ବିମାନ ବନ୍ଦରରେ ଆଉ ଅଧିକ ସମୟ ଅପେକ୍ଷା କରିବାକୁ ପଡିବ ନାହିଁ, ଓହ୍ଲାଇବାର ଅଧଘଣ୍ଟା ଭିତରେ ମିଳିବ ବ୍ୟାଗେଜ

ବିମାନ ଯାତ୍ରା ସମୟରେ ଯାତ୍ରୀଙ୍କୁ ବ୍ୟାଗେଜ ମିଳିବାରେ ହେଉଥିବା ବିଳମ୍ବର ସମସ୍ୟା ଦୂର ହେବାକୁ ଯାଉଛି । ବ୍ୟାଗେଜ ମିଳିବାରେ ବିଳମ୍ବ ମାମଲାରେ ଦୃଢ କାର୍ଯ୍ୟାନୁଷ୍ଠାନ ନେବ ବୋଲି ସମସ୍ତ ଏୟାରଲାଇନ୍ସକୁ ନିର୍ଦ୍ଦେଶ ଦେଇଛି ବ୍ୟୁରୋ ଅଫ୍ ସିଭିଲ୍ ଏଭିଏସନ୍ ସିକ୍ୟୁରିଟି(BCAS) । ବିମାନ ଅବତରଣ କରିବାର ଅଧଘଣ୍ଟାରେ ଯାତ୍ରୀଙ୍କୁ ବ୍ୟାଗେଜ ଡେଲିଭରୀ ହେବା ସୁନିଶ୍ଚିତ କରିବା ପାଇଁ ସମସ୍ତ ଏୟାରଲାଇନ୍ସ କମ୍ପାନୀକୁ କହିଛି BCAS । ଫେବ୍ରୁଆରୀ ୨୬ ସୁଦ୍ଧା ବ୍ୟବସ୍ଥା ଲାଗୁ କରିବାକୁ କୁହାଯାଇଥିବା ବେଳେ ଉଲ୍ଲଂଘନ କଲେ କାର୍ଯ୍ୟାନୁଷ୍ଠାନ ନେଇ କଡା ଚେତାବନୀ ବି ଦିଆଯାଇଛି ।

ଖବର ମୁତାବକ, ନୂତନ ନିୟମ ଅନୁଯାୟୀ, ବିମାନ ପହଞ୍ଚିବାର ୧୦ ମିନିଟ୍ ମଧ୍ୟରେ ପ୍ରଥମ ଲଗେଜ ବ୍ୟାଗ ବ୍ୟାଗେଜ ବେଲ୍ଟକୁ ଯିବ । ଏଥିସହ ଶେଷ ଲଗେଜ ବ୍ୟାଗ ଅଧ ଘଣ୍ଟା ମଧ୍ୟରେ ପହଞ୍ଚିବାକୁ ନିର୍ଦ୍ଦେଶ ଦିଆଯାଇଛି ।

ବିମାନ ଲ୍ୟାଣ୍ଡ କରିବା ପରେ ବି ଲଗେଜ ପାଇବା ନିମନ୍ତେ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡ଼ୁଥିବା ନେଇ ଯାତ୍ରୀମାନେ ବାରମ୍ବାର ଅଭିଯୋଗ କରୁଥିଲେ । ଏୟାର ଇଣ୍ଡିଆ, ଇଣ୍ଡିଗୋ, ଭିଷ୍ଟାରା, ସ୍ପାଇସ ଜେଟ, AIX Connect, Air India Express ଓ Akasa ପ୍ରମୁଖ ୬ ବିମାନ କମ୍ପାନୀଙ୍କୁ ପ୍ରଥମ ପର୍ଯ୍ୟାୟରେ ଏହି ନିର୍ଦ୍ଦେଶନାମା ଜାରି କରାଯାଇଛି । ବିମାନ ଅବତରଣ କରିବା ପରେ ବି ଜିନିଷ ପାଇବାକୁ ଯାତ୍ରୀମାନେ ଦୀର୍ଘ ସମୟ ଅପେକ୍ଷା କରୁଥିଲେ । ତେଣୁ ବିରକ୍ତି ହୋଇପଡୁଥିଲେ । ଏହାପରେ (BCAS) ପକ୍ଷରୁ ଏହି ନିର୍ଦ୍ଦେଶନାମା ଜାରି କରାଯାଇଛି ।

ବିମାନ କମ୍ପାନୀ ଦ୍ୱାରା ବ୍ୟାଗେଜ ଡେଲିଭରୀ ହେବାକୁ ସପ୍ତାହିତ ଆଧାରରେ ମନିଟର କରାଯାଉଥିଲା । କମ୍ପାନୀର ପରଫରମାନ୍ସରେ ସୁଧାର ଆସିଲା, କିନ୍ତୁ ଏବେ ବି ଧାର୍ଯ୍ୟ ସମୟ ଅନୁସାରେ ହୋଇପାରିଲା ନାହିଁ । ତେଣୁ ବିମାନ ଅବତରଣ କରିବାର ୧୦ ମିନିଟରେ ବ୍ୟାଗେଜ ଡେଲିଭରୀ ହେବା ଆରମ୍ଭ ହୋଇ ଶେଷ ୩୦ ମିନିଟରେ ହେବାକୁ BCAS କହିଛି ।