ବଲିଉଡ ଅଭିନେତା ସୁଶାନ୍ତ ସିଂ ରାଜପୁତ ନିକଟରେ ଆତ୍ମହତ୍ୟା କରିଛନ୍ତି ଯାହାକି ବର୍ତ୍ତମାନ ପର୍ଯ୍ୟନ୍ତ ଲୋକମାନଙ୍କ ମନରୁ ଲଭିନାହିଁ । ଏହି ଘଟଣାକୁ ବେଶୀ ଦିନ ନହୋଇଥିବା ବେଳେ ଆତ୍ମହତ୍ୟାର ଆଉ ଏକ ନୂଆ ମାମଲା ସାମ୍ନାକୁ ଆସିଛି । 16 ବର୍ଷୀୟ ସୋସିଆଲ ମିଡିଆ ତାରକା ସିୟା କକ୍କର ଆତ୍ମହତ୍ୟା କରିଛନ୍ତି । ସିୟା ସୋସିଆଲ ମିଡିଆରେ ଜଣେ ଲୋକପ୍ରିୟ ସେଲିବ୍ରିଟି ଥିଲେ । ଏହି ଖବର ଦେଖି ତାଙ୍କ ପ୍ରଶଂସକମାନେ ଆଶ୍ଚର୍ଯ୍ୟ ହୋଇଯାଇଛନ୍ତି । ତେବେ ଆତ୍ମହତ୍ୟାର କାରଣ ଏପର୍ଯ୍ୟନ୍ତ ଜଣାପଡିନାହିଁ ।
ସୂଚନା ଅନୁଯାୟୀ ସିୟା ତାଙ୍କ ମ୍ୟାନେଜର ଅର୍ଜୁନ ସରିନଙ୍କ ସହ ଗତକାଲି ରାତିରେ ଏକ ଗୀତ ବିଷୟରେ କଥା ହୋଇଥିଲେ । ସିୟାଙ୍କ ଆତ୍ମହତ୍ୟା ଖବର ଶୁଣି ଅର୍ଜୁନ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି । ଅର୍ଜୁନ କହିଛନ୍ତି ଯେ ସିୟା ଭଲ ଥିଲେ ଏବଂ ସେ ଟିକିଏ ବି ବିବ୍ରତ ମଧ୍ୟ ଜଣାପଡୁ ନଥିଲେ । ବୁଝିହେଉନି ଯେ ସିୟା କାହିଁକି ଏପରି ପଦକ୍ଷେପ ନେଲେ । ତେବେ ସିୟା ଟିକଟକରେ ବି ବହୁତ ପପୁଲାର ଥିଲେ । ନିକଟରେ ସିୟା ନିଜ ଇନଷ୍ଟାଗ୍ରାମ ଷ୍ଟୋରୀରେ ତାଙ୍କ ଡ୍ୟାନ୍ସ ଭିଡିଓ ପୋଷ୍ଟ କରିଥିଲେ, ଯେଉଁଥିରେ ସେ ପଞ୍ଜାବୀ ଗୀତରେ ନାଚୁଥିବାର ନଜର ଆସିଛନ୍ତି । ତେବେ ସିୟା ଇନଷ୍ଟାଗ୍ରାମ ଷ୍ଟୋରୀରେ ସେୟାର କରିଥିବା ଭିଡିଓକୁ କିଛି ଦିନ ପୂର୍ବରୁ ଇନଷ୍ଟାଗ୍ରାମରେ ମଧ୍ୟ ପୋଷ୍ଟ କରିଥିଲେ । ଯାହା ତାଙ୍କର ଶେଷ ପୋଷ୍ଟ ଥିଲା, ସୂଚନା ଅନୁଯାୟୀ ଇନଷ୍ଟାଗ୍ରାମରେ ସିୟାଙ୍କର ବହୁତ ଫଲୋଅର୍ସ ଅଛନ୍ତି ।
ସିୟା ଆତ୍ମହତ୍ୟା କରିବା ପରଠାରୁ ପ୍ରଶଂସକଙ୍କ ମଧ୍ୟରେ ଉତ୍ତେଜନା ଦେଖାଦେଇଛି । ପ୍ରତ୍ୟେକ ବ୍ୟକ୍ତିଙ୍କ ମନରେ କେବଳ ଗୋଟିଏ ପ୍ରଶ୍ନ ଅଛି, ସିୟା କାହିଁକି ଆତ୍ମହତ୍ୟା କଲେ ? ଇନଷ୍ଟାଗ୍ରାମରେ ସମସ୍ତେ ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରୁଛନ୍ତି ।