ଅନ୍ତିମ ପର୍ଯ୍ୟାୟରେ ବିଶ୍ୱକପ୍ କ୍ରିକେଟର ରାଉଣ୍ଡ ରବିନ୍ ମ୍ୟାଚ୍। ଆଜି ଖେଳାଯିବ ଲିଗ୍ ପର୍ଯ୍ୟାୟର ଶେଷ ଦୁଇଟି ମ୍ୟାଚ୍। ଅପରାହ୍ନ ୩ଟାରେ ହେଡିଂଲେରେ ମୁହାଁମୁହିଁ ହେବେ ଭାରତ-ଶ୍ରୀଲଙ୍କା। ସଂଧ୍ୟା ୬ଟାରେ ମଞ୍ଚେଷ୍ଟରରେ ଅଷ୍ଟ୍ରେଲିଆ-ଦକ୍ଷିଣ ଆଫ୍ରିକା ମଧ୍ୟରେ ଲଢ଼େଇ ରହିଛି। ଏହି ଦୁଇଟି ମ୍ୟାଚ୍ ଶ୍ରୀଲଙ୍କା ଓ ଦକ୍ଷିଣ ଆଫ୍ରିକା ପାଇଁ କୌଣସି ଗୁରୁତ୍ୱ ରଖୁ ନଥିବା ବେଳେ ଇଣ୍ଡିଆ-ଅଷ୍ଟ୍ରେଲିଆର ବିଜୟ ଓ ପରାଜୟ ନିର୍ଣ୍ଣୟ କରିବ ସେମି ଫାଇନାଲ୍ ଲାଇନ୍ ଅପ୍।
ଏପର୍ଯ୍ୟାନ୍ତ ୮ଟି ମ୍ୟାଚରୁ ୬ଟି ବିଜୟ ଓ ଗୋଟିଏ ପରାଜୟ ସହ ଟିମ୍ ଇଣ୍ଡିଆ ୧୩ ପଏଣ୍ଟ ସହ ତାଲିକାର ଦୁଇ ନମ୍ବର ସ୍ଥାନରେ ରହିଛି। ଉଭୟ ବ୍ୟାଟିଂ ଓ ବୋଲିଂରେ ଶକ୍ତିଶାଳୀ ଟିମ୍ ଇଣ୍ଡିଆ ପାଇଁ କେବଳ ଟେନସନ୍ ମିଡିଲ୍ ଅର୍ଡର। ସେମି ଫାଇନାଲ୍ ଲଢ଼େଇ ପୂର୍ବରୁ ପୂର୍ବ ତ୍ରୁଟି ସୁଧାରି ମୈଦାନକୁ ଓହ୍ଲାଇବ ମେନ୍ ଇନ୍ ବ୍ଲୁ।
ସେପଟେ ଶ୍ରୀଲଙ୍କା ପୂର୍ବରୁ ସେମି ରେସରୁ ବାଦ ପଡିଥିବାରୁ ଆଜିର ମ୍ୟାଚ ଜିତି ଦଳ ବିଶ୍ୱକପ୍ ଅଭିଯାନରୁ ବିଦାୟ ନେବାକୁ ଚାହିଁବ। ପୂର୍ବ ମ୍ୟାଚରେ ୱେଷ୍ଟଇଣ୍ଡିଜକୁ ହରାଇଥିବାରୁ ସିଂହଳୀ ଦଳର ମନୋବଳ ଦୃଢ଼ ରହିଛି। ଏପର୍ଯ୍ୟନ୍ତ ଭାରତ-ଶ୍ରୀଲଙ୍କା ଖେଳିଥିବା ୧୫୮ ଦିନିକିଆରୁ ଟିମ୍ ଇଣ୍ଡିଆ ୯୦ଟି ଜିତିଥିବା ବେଳେ ଶ୍ରୀଲଙ୍କା ୫୬ଟି ମ୍ୟାଚ୍ ବିଜୟୀ ହୋଇଛି। ସେହିପରି ବିଶ୍ୱକପରେ ୮ଥର ମୁହାଁମୁହିଁ ହୋଇଥିବା ବେଳେ ଭାରତ ୩ଟି ଶ୍ରୀଲଙ୍କା ୪ଟିରେ ବାଜି ମାରିଛି। ବିନା ଫଳାଫଳରେ ଶେଷ ହୋଇଛି ଗୋଟିଏ ମ୍ୟାଚ୍।