ବିମାନରେ ନିଜ ପରିବାରକୁ ଏମିତି ସ୍ୱାଗତ କଲା ପାଇଲଟ୍ ପୁଅ, ମା’ବାପାଙ୍କ ଆଖିରୁ ଝରିଆସିଲା ଲୁହ
ନିଜ ପାଇଲଟ୍ ପୁଅର ଘୋଷଣା ଶୁଣି ମା’ବାପାଙ୍କ ଆଖିରୁ ଲୁହ ଝରି ଆସିଥିଲା ଏବଂ ବିମାନରେ ଥିବା ଅନ୍ୟ ଯାତ୍ରୀମାନେ କରତାଳି ଦେଇଥିଲେ । ଏହି ଭିଡିଓକୁ ଇଣ୍ଡିଗୋ ବିମାନର ପାଇଲଟ୍ ସେୟାର କରିଛନ୍ତି ।
ଉଡ଼ାଣ ପୂର୍ବରୁ ବିମାନ ଆଟେଣ୍ଡାଣ୍ଟ କିମ୍ବା ପାଇଲଟ୍ଙ୍କ ତରଫରୁ ଏକ ଘୋଷଣା କରାଯାଇଥାଏ । ଅନେକ ଥର ଏହି ଘୋଷଣା ଅତ୍ୟନ୍ତ ଖାସ୍ ହୋଇଥାଏ, ଯାହାର ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ ହୁଏ । ଏବେ ଏହିପରି ଜଣେ ପାଇଲଟଙ୍କ ଘୋଷଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏଥିରେ ସେ ତାଙ୍କ ପରିବାର ଲୋକଙ୍କୁ ସ୍ୱାଗତ କରୁଥିବା ଦେଖିବାକୁ ମିଳୁଛି ।
ସେପଟେ ନିଜ ପାଇଲଟ୍ ପୁଅର ଘୋଷଣା ଶୁଣି ମା’ବାପାଙ୍କ ଆଖିରୁ ଲୁହ ଝରି ଆସିଥିଲା ଏବଂ ବିମାନରେ ଥିବା ଅନ୍ୟ ଯାତ୍ରୀମାନେ କରତାଳି ଦେଇଥିଲେ । ଏହି ଭିଡିଓକୁ ଇଣ୍ଡିଗୋ ବିମାନର ପାଇଲଟ୍ ସେୟାର କରିଛନ୍ତି । ବିମାନ ଚେନ୍ନାଇରୁ କୋଏମ୍ବଟୁର ଅଭିମୁଖେ ଯାଉଥିବା ବେଳେ ପାଇଲଟ୍ ପ୍ରଦୀପ କୃଷ୍ଣନ ତାଙ୍କ ମା’ ଏବଂ ଜେଜେବାପା, ଜେଜେମା’ଙ୍କୁ ସ୍ୱାଗତ କରିବା ପାଇଁ ଘୋଷଣା କରିବାକୁ ଆସିଥିଲେ ।
ବିମାନ ଉଡ଼ାଣ ପୂର୍ବରୁ ପ୍ରଦୀପ କୃଷ୍ଣନ ସମସ୍ତ ଯାତ୍ରୀଙ୍କୁ ସ୍ୱାଗତ କରିଥିଲେ ଏବଂ ବିମାନରେ ବସିଥିବା ତାଙ୍କ ପରିବାର ଲୋକଙ୍କ ବିଷୟରେ ସୂଚନା ଦେଇଥିଲେ । ସେ କହିଥିଲେ ଯେ ‘ମୋତେ ଏହା ଘୋଷଣା କରି ବହୁତ ଖୁସି ଲାଗୁଛି କି, ଆଜି ମୋ ପରିବାର ମୋ ସହିତ ଯାତ୍ରା କରୁଛନ୍ତି । ଦାଦା-ଦାଦୀ ଓ ଆମ୍ମା ୨୯ତମ ଧାଡିରେ ବସିଛନ୍ତି । ଦାଦା ପ୍ରଥମ ଥର ମୋ ସହିତ ଉଡ଼ାଣ ଭରୁଛନ୍ତି’ ।
ପାଇଲଟ୍ଙ୍କ ଘୋଷଣା ପରେ ସମସ୍ତ ଯାତ୍ରୀ ତାଳି ମାରିଥିଲେ । ଏହି ସମୟରେ ପାଇଲଟ୍ଙ୍କ ଦାଦା ଓ ଆମ୍ମା ଭାବପ୍ରବଣ ହୋଇଯାଇଥିଲେ । ସେମାନଙ୍କ ଆଖିରୁ ଲୁହ ଝରି ଆସିଥିଲା । ସେମାନେ ଠିଆ ହୋଇ ହାତ ଯୋଡ଼ି ଲୋକଙ୍କ ଅଭିବାଦନ ଗ୍ରହଣ କରିଥିଲେ ।
ବର୍ତ୍ତମାନ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି, ଯାହାକୁ ଦେଖି ଲୋକମାନେ ସୁନ୍ଦର ପ୍ରତିକ୍ରିୟା ଦେଉଛନ୍ତି । ଜଣେ ଲେଖିଛନ୍ତି, ‘ନିଶ୍ଚିତ ଭାବରେ ଆପଣଙ୍କ ପରିବାର ଆପଣଙ୍କ ପାଇଁ ବହୁତ ଗର୍ବ ଅନୁଭବ କରୁଥିଲେ’ । ଅନ୍ୟ ଜଣେ ଲେଖିଛନ୍ତି, ‘ଏହା ସେମାନଙ୍କ ପାଇଁ ଗର୍ବର ମୁହୂର୍ତ୍ତ ଥିଲା, ତେଣୁ ଆଖିରୁ ଲୁହ ବୋହି ଆସିବା ସ୍ୱାଭାବିକ ଥିଲା’ ।
