କରୋନା ଭାଇରସ ଧୀରେ ଧୀରେ ସାରା ବିଶ୍ୱକୁ ନିଜ କବ୍ଜାକୁ ନେଇସାରିଲାଣି। ପ୍ରତିଦିନ ଏହି ମାରାତ୍ମକ ଭାଇରସ ଯୋଗୁ ହଜାର ହଜାର ଲୋକଙ୍କ ଜୀବନ ଯାଉଛି। ମାତ୍ର ଏଭଳି ଘଡିସନ୍ଧି ମୁହୂର୍ତ୍ତରେ ଡାକ୍ତର ଓ ନର୍ସମାନେ ନିଜ ଜୀବନକୁ ବାଜି ଲଗାଇ ଲୋକଙ୍କ ସେବାରେ ଲାଗିପଡିଛନ୍ତି। କିନ୍ତୁ ଏବେ ବି କିଛି ଲୋକ ଡାକ୍ତର ଓ ନର୍ସଙ୍କୁ ସେମାନଙ୍କ କାମ ପାଇଁ ସମ୍ମାନ ଦେବା ପରିବର୍ତ୍ତେ ଦୁର୍ବ୍ୟବହାର କରୁଥିବା ଦେଖାଯାଇଛି। ଏଭଳି ଘଟଣା ଆଉ କୋଉଠି ନୁହେଁ ଆମ ରାଜ୍ୟ ଓଡ଼ିଶାରେ ଘଟିଛି।
ରିପୋର୍ଟ ମୁତାବକ ଭୁବନେଶ୍ୱରର ଏକ ହସ୍ପିଟାଲରେ କାମ କରୁଥିବା ୨ ଜଣ ନର୍ସଙ୍କୁ ଘରମାଲିକ ଘରୁ ତଡିଦେଇଥିବା ଜଣାଯାଇଛି। ମହିଳା ନର୍ସ ଦ୍ବୟ ଏକ ପ୍ରାଇଭେଟ ମେଡିକାଲରେ କାମ କରୁଥିବାରୁ କରୋନା ସଂକ୍ରମଣ ହେବା ଭୟରେ ଘର ମାଲିକ ତାଙ୍କୁ ଘରୁ ବାହାରିଯିବାକୁ କହିଥିଲେ। ଫଳରେ କିଛି ବାଟ ନ ପାଇ ନର୍ସ ଦୁଇଜଣ ଆଉ ଜଣଙ୍କ ଘରେ ଆଶ୍ରୟ ନେଇଛନ୍ତି।
ଏନେଇ ଜଣାପଡ଼ିବା ପରେ ଓଡ଼ିଶା ସରକାରଙ୍କ କୋଭିଡ-୧୯ର ପ୍ରବକ୍ତା ସୁବ୍ରତୋ ବାଗଚି ଚିନ୍ତା ବ୍ୟକ୍ତ କରି କହିଛନ୍ତି ଯେ କରୋନା ଯୋଗୁ ଲୋକମାନେ ଲକଡାଉନ ଅଛନ୍ତି, ଦୟା କରି ମାନବତାକୁ ଲକଡାଉନ କରନ୍ତୁ ନାହିଁ। ସୂଚନାଯୋଗ୍ୟ ଯେ ମୁଖ୍ୟମନ୍ତ୍ରୀ ମଧ୍ୟ କିଛି ଦିନ ତଳେ ଘରମାଲିକଙ୍କୁ ୩ ମାସର ଭଡ଼ା ଛାଡ଼ କରିବାକୁ କିମ୍ବା ପଛରେ ମାଗିବାକୁ ଅନୁରୋଧ କରିଥିଲେ।
It is time for everyone to be there for each other as the entire country is under lockdown & fighting an unprecedented pandemic of #COVID19. Appeal house owners to be compassionate to poor & waive off or at least defer the rent by 3 months. Let’s show the world that #OdishaCares pic.twitter.com/KhSbrtJFTg
— Naveen Patnaik (@Naveen_Odisha) April 2, 2020
ପ୍ରକାଶ ଯେ, ଓଡ଼ିଶାରେ କରୋନା ସଂକ୍ରମଣ ଥମିବାର ନାଁ ନେଉନି। ମଙ୍ଗଳବାର ଦିନ ରାଜ୍ୟରେ କରୋନାରେ ପ୍ରଥମ ମୃତ୍ୟୁ ଘଟିଛି। ଏବେ ରାଜ୍ୟରେ ୪୨ ଜଣ କରୋନା ଆକ୍ରାନ୍ତ ହୋଇଛନ୍ତି।