ଚିକିତ୍ସା ଅବହେଳାରୁ ଛାତ୍ରୀଙ୍କ ମୃତ୍ୟୁକୁ ନେଇ ତୁମୁଳକାଣ୍ଡ, ମେଡିକାଲ୍ ସୁପରିଟେଣ୍ଡେଣ୍ଟଙ୍କୁ ମାଡ଼ ମାରି ପୋଷାକ ଚିରିଲେ ରୋଗୀ ସମ୍ପର୍କୀୟ
ବାରିପଦା : କେତେବେଳେ ସେ ଦ୍ୱିତୀୟ ଭଗବାନ ତ ପୁଣି କେତେବେଳେ ଶଇତାନ୍ । ଆମ ରାଜ୍ୟରେ ଏଭଳି ଭାବେ ଡାକ୍ତରଙ୍କ ସ୍ଥିତି । ରୋଗୀଟି ମରିଗଲେ ଯଦି କେଉଁଠି କିଛି ତ୍ରୁଟି ବିଚ୍ୟୁତି ରହିଲା ତେବେ ଦୋଷ ହେଉଛି ଡାକ୍ତରଙ୍କର । କେତେବେଳେ ଭୁଲ ଥାଏ କେତେବେଳେ ନଥାଏ । ହେଲେ ଆବେଗ ଓ ଆକ୍ରୋଶରେ ରୋଗୀ ସମ୍ପର୍କୀୟ ରାଗ ଶୁଝାନ୍ତି ଡାକ୍ତରଙ୍କ ଉପରେ । ଏମିତି ଏକ ଘଟଣା ଘଟି ଯାଇଛି ବାରିପଦା ସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜରେ । ଚିକିତ୍ସା ଅବହେଳାରୁ ଛାତ୍ରୀଙ୍କ ମୃତ୍ୟୁ ନେଇ ତୁମୁଳକାଣ୍ଡ । ଗତକାଲି ବାରିପଦା ପିଆର୍ଏମ୍ ମେଡିକାଲରେ ଏହି ଉତ୍ତେଜନା ପ୍ରକାଶ ପାଇଥିଲା। କର୍ତ୍ତବ୍ୟରେ ଅବହେଳା କରିଥିବା ଡାକ୍ତରଖାନା କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଓ ଉପଯୁକ୍ତ କ୍ଷତିପୂରଣ ଦାବିରେ ମୃତ ଛାତ୍ରୀଙ୍କ ପରିବାର ଲୋକେ ହସ୍ପିଟାଲ ମୁଖ୍ୟ ଫାଟକ ସମ୍ମୁଖରେ ଶବ ରଖି ସକାଳୁ ଧାରଣାରେ ବସିଥିଲେ। କଥା ଏତିକିରେ ଅଟକି ନଥିଲା। ବୁଝାସୁଝା କରିବାକୁ ଆସିଥିବା ମେଡିକାଲ୍ ସୁପରିଟେଣ୍ଡେଣ୍ଟଙ୍କୁ ଟଣାଓଟରା କରିବା ସହ ମାଡ଼ ମାରି ତାଙ୍କ ପୋଷାକ ଚିରି ଦେଇଥିଲେ।
ଅଭିଯୋଗ ଅନୁଯାୟୀ, ଗତ ମାସ ୩୧ ତାରିଖରେ ଶାମାଖୁଣ୍ଟା ବ୍ଲକ୍ ରଙ୍ଗମାଟିଆ ବନଭୂମି କଲେଜର ଯୁକ୍ତ ୨ କଳା ଦ୍ବିତୀୟ ବର୍ଷ ଛାତ୍ରୀ ସପନଚୁଆ ଗ୍ରାମର ସୁନାରାମ ପାତ୍ରଙ୍କ ୧୭ବଷିୟା ଝିଅ ସୁପ୍ରିୟା ପିଆର୍ଏମ୍ରେ ଭର୍ତ୍ତି ହୋଇଥିଲେ। ସେ ଥାଲାସେମିଆ ରୋଗରେ ପୀଡ଼ିତ ଥିଲେ। ହେଲେ ତାଙ୍କୁ ତୁରନ୍ତ ଚିକିତ୍ସା ଯୋଗାଇ ଦିଆଯାଇନଥିଲା। ଦାୟିତ୍ବରେ ଥିବା ଡାକ୍ତର ରକ୍ତ ଦେବାର କୌଣସି ବ୍ୟବସ୍ଥା ନ କରିବାରୁ ଗୁରୁତର ହୋଇ ପଡ଼ିଥିଲେ ସୁପ୍ରିୟା। ପରିବାର ଲୋକେ ଡାକ୍ତରଙ୍କୁ ଡାକିବାରୁ ନର୍ସ ଆସି ଏକ ଇଞ୍ଜେକସନ୍ ଦେଇଥିଲେ। ଏହି ସମୟରେ ସୁପ୍ରିୟାଙ୍କ ମୃତ୍ୟୁ ହୋଇଥିଲା। ଯଦି ଠିକ୍ ସମୟରେ ଉପଯୁକ୍ତ ଚିକିତ୍ସା ବ୍ୟବସ୍ଥା କରାଯାଇଥାନ୍ତା ତେବେ ତାଙ୍କ ଝିଅର ମୃତ୍ୟୁ ହୋଇନଥାନ୍ତା ବୋଲି ବାପା ସୁନାରାମ, ମା ଲକ୍ଷ୍ମୀ ଓ ଜେଜେ ଗୋସେଇଁ ପାତ୍ର ଅଭିଯୋଗ ଆଣି ଡାକ୍ତରଖାନା ଫାଟକ ସମ୍ମୁଖରେ ଶବ ରଖି ଧାରଣାରେ ବସିଥିଲେ। ସକାଳୁ ପରିବାର ଲୋକେ ଧାରଣାରେ ବସିଥିବା ବେଳେ ମଧ୍ୟାହ୍ନରେ ସେମାନଙ୍କ ସହ ଆଲୋଚନା କରିଥିଲେ ମେଡିକାଲ୍ ସୁପରିଟେଣ୍ଡେଣ୍ଟ ବୈକୁଣ୍ଠନାଥ ମହାପାତ୍ର। ଏତିକି ବେଳେ ମୃତକଙ୍କ ପରିବାରକୁ ସମର୍ଥନ କରି ଜିଲ୍ଲା କଂଗ୍ରେସର କର୍ମକର୍ତ୍ତାମାନେ ସେଠାରେ ପହଞ୍ଚିଥିଲେ। ଫଳରେ ଉତ୍ତେଜନା ବଢ଼ିଥିଲା।
ସୁପ୍ରିୟାଙ୍କୁ ଚିକିତ୍ସା କରୁଥିବା ଡାକ୍ତର ଓ ନର୍ସମାନଙ୍କୁ ଘଟଣାସ୍ଥଳକୁ ଡାକିବା ଲାଗି ସୁପରିଟେଣ୍ଡେଣ୍ଟଙ୍କ ନିକଟରେ ଅଡ଼ି ବସିଥିଲେ ମୃତକଙ୍କ ପରିବାର। ଏହି ସମୟରେ ଉତ୍ତ୍ୟକ୍ତ ଲୋକେ ସୁପରିଟେଣ୍ଡେଣ୍ଟଙ୍କୁ ଟଣାଓଟରା କରିବା ସହ ମାଡ଼ ମାରି ତାଙ୍କ ପୋଷାକ ଚିରି ପକାଇଥିଲେ। ଖବର ପାଇ ବାରିପଦା ତହସିଲଦାର, ବାରିପଦା ସଦର ଏସ୍ଡିପିଓ ଓ ବାରିପଦା ଟାଉନ ଥାନା ଅଧିକାରୀ ଦାୟିତ୍ବରେ ଥିବା ଆଇଆଇସି ଘଟଣାସ୍ଥଳରେ ପହଞ୍ଚି ସୁପରିଟେଣ୍ଡେଣ୍ଟଙ୍କୁ ଉଦ୍ଧାର କରିବା ସହ ଲୋକଙ୍କୁ ବୁଝାସୁଝା କରିଥିଲେ। ମୃତକଙ୍କ ପରିବାରକୁ ରେଡ୍କ୍ରସ୍ ପାଣ୍ଠିରୁ ୧୦ ହଜାର ଓ ହରିଶ୍ଚନ୍ଦ୍ର ଯୋଜନାରୁ ୨ ହଜାର ଟଙ୍କା ତତ୍କାଳ ଦିଆଯାଇଛି। ଅନ୍ୟପକ୍ଷରେ ୧୫ ଦିନ ମଧ୍ୟରେ ଘଟଣାର ତଦନ୍ତ କରି ପଦକ୍ଷେପ ନେବାକୁ ସୁପରିଟେଣ୍ଡେଣ୍ଟ ଡ. ମହାପାତ୍ର ପ୍ରତିଶ୍ରୁତି ଦେବା ପରେ ସ୍ଥିତି ସ୍ବାଭାବିକ ହୋଇଥିଲା।
