ପିଲାଙ୍କ ପାଇଁ ମୋବାଇଲ ଗେମ୍ ହୋଇଛି କାଳ, ପଦକ୍ଷେପ ନେବାକୁ କେନ୍ଦ୍ର ସରକାରଙ୍କୁ ଦିଲ୍ଲୀ ହାଇକୋର୍ଟଙ୍କ ତାଗିଦ
ନୂଆଦିଲ୍ଲୀ : ଗେମ୍ ନିଶାରେ ଅଭ୍ୟସ୍ତ ହୋଇ ପିଲାମାନେ ପ୍ରାଣ ହରାଉଥିବା ବିଭିନ୍ନ ଖବର ଆସିବା ପରେ ଦିଲ୍ଲୀ ହାଇକୋର୍ଟ ଏବେ କେନ୍ଦ୍ର ସରକାରଙ୍କୁ ତାଗିଦ କରିଛନ୍ତି । ପିଲାଙ୍କୁ ଏପରି ଅନଲାଇନ୍ ଗେମ୍ ନିଶାରୁ ବଞ୍ଚାଇବା ପାଇଁ ଏକ ଜାତୀୟ ନୀତି ନିର୍ଦ୍ଧାରଣ କରିବା ପାଇଁ କେନ୍ଦ୍ର ସରକାରଙ୍କୁ ଦିଲ୍ଲୀ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ପିଲାଙ୍କୁ ଏପରି ଗେମ ନିଶାରୁ ବଞ୍ଚାଇବା ପାଇଁ କେନ୍ଦ୍ର ସରକାରଙ୍କୁ ଆଦେଶ ଦେବାକୁ ଦିଲ୍ଲୀ ହାଇକୋର୍ଟରେ ଏକ ପିଟିସନ ଦାଖଲ କରାଯାଇଥିଲା । ଜଷ୍ଟିସ ଡି. ଏନ୍. ପଟେଲ ଓ ଜଷ୍ଟିସ୍ ଜ୍ୟୋତି ସିଂହଙ୍କୁ ନେଇ ଗଠିତ ଖଣ୍ଡପୀଠ ଏହି ଆଦେଶ ଦେଇଛନ୍ତି ।
କରୋନା କାଳରେ ପିଲାମାନେ ଅନ୍ଲାଇନ ପାଠ ପଢ଼ୁଥିବା ବେଳେ ବିଶେଷ ଭାବେ ଗେମ୍ ପ୍ରତି ଆକୃଷ୍ଟ ହେଉଛନ୍ତି । ଏହାଦ୍ୱାରା ସେମାନେବିଭିନ୍ନ ପ୍ରକାର ମାନସିକ ସମସ୍ୟାର ଶିକାର ହୋଇଛନ୍ତି ବୋଲି ଅନେକ ଅଭିଭାବକ ସେମାନଙ୍କ ଆଗରେ ଅଭିଯୋଗ କରିଛନ୍ତି । ଏପରିକି ୧୦ ବର୍ଷରୁ କମ୍ ବୟସର ପିଲାମାନେ ଗେମ୍ ପ୍ରତି ଅଧିକ ଆକୃଷ୍ଠ ହେଉଛନ୍ତି ।
ଅନ୍ଲାଇନ ସମୟରେ ପିଲାମାନେ ପାଠ ପଢ଼ା ନାମରେ ପାଠ କମ ଅନ୍ଲାଇନ୍ ଗେମ୍ ପ୍ରତି ଅଧିକ ଆକୃଷ୍ଟ ହେଉଥିବା ନେଇ ଏକ ମାମଲା ଦିଲ୍ଲୀ ହାଇକୋର୍ଟରେ ଦାଖଲ ହୋଇଥିଲା । ଏସବୁ ପିଲାଙ୍କ ମାନସିକ ସ୍ୱାସ୍ଥ୍ୟ ଉପରେ ଅଧିକ ପ୍ରଭାବ ପକାଉଥିବାରୁ କେନ୍ଦ୍ର ସରକାର କିଛି ନୀତି ନିର୍ଦ୍ଧାରଣ କରିବାକୁ ଦିଲ୍ଲୀ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ଅନ୍ଲାଇନ୍ ଗେମ୍ର କୁପ୍ରଭାବରୁ ପିଲାମାନେ କ୍ରମଶଃ ଉଗ୍ର ଓ ଆକ୍ରମଣାତ୍ମକ ହୋଇପଡ଼ୁଥିବା ନେଇ ପ୍ରମୁଖ ମେଡିକାଲ ଜର୍ଣ୍ଣାଲ ‘ଲାନସେଟରେ ’ ଏହି ତଥ୍ୟ ପ୍ରକାଶ ପାଇଛି । ତେଣୁ କେନ୍ଦ୍ର ସରକାର ଏ ସଂକ୍ରାନ୍ତରେ ଏକ ଜାତୀୟ ନୀତି ନିର୍ଦ୍ଧାରଣ କରନ୍ତୁ ବୋଲି ଦିଲ୍ଲୀ ହାଇକୋର୍ଟରେ କରାଯାଇଥିବା ପିଟିସନ ଉପରେ ମାନ୍ୟବର କୋର୍ଟ ଏହି ଆଦେଶ ଦେଇଛନ୍ତି ।