କମ୍ ଖର୍ଚ୍ଚରେ ଏହି ମହିଳାଙ୍କ ଭଳି ଲାଭବାନ୍ ହେବାକୁ ଚାହୁଁଛନ୍ତି କି? ଏଭଳି କରନ୍ତୁ ଛତୁ ଚାଷ

ସୁନ୍ଦରଗଡ(କେନ୍ୟୁଜ୍): କମ୍ ଖର୍ଚ୍ଚରେ ଲାଭବାନ୍ ହେବାକୁ ଚାହୁଁଛନ୍ତି କି? ତାହା ପୁଣି ଚାଷ କରି । ତେବେ ସବୁଠାରୁ ଲାଭଦାୟକ ଚାଷ ହେଉଛି ଛତୁ ଚାଷ। କମ୍ ଖର୍ଚ୍ଚରେ କରି ବେଶି ଲାଭ ମିଳିଥାଏ ଏହି ଚାଷରେ । ଛତୁ ଚାଷ କରି ନିଜେ ସ୍ଵାବଲମ୍ଵୀ ହେବା ସହ ଅନ୍ୟ ମାନଙ୍କ ପାଇଁ ସାଜିଛନ୍ତି ଉଦାହରଣ ସାଜିଛନ୍ତି । ସୁନ୍ଦରଗଡ ଜିଲ୍ଲା ଟାଙ୍ଗରପାଲି ଅନ୍ତର୍ଗତ ଫୁଲଧୁଡି ଗାଁର ମହିଳାମାନେ ।

ଛତୁ ଗାଁ କହିଲେ ସମସ୍ତେ ଜାଣନ୍ତି ଫୁଲଧୁଡି ଗାଁକୁ । ଏହି ଗାଁରେ ବସବାସ କରନ୍ତି ପ୍ରାୟ ୬୦ପରିବାର । ବନ ବିଭାଗର ପ୍ରୋତ୍ସାହନରେ ଏ ଗାଁର ୩ ରୁ ୪ ଜଣ ମହିଳା ପ୍ରଥମେ ଛତୁ ଚାଷକୁ ଆପଣେଇ ନେଇଥିଲେ । ଏଥିରୁ ବେଶ ଦୁଇ ପଇସା ରୋଜଗାର କରିବା ପରେ ସେମାନଙ୍କୁ ଦେଖି ଗାଁର ସମସ୍ତ ମହିଳା ଏହି ଚାଷ ପ୍ରତି ଆଗ୍ରହ ଦେଖାଇଲେ । ଏବେ ସେମାନେ ବି ବେଶ ଦୁଇ ପଇସା ରୋଜଗାର କରି ନିଜ ପରିବାରର ପ୍ରତିପୋଷଣ କରିବା ସହ ନିଜ ପିଲାଛୁଆଙ୍କୁ ପାଠ ପଢାଇପାରୁଛନ୍ତି ।

ବାହାରୁ ନଡା ଓ ଛତୁ ମଞ୍ଜି କିଣି ଆଣି ଚାଷ କରିଥାନ୍ତି । ନଡା ଆଣିବା ପରେ ତାକୁ ୧.୫ ଫୁଟ ହିସାବରେ କାଟି ତାକୁ ପାଣିରେ ରଖିଥାନ୍ତି । ପାଣିରୁ ବାହାର କରିବା ପରେ ନଡାକୁ ଥାକ ଥାକ ରଖି ତା ଉପରେ ଛତୁ ମଞ୍ଜି ଦେଇଥାନ୍ତି । ଗୋଟିଏ ଜାଗାରେ ୪ ଥାକ ଦେଇ ତାକୁ ପଲିଥିନ ସାହାଯ୍ୟରେ ୧୨ ଦିନ ପର୍ଯ୍ୟନ୍ତ ଘୋଡେଇ ରଖିଥାନ୍ତି । ୧୨ ରୁ ୧୪ ଦିନ ପରେ ପଲିଥିନକୁ ବାହାର କରି ସେଥିରୁ ଛତୁ ଅମଳ କରିଥାନ୍ତି । ଦିନକରେ ପ୍ରାୟ ୮ ରୁ ୧୦ କେଜି ଅମଳ କରୁଥିବା କହିବା ସହ ଛତୁ ଚାଷ କରି ମାସକୁ ୪୦ ହଜାର ଟଙ୍କା ରୋଜଗାର କରିପାରୁଥିବା କହିଛନ୍ତି ଛତୁ ଚାଷୀ । ଗାଁ ରେ ଛତୁ କିଲୋ ୩୦୦ ଟଙ୍କାରେ ବିକ୍ରି କରୁଥିବା କହିଛନ୍ତି ଛତୁ ଚାଷୀ ।

ପ୍ରଥମେ ଏ ଗାଁ ରେ ଛତୁ ଚାଷ ହେଉନଥିଲା । ୨୦୧୭ ମସିହାରେ ତତକାଳୀନ ବନଖଣ୍ଡ ଅଧିକାରୀ ଅରୁଣ କୁମାର ମିଶ୍ର ନଡା ଓ ମଞ୍ଜି ଆଣି ଛତୁ ଚାଷ କରିବା ପାଇଁ କହିଥିଲେ । ଛତୁ ଚାଷ କରିବା ପାଇଁ ବନ ବିଭାଗ ଓ ଉଦ୍ୟାନ କୃଷି ବିଭାଗର ମିଳିତ ସହଯୋଗରେ ୧୮ ଜଣ ଛତୁ ଚାଷୀଙ୍କୁ ୨ଲକ୍ଷ ଟଙ୍କାରେ ଗୋଟିଏ ଲେଖାଁଏ ଘର ଦିଆଯାଇଛି । ଫଳରେ ଛତୁ ଚାଷ କରି ମହିଳା ମାନେ ବେଶ ଦୁଇ ପଇସା ରୋଜଗାର କରିପାରୁଛନ୍ତି । ଜଣେ ଚାଷୀ ପ୍ରତ୍ୟେକ ଦିନ ହଜାରେ ରୁ ଅଧିକ ଟଙ୍କା ରୋଜଗାର କରୁଥିବା କହିଛନ୍ତି ଓଡିଶା ବନାଞ୍ଚଳ ଉନ୍ନୟନ ପ୍ରକଳ୍ପ କୋଡିନେଟର ।

ଛତୁ ଚାଷ କରି ଚର୍ଚ୍ଚାରେ ଫୁଲଧୁଡି ଗାଁର ମହିଳାମାନେ । ସମାଜ ପାଇଁ ସୃଷ୍ଟି କରିଛନ୍ତି ଅନନ୍ୟ ଉଦାହଣର । ନିଜ ପରିବାରର ମେରୁଦଣ୍ଡକୁ ଆହୁରି ମଜବୁତ କରିବା ସହିତ ସମାଜକୁ ଦେଇଛନ୍ତି ନିଆରା ବାର୍ତ୍ତା ।