ଆପଣ ସିରିୟଲ କିଲରଙ୍କ ବିଷୟରେ ନିଶ୍ଚିତ ଶୁଣିଥିବେ, ଯିଏ ଜଣଙ୍କ ପରେ ଜଣେ ନିର୍ଦ୍ଦୋଷ ଲୋକଙ୍କୁ ହତ୍ୟା କରିଦିଅନ୍ତି। କିନ୍ତୁ କେବେ ଏମିତି ସିରିୟଲ କିଲରଙ୍କ ବିଷୟରେ ଶୁଣିଛନ୍ତି କି, ଯିଏ ମଣିଷ ନୁହେଁ ବରଂ ବିଲେଇମାନଙ୍କୁ ହତ୍ୟା କରୁଥିଲା? ଆଜି ଆମେ ଆପଣଙ୍କୁ ଏହି ସିରିୟଲ କିଲରଙ୍କ ବିଷୟରେ କହିବାକୁ ଯାଉଛୁ।
ଦିନ ଥିଲା, ଯେତେବେଳେ ବ୍ରିଟେନର ବିଭିନ୍ନ ସ୍ଥାନରେ ଏଭଳି ଲୋମଟାଙ୍କୁରା ଘଟଣା ଘଟିଚାଲିଥିଲା। ସିରିୟଲ କିଲର ଜଣକ ପୋଷା ଜୀବଙ୍କୁ ନିଜ ଶିକାର ବନାଉଥିଲା। ଏଥିରେ ମୁଖ୍ୟ ରୂପେ ସାମିଲ ଥିଲେ ପେଚା ଛୁଆ, ଠେକୁଆ ଓ ବିଲେଇ। ତେବେ କିଲର ଜଣକ ପାଖାପାଖି ୪୦୦ରୁ ଅଧିକ ବିଲେଇଙ୍କୁ ହତ୍ୟା କରିଥିଲା। ୨୦୧୪ରେ ଦକ୍ଷିଣ ଲଣ୍ଡନର କ୍ରାୟଡନ୍ ସହରରୁ ଘଟଣା ଆରମ୍ଭ ହୋଇଥିଲା, ଯେଉଁ କାରଣରୁ ମିଡିଆ ଏହି ହତ୍ୟାକୁ ‘କ୍ରାୟଡନ୍ କ୍ୟାଟ୍ ସିରିୟଲ କିଲର’ ନାଁ ଦେଇଥିଲା। ସେଠି ଲୋକେ ଏହାକୁ ‘ଏମ୍-୨୫ କ୍ୟାଟ୍ କିଲର’ ନାଁରେ ଜାଣିଥିଲେ। ପୂରା ବ୍ରିଟେନର ଲୋକ କିଲରଙ୍କ ଆତଙ୍କରେ ଥରହର ହେଉଥିଲେ।
କେତେକ ଖବରରୁ ଜଣାପଡ଼ିଥିଲା ଯେ କିଲର ପ୍ରଥମେ ପୋଷା ଜୀବଙ୍କୁ ଖାଦ୍ୟ ଜିନିଷ ଦେଇ ନିଜ ପାଖକୁ ଡାକୁଥିଲା, ଆଉ ତା’ପରେ କୌଣସି ଧାରୁଆ ଅସ୍ତ୍ରରେ ସେମାନଙ୍କୁ ହତ୍ୟା କରିଦେଉଥିଲା। କେବଳ ଏତିକି ନୁହେଁ, ସେ ମୃତ ଶରୀରକୁ ପୂରା କ୍ଷତ ବିକ୍ଷତ କରିଦେଉଥିଲା, ଯେପରି କାହାକୁ ପ୍ରମାଣ ନ ମିଳିପାରିବ। ତେବେ ପୋଲିସ ଖବର ପାଇ ବିଭିନ୍ନ ସ୍ଥାନରୁ ମୃତ ବିଲେଇଗୁଡ଼ିକୁ ଜବତ କରି ବ୍ୟବଚ୍ଛେଦ କରାଇଥିଲା।
କୁହାଯାଉଛି, ପ୍ରାୟ ୧୦ ବିଲେଇଙ୍କ ପୋଷ୍ଟମର୍ଟମରେ ୭୫୦୦ ପାଉଣ୍ଡ ଅର୍ଥାତ୍ ପାଖାପାଖି ୭ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ପୋଲିସ କିଲରକୁ ଧରିବା ପାଇଁ ୨୦୧୫ରେ ଏକ ଟିମ୍ ବି ଗଠନ କରିଥିଲା, ଯାହାର ନାଁ ରଖାଯାଇଥିଲା ‘ତାକାହେ’। ହତ୍ୟା ସନ୍ଦେହରେ ପୋଲିସ ୩୧ ବର୍ଷର ଜଣେ ବ୍ୟକ୍ତିଙ୍କୁ ଧରିଥିଲା, କିନ୍ତୁ ପ୍ରମାଣ ଅଭାବରୁ ତାଙ୍କୁ ଛାଡ଼ିଦେଇଥିଲା।
୨୦୧୮ରେ ମେଟ୍ରୋପଲିଟନ ପୋଲିସ ମାମଲାଟିକୁ ବନ୍ଦ କରିଦେଇଥିଲା। ଆଉ କହିଥିଲା, ପୋଷା ଜୀବ ବିଶେଷ କରି ବିଲେଇଙ୍କ ମୃତ୍ୟୁ କୌଣସି ସଡ଼କ ଦୁର୍ଘଟଣା କିମ୍ବା ଜଙ୍ଗଲି ଜନ୍ତୁଙ୍କ ଆକ୍ରମଣରେ ହୋଇଛି। କିନ୍ତୁ ଲୋକେ ଏହାକୁ ମାନିବାକୁ ପ୍ରସ୍ତୁତ ନ ଥିଲେ। ତେବେ ପୋଲିସ ଆଜି ପଯ୍ୟର୍ନ୍ତ ବି ପତ୍ତା ଲଗେଇ ପାରିନାହିଁ ଯେ ଏହି ହତ୍ୟା ପଛରେ କିଏ ଜଡ଼ିତ ଥିଲା।