିଲେ।
