ପିଠିରେ ଉପହାର ପେଡ଼ି, ମୁହଁରେ ଲମ୍ବା ଦାଢ଼ି, ବଡ଼ଦିନରେ କାହିଁକି ଆସନ୍ତି ସାଣ୍ଟା… କିଏ ଏହି ସାଣ୍ଟା କ୍ଲଜ୍?
ଶାନ୍ତି, ପ୍ରେମ ଓ ଖୁସିର ବାର୍ତ୍ତା ନେଇ ପ୍ରତିବର୍ଷ ୨୫ ଡିସେମ୍ବରରେ ମେରୀ ଖ୍ରୀଷ୍ଟମାସ ପାଳନ କରାଯାଏ । ପ୍ରତିବର୍ଷ ପ୍ରଭୁ ଯୀଶୁଙ୍କ ଜନ୍ମଦିନରେ ସାଣ୍ଟା କ୍ଲଜ୍ ମଧ୍ୟ ଖୁସି ବଣ୍ଟନ କରନ୍ତି ଏବଂ ପିଲାମାନଙ୍କୁ ଉପହାର ଦିଅନ୍ତି ।ଲମ୍ବା ଧଳା ଦାଢ଼ି , ନାଲି ପୋଷାକ, ହାତରେ ଜିଙ୍ଗଲ୍ସ ବେଲ୍ ଏବଂ ପିଠିରେ ଏକ ଉପହାର ପେଡ଼ି ପକାଇ ଆସନ୍ତି ସାଣ୍ଟା କ୍ଲଜ୍ । ପୁଣି ଥରେ ଖ୍ରୀଷ୍ଟମାସ ଗଛକୁ ସଜାଯିବ, ଜିଙ୍ଗଲ୍ସ ଘଣ୍ଟିର ଶବ୍ଦ ଶୁଭିବ ଏବଂ ତା’ପରେ ହେବ ଉପହାରର ବର୍ଷା ।ଖ୍ରୀଷ୍ଟମାସର ନାମ ନେବା ମାତ୍ରେ ସାଣ୍ଟା କ୍ଲଜ୍ ଏପରି ଚିତ୍ର ଆମ ମନକୁ ଆସେ । ତେବେ ବାସ୍ତବରେ ଏହି ସାଣ୍ଟା କ୍ଲଜ୍ କିଏ ? ସେ କେଉଁଠାରେ ରୁହନ୍ତି? ସେ କ’ଣ ଆଜି ବି ପିଲାଙ୍କୁ ଉପହାର ଦିଅନ୍ତି କି? ପିଲାମାନେ କାହିଁକି ଖ୍ରୀଷ୍ଟମାସରେ ସାଣ୍ଟାକୁ ଅପେକ୍ଷା କରନ୍ତି? ଏଭଳି ପ୍ରଶ୍ନ ସବୁବେଳେ ମନକୁ ଆନ୍ଦୋଳିତ କରିଥାଏ । ସାଣ୍ଟାଙ୍କ ପରି ତାଙ୍କ ଇତିହାସ ମଧ୍ୟ ବହୁତ ଅଦ୍ଭୁତ ଅଟେ।
ସାଣ୍ଟାଙ୍କ ଅସଲ ନାମ ସେଣ୍ଟ୍ ନିକୋଲାସ୍। ତୁର୍କସ୍ତାନର ମିୟରା ସହରରେ ପ୍ରଭୁ ଯୀଶୁଙ୍କ ମୃତ୍ୟୁ ପରେ ସେଣ୍ଟ୍ ନିକୋଲାସ୍୨୮୦ ବର୍ଷ ପରେ ଜନ୍ମ ହୋଇଥିଲେ । ସେ ଜଣେ ସମ୍ଭ୍ରାନ୍ତ ପରିବାରର ଥିଲେ। ବଡ ହେବା ପରେ ସେ ଏକ ଗୀର୍ଜାରେ ପାଦ୍ରି ହୋଇଗଲେ । ସେ ସବୁବେଳେ ଗରିବ ଲୋକଙ୍କୁ ସାହାଯ୍ୟ କରିବାକୁ ପ୍ରସ୍ତୁତ ଥିଲେ। ପ୍ରଭୁ ଯୀଶୁଙ୍କ ଉପରେ ତାଙ୍କର ଗଭୀର ବିଶ୍ୱାସ ଥିଲା, ଯେଉଁଥିପାଇଁ ସେ ଜଣେ ପାଳକ ହୋଇଥିଲେ । ଗରିବ ଲୋକଙ୍କୁ ସାହାଯ୍ୟ କରିବା ଏବଂ ଛୋଟ ପିଲାଙ୍କୁ ଉପହାର ଦେବା ତାଙ୍କୁ ବହୁତ ଭଲ ଲାଗୁଥିଲା । ଦୟାଳୁ ପ୍ରବୃତିର ସେଣ୍ଟ୍ ନିକୋଲାସ୍ ଏହି ମହତ୍ କାମ କାହାରିକୁ ନ ଜଣାଇ କରୁଥିଲେ । ପିଲାମାନଙ୍କୁ ଉପହାର ମଧ୍ୟ ସେ ରାତିର ଅନ୍ଧକାରରେ ଦେବାକୁ ଆସୁଥିଲେ । ଏପରି କାର୍ଯ୍ୟ ଦେଖି ପରେ ତାଙ୍କୁ ସାଧୁର ଆଖ୍ୟା ଦିଆଗଲା । ତାଙ୍କୁ ସେଣ୍ଟ ନିକୋଲାସ, କ୍ରିସ କ୍ରିଙ୍ଗଲେ, ଖ୍ରୀଷ୍ଟମାସ ଫାଦରଙ୍କ ନାମରେ ତାଙ୍କୁ ମଧ୍ୟ ଡକାଯାଉଥିଲା ।
କୁହାଯାଏ ଯେ ସେଣ୍ଟ୍ ନିକୋଲାସ୍ ଚାହୁଁଥିଲେ ଖ୍ରୀଷ୍ଟମାସ ଦିନ ସମସ୍ତଙ୍କ ମୁଁହରେ ହସ ଫୁଟୁ । କେହି ଯେପରି ଦୁଃଖିତ ନରୁହନ୍ତୁ । ଏହି କାରଣରୁ, ପ୍ରତ୍ୟେକ ଖ୍ରୀଷ୍ଟମାସ ରାତିରେ ସେ ପିଲାମାନଙ୍କୁ ଉପହାର, ଚକୋଲେଟ୍ ବଣ୍ଟନ କରୁଥିଲେ । ରାତିରେ ଉପହାର ଦେବାର ଉଦ୍ଦେଶ୍ୟ ଥିଲା ଯେ କେହି ଯେପରି ତାଙ୍କୁ ନ ଦେଖନ୍ତୁ କି ଚିହ୍ନି ନପାରନ୍ତୁ । ତାଙ୍କ ବିଷୟରେ ଏକ ଘଟଣା ଉଲ୍ଲେଖ ରହିଛି , ଯେଉଁଥିରେ ବର୍ଣ୍ଣନା କରାଯାଇଛି ଯେ ଜଣେ ବ୍ୟକ୍ତି ଦରିଦ୍ରତା ହେତୁ ନିଜର ତିନି ଝିଅଙ୍କୁ ଦେହ ବେପାର କରିବା ପାଇଁ ବାଧ୍ୟ କରୁଥିଲେ । ଯେତେବେଳେ ସେଣ୍ଟ୍ ନିକୋଲାସ୍ ଏହି ବିଷୟରେ ଜାଣିଲେ, ସେ ମଧ୍ୟରାତ୍ରିରେ ତାଙ୍କ ଘର ବାହାରେ ଯାଇ ସକ୍ସ ଭିତରେ ସୁନା ମୁଦ୍ରା ନେଇ ସେଠାକୁ ଟାଙ୍ଗିଦେଇ ଆସିଲେ । ଏହା ପରେ ସୁନା ମୁଦ୍ରା ପାଇ ସେହି ପରିବାରର ଜୀବନ ବଦଳିଗଲା।
ଆଜି ବି ପିଲାମାଙ୍କୁ ସାଣ୍ଟା କ୍ଲଜ୍ ରାତିରେ ଆସି ସେମାନଙ୍କୁ ଉପହାର ଦେବ ବୋଲି କହିଲେ ସେମାନେ ଶୀଘ୍ର ଶୋଇଯାନ୍ତି। ପିଲାମାନେ ସେମାନଙ୍କର ଇଚ୍ଛା ପୂରଣ କରିବା ପାଇଁ ଆଜି ବି ଘର ବାହାରେ ସକ୍ସ ଟାଙ୍ଗନ୍ତି, ଯାହାଫଳରେ ସାଣ୍ଟା କ୍ଲଜ୍ ସେମାନଙ୍କର ଇଚ୍ଛା ପୂରଣ କରିବେ ବୋଲି ଭାବିଥାନ୍ତି ।
ନିଶ୍ଚିତ ଭାବରେ, ବର୍ତ୍ତମାନ ଆଜି ଆମେ ଯେଉଁଭଳି ଭାବରେ ସାଣ୍ଟାଙ୍କୁ ଦେଖୁଛେ ତାଙ୍କର ରୂପ ହୁଏତ ପ୍ରଥମ ଦିନରେ ଏହିପରି ନଥିଲା ।ତେବେ ସମସ୍ତଙ୍କ ମନରେ ପ୍ରଶ୍ନ ଉଠେ ଯେ ଲାଲ ଏବଂ ଧଳା ରଙ୍ଗର ଲମ୍ବା ଦାଢ଼ି ତା ସହିତ ଧଳା କେଶ ଥିବା ସାଣ୍ଟାଙ୍କର ଏହି ଚିତ୍ର କେଉଁଠୁ ଆସିଲା? ବାସ୍ତବରେ, ୧୮୨୨ ଖ୍ରୀଷ୍ଟାବ୍ଦରେ, ଖ୍ରୀଷ୍ଟମାସ ପୂର୍ବରୁ କ୍ଲେମେଣ୍ଟ ମୋର୍ ର ନାଇଟ୍ ରେ ମୁଦ୍ରିତ ସାଣ୍ଟାର କାର୍ଟୁନ୍ ବିଶ୍ଵର ଦୃଷ୍ଟି ଆକର୍ଷଣ କରିଥିଲା । ଥାମାସ୍ ନେଷ୍ଟ ନାମକ ଜଣେ ରାଜନୈତିକ କାର୍ଟୁନିଷ୍ଟ ହାରପର୍ ସାପ୍ତାହିକ ପାଇଁ ଏକ ଚିତ୍ରନାଟ୍ୟ ସୃଷ୍ଟି କରିଥିଲେ, ଯେଉଁଥିରେ ଧଳା ଦାଢ଼ି ସାଣ୍ଟା କ୍ଲଜ୍ ଲୋକପ୍ରିୟ ବ୍ୟକ୍ତିତ୍ୱ ହୋଇଥିଲେ ।ଧିରେ ଧିରେ ବିଭିନ୍ନ ବ୍ରାଣ୍ଡର ପ୍ରଚାର ପାଇଁ ସାଣ୍ଟାର ଏହି ରୂପ ବ୍ୟବହୃତ ହେଲା । ବର୍ତ୍ତମାନ ଆମେ ଦେଖୁଥିବା ସାଣ୍ଟା ୧୯୩୦ ରେ ସୃଷ୍ଟି ହୋଇଥିଲା । ହେଡେନ ସ୍ୟାଣ୍ଡବ୍ଲୋମ ନାମକ ଜଣେ କଳାକାର ୩୫ ବର୍ଷ ପାଇଁ (୧୯୩୧ ରୁ ୧୯୬୪ ପର୍ଯ୍ୟନ୍ତ) ସାଣ୍ଟା ଭାବରେ କୋକା-କୋଲା ବିଜ୍ଞାପନରେ ଦେଖାଦେଇଥିଲେ । ସାଣ୍ଟାର ଏହି ନୂତନ ଅବତାରକୁ ଲୋକମାନେ ପସନ୍ଦ କରିଥିଲେ ଏବଂ ଶେଷରେ ଏହାକୁ ସାଣ୍ଟାଙ୍କର ନୂତନ ରୂପ ଭାବରେ ଗ୍ରହଣ କରାଯାଇଥିଲା, ଯାହା ଆଜି ପର୍ଯ୍ୟନ୍ତ ଲୋକଙ୍କ ମଧ୍ୟରେ ବହୁତ ପ୍ରସିଦ୍ଧ। ତେବେ ପ୍ରଭୁ ଯୀଶୁଙ୍କ ଅତି ଆଦରର ପାଦ୍ରି ସାଣ୍ଟା ପିଲାମାନଙ୍କ ପାଇଁ ମଧ୍ୟ ଅତି ନିଜର ଆଉ ଆଦରଣୀୟ ।
