ବ୍ରହ୍ମପୁର(କେନ୍ୟୁଜ୍): ଗଞ୍ଜାମ ଜିଲ୍ଲା କୁକୁଡ଼ାଖଣ୍ଡି ବ୍ଲକ ଅନ୍ତର୍ଗତ ଗୁରୁଣ୍ଠି ଗାଁରେ ବେଆଇନ ଭାବେ ଚାଲିଥିବା ଏକ ଗୁଟଖା କାରଖାନା ଉପରେ ଚଢାଉ କରିଛି ଜିଲ୍ଲା ପ୍ରଶାସନ । ଏହି ବେଆଇନ ଗୁଟଖା କାରଖାନା ଦୀର୍ଘ ଦିନ ହେଲା ଚାଲିଥିବା ବେଳେ କୌଣସି ସୂତ୍ରରୁ ଖବର ପାଇ ଆଜି ବ୍ରହ୍ମପୁର ଉପ- ଜିଲ୍ଲାପାଳ ଅଚାନକ୍ ଚଢାଉ କରିଥିଲେ । ଚାରୋଟି ମେସିନ ସହ ଏକ ହଜାର କିଲୋଗ୍ରାମର ଗୁଟଖା ଓ ଗୁଟଖା ତିଆରି ସାମଗ୍ରୀ ଜବତ କରିଛନ୍ତି । ଏହାର ଆନୁମାନିକ ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା ହେବ ।
ତେବେ ଏଠାରେ କେତେ ଦିନ ହେଲା ଏହି ବେଆଇନ କାରଖାନା ଚାଲିଥିଲା ଓ ଏଥିରେ କେଉଁ ମାନଙ୍କ ସଂପୃକ୍ତି ରହିଛି ସେନେଇ ତଦନ୍ତ ଜାରି ରହିଥିବା ଜଣାପଡିଛି ।
ସେହିଭଳି ହୁଗୁଳାପଟାଠାରେ ଥିବା ଅନ୍ୟ ଏକ ବେଆଇନ ଗୁଟଖା କାରଖାନା ଉପରେ ମଧ୍ୟ ଚଢାଉ କରି ପ୍ରାୟ ଏକ କୋଟି ଟଙ୍କାର ଗୁଟଖା ସହିତ ମେସିନ ଓ ଗୁଟଖା ତିଆରି ସାମଗ୍ରୀ ଜବତ କରିଛି ଜିଲ୍ଲା ପ୍ରଶାସନ ।