ଦେଖନ୍ତୁ କିପରି ଆଇସୋଲେସନ୍ ୱାର୍ଡରେ ବଦଳିଗଲା ଟ୍ରେନର ବଗି, ଏହିପରି ୩ ଲକ୍ଷ ବେଡର ପ୍ରସ୍ତୁତିରେ ଭାରତୀୟ ରେଲୱେ
ସାରା ଦେଶରେ କରୋନା ଭାଇରସ୍ ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ଭାରତୀୟ ରେଲୱେ ଟ୍ରେନର ବଗି ଗୁଡିକୁ ଆଇସୋଲେସନ୍ ୱାର୍ଡରେ ପରିଣତ କରିଦେଇଛି । ରେଲୱେ ତରଫରୁ ଦିଆଯାଇଥିବା ସୂଚନା ମୁତାବକ ଉତ୍ତର ରେଲୱେ ଦ୍ଵାରା ଜଗାଧାରୀ ୱାର୍କସପରେ ୨୮ଟି ବଗିକୁ ଆଇସୋଲେସନ୍ ୱାର୍ଡରେ ପରିଣତ କରିଦିଆଯାଇଛି । ଏହାସହିତ ରେଲୱେ କହିଛି ଯେ ଏହିପରି ୩ ଲକ୍ଷ ଆଇସୋଲେସନ୍ ୱାର୍ଡ ପ୍ରସ୍ତୁତ କରାଯାଇପାରିବ ।
ସୂଚନା ଅନୁଯାୟୀ ୨୮ଟି ନନ୍ ଏସି କୋଚକୁ ଆଇସୋଲେସନ୍ ୱାର୍ଡରେ ବଦଳାଇ ଦିଆଯାଇଛି । ମାତ୍ର ୧୦ ଦିନ ମଧ୍ୟରେ ଏହା ସମ୍ପୂର୍ଣ୍ଣ ରୂପେ ପ୍ରସ୍ତୁତ ହୋଇଯିବ ବୋଲି ରେଲୱେ ପକ୍ଷରୁ ସୂଚନା ଦିଆଯାଇଛି ।
ତେବେ ଏଥିରେ ପ୍ରତି କୋଚର ଶେଷ ପାର୍ଟିସନରେ ଥିବା ଦ୍ଵାରକୁ ହଟାଇ ଦିଆଯାଇଛି । ଏହାସହିତ ପ୍ରତି କୋଚର ଶେଷରେ ଇଣ୍ଡିଆନ୍ ଷ୍ଟାଇଲ୍ ଟଇଲେଟକୁ ବାଥରୁମରେ ପରିଣତ କରିଦିଆଯାଇଛି । ଯେଉଁଠି ବାଲଟି, ମଗ, ସାବୁନ୍, ଡିସ୍ ଇତ୍ୟାଦି ରଖାଯାଇଛି । ଏହାସହିତ ମିଡିଲ ବର୍ଥସ୍ ଗୁଡିକୁ ହଟାଇ ଦିଆଯାଇଛି ।
ରେଲୱେ ପକ୍ଷରୁ ମିଳିଥିବା ସୂଚନା ଅନୁଯାୟୀ ଏସି କୋଚରେ ତୃତୀୟ ବା ଉପର ବର୍ଥକୁ ଚଢିବା ପାଇଁ ଥିବା ସିଡି ଗୁଡିକୁ ହଟାଇ ଦିଆଯାଇଛି । ଏହାସହିତ ପ୍ରତ୍ୟେକ କ୍ୟାବିନରେ ଦୁଇଟି ଲେଖାଏଁ ବଟଲ ହୋଲଡ଼ର ମଧ୍ଯ ଲଗାଇ ଦିଆଯାଇଛି । ଯେଉଁଥିରେ ମେଡିକାଲ ଇକ୍ୟୁପମେଣ୍ଟ ଗୁଡିକ ରଖାଯାଇପାରିବ । ଏବେ ବଗି ଗୁଡିକରେ ଚାର୍ଜିଙ୍ଗ ସ୍ଲଟ ଗୁଡିକୁ ଠିକ୍ କରାଯିବା ସହିତ ପ୍ଲାଷ୍ଟିକ ପରଦା ଲଗାଇବା ପାଇଁ ପ୍ରସ୍ତୁତି ଚାଲିଛି ।
