‘ପୋଡ଼ା ରୁଟି କାହାକୁ କଷ୍ଟ ଦିଏ ନାହିଁ, କଷ୍ଟ ଦିଏ କଟୁ କଥା’
କଥାଟି ଗୋଟିଏ ଗପରୁ ଆରମ୍ଭ କରୁଛି । ଯାହା ଗପ କହିଲେ ଭୁଲ ହେବ । କାରଣ ଏହି ଘଟଣା ଘଟିଥିଲା ଆମର ପୂର୍ବତନ ସ୍ୱର୍ଗତ ରାଷ୍ଟ୍ରପତି ଡ. ଏପିଜେ ଅବଦୁଲ କଲାମଙ୍କ ପିଲା ବେଳେ । ଯାହାକୁ ସେ ପରେ ଖୋଲି କରି କହିଥିଲେ । ଏକଥା ତ ସମସ୍ତଙ୍କୁ ଜଣା ଯେ ଅବଦୁଲ କଲାମଙ୍କ ଜୀବନୀ କେତେ ପ୍ରେରଣାଦାୟୀ ଓ କେତେ ଆଦର୍ଶରେ ଭରପୂର । ତାହେଲେ ଆସନ୍ତୁ ଜାଣିବା କଣ ସେହି କଥାଟି ।
ପ୍ରତ୍ୟେକ ଘର ଭଳି ଡ. କଲାମଙ୍କ ଘରେ ମଧ୍ୟ ତାଙ୍କ ମା ଗୃହିଣୀ ଭାବେ ସବୁ କାମ କରୁଥିଲେ । ଭୋର ସମୟରୁ ଉଠି ରାତିରେ ସମସ୍ତଙ୍କ ପଛରେ ଶୁଅନ୍ତି । ଦିନେ ରାତିରେ ସେ ରୁଟି ତରକାରୀ କରି ସମସ୍ତଙ୍କୁ ବାଢ଼ି ଦେଲେ। ଦିନ ସାରା ହାଡ଼ଭଙ୍ଗା ପରିଶ୍ରମ କରିଥିଲେ। ତେଣୁ କ୍ଳାନ୍ତ ଥିବା ମା ରୁଟି କଲା ବେଳେ ସେଥିରୁ କିଛି ପୋଡ଼ି ଯାଇଥିଲା । ଖାଇବାକୁ ବାଢ଼ିବା ବେଳେ ସେହି ପୋଡ଼ା ରୁଟିଗୁଡ଼ିକୁ ସେ କଲାମଙ୍କ ବାପାଙ୍କୁ ଦେଇଥିଲେ । ଏକଥା କଲାମଙ୍କ ନଜରକୁ ଆସିଲା । ସେ ଭାବିଥିଲେ ବାପା ରାଗିବେ ବୋଲି । ହେଲେ ବାପା ତାକୁ ଆରାମରେ ଖାଇଲେ । ଏହା ଦେଖି ମା ଆସି ନିଜ ଭୁଲ ସ୍ୱୀକାର କଲେ ଯେ ମୋ ଅସାବଧାନତାରୁ ଆଜି ରୁଟି ପୋଡ଼ି ଯାଇଛି । ଏହାର ଉତ୍ତରରେ ବାପା କହିଥିଲେ ଆରେ ମୁଁ ପରା ପୋଡ଼ା ରୁଟି ଭଲପାଏ ।
ତେବେ ଏକଥାକୁ ଲକ୍ଷ୍ୟ ରଖିଥିଲେ କଲାମ । ଶୋଇବାକୁ ଯିବା ପୂର୍ବରୁ ବାପାଙ୍କୁ ଗେଲ କରି ଯିବା ବେଳେ ପଚାରିଲେ ବାପା ତୁମକୁ କଣ ସତରେ ପୋଡ଼ା ରୁଟି ଭଲ ଲାଗେ ? ବାପା ଟିକେ ହସିଦେଲେ ଆଉ କଲାମକୁ କୁଣ୍ଢାଇ ଧରି କହିଲେ, ତୋ ମା ଦିନ ସାରା କାମ କରି ଅତ୍ୟଧିକ କ୍ଳାନ୍ତ ହୋଇପଡ଼ିଥିଲେ । ତେଣୁ ସାମାନ୍ୟ ଭୁଲରୁ ରୁଟି ପୋଡ଼ି ଯାଇଥିଲା । ତେବେ ପୁଅ ମନେ ରଖିଥା, ପୋଡ଼ା ରୁଟି କାହାକୁ ଆଘାତ ଦିଏ ନାହିଁ, ଆଘାତ ଦିଏ କଟୁ କଥା ।
ତେଣୁ ବର୍ତ୍ତମାନର କରୋନା ପରିସ୍ଥିତି ଏବଂ ଲକ୍ଡାଉନ୍ର ବିରକ୍ତି ସମସ୍ତଙ୍କୁ ମାନସିକ ଚାପ ଭିତରେ ରଖିଛି । ହେଲେ ଅସନ୍ତୋଷ ସମାଧାନର ବାଟ ଖୋଜେ ନାହିଁ, ବାଟକୁ ବନ୍ଦ କରିଦିଏ । ତେଣୁ ପରିବାର ହେଉ କି କାର୍ଯ୍ୟାଳୟ ଅବା ସାଙ୍ଗ ସାଥୀ, ପରସ୍ପରର ଦୋଷ ଦୁର୍ଗୁଣ ଖୋଜିବା ଅପେକ୍ଷା ଏହାକୁ ଗ୍ରହଣ କରି ନେଲେ ସମ୍ପର୍କ ଆହୁରି ସୁଦୃଢ଼ ହୁଏ । ବର୍ତ୍ତମାନ ପରିସ୍ଥିତିରେ ଏହା କେତେ ଜରୁରୀ ସେକଥା ଆପଣମାନେ ସମସ୍ତେ ବୁଝି ପାରୁଥିବେ ନିଶ୍ଚୟ ।
