ବର୍ଷା ହେବାର ଆଗୁଆ ସୂଚନା ଦେଇଥାଏ ଏହି ମନ୍ଦିର, ଆଜି ବି ରହସ୍ୟମୟ ହୋଇ ରହିଛି ଏହାର କାରଣ
ଉତ୍ତରପ୍ରଦେଶର କାନପୁର ଜିଲ୍ଲାରେ ଏମିତି ଏକ ମନ୍ଦିର ଅଛି, ଯାହାର ଛାତରୁ ଡହ ଡହ ଖରାରେ ବି ପାଣି ପଡିଥାଏ । ବର୍ଷା ଆରମ୍ଭ ହେବା ମାତ୍ରେ ଏହି ପାଣି ପଡିବା ଆପେ ଆପେ ବନ୍ଦ ହୋଇଯାଏ । ଏହି ମନ୍ଦିରଟି ୟୁପିର ଶିଳ୍ପାଞ୍ଚଳ ଭାବେ ଜଣା କାନପୁର ଜିଲ୍ଲାର ଭିତରଗଂଜ ଅଂଚଳ ଠାରୁ ଠିକ ତିନି କିଲୋମିଟର ଦୂରରେ ଅବସ୍ଥିତ ବେହତା ଗାଁରେ ଅବସ୍ଥିତ । ଏହି ପ୍ରାଚୀନ ମନ୍ଦିରରେ ଭଗବାନ ଜଗନ୍ନାଥଙ୍କୁ ପୂଜା କରାଯାଇଥାଏ । ଏହା ପୂର୍ବରୁ ଅନେକ ଥର ଦେଶ ବିଦେଶର ଅନେକ ବୈଜ୍ଞାନିକ ଓ ପ୍ରତ୍ନତତ୍ତ୍ୱବିଦ ମାନେ ରହସ୍ୟମୟ ଭାବରେ ମନ୍ଦିରରୁ ପଡୁଥିବା ପାଣି ବୁନ୍ଦା ବିଷୟରେ ଅନେକ ତର୍ଜମା କରିସାରିଲେଣି । କିନ୍ତୁ ଶତାବ୍ଦୀ ପରେ ଶତାବ୍ଦୀ ବିତିଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ମନ୍ଦିରର ଛାତରୁ ବୁନ୍ଦା ବୁନ୍ଦା ହୋଇ ପାଣି ପଡ଼ିବାର ରହସ୍ୟ କେହି ଜାଣିପାରିନାହାନ୍ତି ।
ଏହି ମନ୍ଦିରର ଇତିହାସ ୫୦୦୦ ବର୍ଷ ପୁରୁଣା । ଶ୍ରୀ ମନ୍ଦିର ପରି ଏହି ମନ୍ଦିରରେ ଭଗବାନ ଜଗନ୍ନାଥ , ବଳଭଦ୍ର ଏବଂ ଭଉଣୀ ସୁଭଦ୍ରାଙ୍କ ସହିତ ବିରାଜମାନ ଅଛନ୍ତି । ଏମାନଙ୍କ ବ୍ୟତୀତ ମନ୍ଦିରରେ ପଦ୍ମନାଭମଙ୍କ ପ୍ରତିମା ମଧ୍ୟ ସ୍ଥାପନ କରାଯାଇଛି । ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ ମନ୍ଦିର ଛାତରୁ ପଡିବା ଦେଖିଲେ ସେମାନେ ସୂଚନା ପାଇଯାଆନ୍ତିକି, ଖୁବ ଶୀଘ୍ର ମୌସୁମୀ ଆସିବାର ଅଛି । ଏହି ପାଣି ବୁନ୍ଦା ହିସାବରେ ହିଁ ବର୍ଷା ହୋଇଥାଏ ବୋଲି ବିଶ୍ୱାସ ରଖାଯାଇଛି । ଯେଉଁବର୍ଷ ମନ୍ଦିର ଚୂଡ଼ାରୁ କମ ବୁନ୍ଦା ପଡିଥାଏ ଜଣାପଡେ ଯେ ଏଥର ବର୍ଷାର ପରିମାଣ କମ ହେବ । ଠିକ ସେମିତି ଯେଉଁ ଥର ବୁନ୍ଦାର ପରିମାଣ ଅଧିକ ରୁହେ ସେଥର ପ୍ରଚୁର ବର୍ଷା ହେବ ବୋଲି ଧରିନିଆଯାଏ । ମନ୍ଦିର ପୁରୋହିତଙ୍କ କହିବା ଅନୁଯାୟୀ ଚଳିତ ବର୍ଷ ବର୍ଷାର ପରିମାଣ କିଛିଟା କମ ଅଛି । ଏଣୁ ଏଥର ବର୍ଷା କମ ହେବାର ସମ୍ଭାବନା ରହିଛି ।
ବର୍ତ୍ତମାନ ସମୟରେ ଏହି ଜଗନ୍ନାଥ ମନ୍ଦିର ପ୍ରତ୍ନତତ୍ତ୍ୱ ବିଭାଗ ଅଧୀନରେ ରହିଛି । ପ୍ରତ୍ନତତ୍ତ୍ୱ ଅଧିକାରୀଙ୍କ କହିବା ଅନୁଯାୟୀ ଏକାଦଶ ଶତାବ୍ଦୀରେ ଏହି ମନ୍ଦିରର ନବୀକରଣ କରାଯାଇଥିଲା । ଓଡ଼ିଶାର ପୁରୀରେ ଯେପରି ଜଗନ୍ନାଥଙ୍କ ରଥଯାତ୍ରା ଅନୁଷ୍ଠିତ ହୋଇଥାଏ ଠିକ ସେହିପରି ଏଠାରେ ମଧ୍ୟ ରଥଯାତ୍ରା ଅନୁଷ୍ଠିତ ହୋଇଥାଏ ।
