ଭୁବନେଶ୍ବର: ପୋଲିସ ବାବୁଙ୍କ ପୁଅ ନାମରେ ନବବଧୂ ହତ୍ୟା ଅଭିଯୋଗ, ଯୌତୁକ ପାଇଁ ମାରି ଦିଆଯାଇଥିବାର ଅଭିଯୋଗ ଆଣି ଝିଅର ମା
କେନ୍ୟୁଜ୍(ବ୍ୟୁରୋ): ପୋଲିସ ବାବୁଙ୍କ ନାମରେ ନବବଧୂ ହତ୍ୟା ଅଭିଯୋଗ । ଖୋଦ୍ କନ୍ୟାପକ୍ଷର ଲୋକ ଏହି ଅଭିଯୋଗ ଆଣି ତମାଣ୍ଡୋ ଥାନାରେ ଏତଲା ଦେଇଛନ୍ତି। ମିଳିଥିବା ସୂଚନା ମୁତାବକ ଅବସରପ୍ରାପ୍ତ ପୋଲିସ କର୍ମଚାରୀ ବିଜୟ କୁମାର ଗୋଚ୍ଛାୟତଙ୍କ ପୁଅ ଯାମିନୀ ଗୋଚ୍ଛାୟତଙ୍କର ଗତ ଫେବୃଆରୀ ମାସ ୧୬ ତାରିଖରେ ଭୁବନେଶ୍ବରର ବନ୍ଦନା ଜେନାଙ୍କ ସହ ବିବାହ ହୋଇଥିଲା। କିନ୍ତୁ ବିବାହ ପରେ ଯାମିନୀଙ୍କ ପରିବାର ଲୋକେ ଅଧିକ ଯୌତୁକ ଦାବି କରି ନିର୍ଯ୍ୟାତନା ଦେଇ ଆସୁଥିଲେ ବୋଲି ବନ୍ଦନାଙ୍କ ମା ଅଭିଯୋଗ ଆଣିଛନ୍ତି।
ବନ୍ଦନାଙ୍କ ମାଙ୍କ କହିବା ମୁତାବକ ଗତ ଶୁକ୍ରବାର ରାତିରେ ବନ୍ଦନା ଓ ତାଙ୍କ ସ୍ବାମୀଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ହୋଇଥିଲା ପରେ ଝିଅ ବେହୋସ ହୋଇଯାଇଛି ଓ ତାଙ୍କୁ କ୍ୟାପିଟାଲ ହସ୍ପିଟାଲ ନେଉଛି ବୋଲି ଯାମିନୀ ଫୋନ ଯୋଗେ କହିଥିଲେ। ପରେ ମେଡିକାଲ ଯାଇ ଦେଖିବା ବେଳକୁ ବନ୍ଦନଙ୍କ ମୃତ୍ୟୁ ହୋଇଛି ବୋଲି ଯାମିନୀଙ୍କ ପରିବାର ଲୋକେ କହିଥିଲେ। ଏହାକୁ ନେଇ ଝିଅକୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ବନ୍ଦନାଙ୍କ ମାଆ । ଏହି ଘଟଣାରେ ତାମାଣ୍ଡୋ ପୋଲିସ ମାମଲା ରୁଜୁ କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି।
