କଟକ (କେନ୍ୟୁଜ୍) : ନିର୍ଗୁଣ୍ଡି ଷ୍ଟେସନରେ ଟ୍ରେନ୍ ଦୁର୍ଘଟଣାଗ୍ରସ୍ତ । ମୁମ୍ବାଇ-ଭୁବନେଶ୍ୱର ଲୋକମାନ୍ୟ ତିଲକ ଏକ୍ସପ୍ରେସ୍ ଦୁର୍ଘଟଣାଗ୍ରସ୍ତ ହୋଇଛି । କୁହୁଡ଼ି ଓ ସିଗ୍ନାଲ ତ୍ରୁଟି ଯୋଗୁ ଦୁର୍ଘଟଣା ହୋଇଥିବା ସୂଚନା ମିଳିଛି । ଷ୍ଟେସନରେ ଛିଡ଼ା ହୋଇଥିବା ମାଲବାହୀ ଟ୍ରେନ୍କୁ ପଛରୁ ଧକ୍କା ଦେଲା ଲୋକମାନ୍ୟ ତିଲକ ଏକ୍ସପ୍ରେସ୍ । ଏହା ପରେ ଟ୍ରେନ୍ ଲାଇନ୍ଚ୍ୟୁତ ହୋଇଥିଲା । ଏକ୍ସପ୍ରେସ୍ର ୮ଟି ବଗି ଲାଇନଚ୍ୟୁତ ହୋଇଛି । ଏଥିରେ ୧୧ ଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି । ୫ ଜଣ ଗୁରୁତର ହୋଇଛନ୍ତି । ସେହିପରି ୮ଜଣ ସାମାନ୍ୟ ଆହତ ହୋଇଥିବା ବେଳେ ସେମାନଙ୍କୁ ଡାକ୍ତର ପ୍ରାଥମିକ ଚିକିତ୍ସା କରିଥିବା ଖୋର୍ଦ୍ଧାରୋଡ ଡିଭିଜନର ସିନିୟର ଡିଭିଜନାଲ କମର୍ସିଆଲ ମ୍ୟାନେଜର ସୂଚନା ଦେଇଛନ୍ତି। ଘଟଣାସ୍ଥଳରେ ଆମ୍ବୁଲାନ୍ସ, ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ୟ୍ୟ କରିଛନ୍ତି। ଗୁରୁତରଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଅନ୍ୟ ଯାତ୍ରୀମାନଙ୍କୁ ଟ୍ରେନରୁ ବାହାର କରାଯାଇ ବସ ଯୋଗେ କଟକ ଓ ଭୁବନେଶ୍ୱର ପଠାଯାଇଛି। ଏନେଇ ସୂଚନା ପାଇଁ ପୂର୍ବତଟ ରେଳବାଇ ପକ୍ଷରୁ ହେଲ୍ପ ଲାଇନ୍ ନମ୍ବର ଜାରି କରାଯାଇଛି । କଟକ ହେଲ୍ପ ଲାଇନ୍ ନମ୍ବର ରହିଛି ୦୬୭୧୧୦୭୨, ଭୁବନେଶ୍ୱର ହେଡ୍କ୍ୱାର୍ଟର ନମ୍ବର ୧୮୦୦୩୪୫୭୪୦୧ ଓ ୧୮୦୦୩୪୫୭୪୦୨ । ଭୁବନେଶ୍ୱର ଷ୍ଟେସନ୍ ନମ୍ବର ରହିଛି ୦୬୭୪୧୦୭୨ । ପୁରୀ ପାଇଁ ୦୬୭୫୨୧୦୭୨ ନମ୍ବର ଦିଆଯାଇଛି ।