ଦିଲ୍ଲୀ ହାଇକୋର୍ଟଙ୍କ ସବୁଜ ଦଣ୍ଡ : ୨-ଜି ଅଭିଯୁକ୍ତଙ୍କୁ ଆଦେଶ ଦେଲେ ୪୦ ହଜାର ବୃକ୍ଷରୋପଣ ପାଇଁ
ନୂଆଦିଲ୍ଲୀ : ଦିଲ୍ଲୀ ହାଇକୋର୍ଟର ବିଚାରପତି ନଜମି ବଜିର ଆଜି ଏକ ଅଭିନବ ଦଣ୍ଡାଦେଶ ଦେଇଛନ୍ତି । ୨-ଜି ଦୁର୍ନୀତି ଅଭିଯୁକ୍ତ ସାହିଦ ବଲବା ସମେତ ଦୁଇ ଜଣ ବ୍ୟକ୍ତି ଏବଂ ଏଥିରେ ପକ୍ଷ ଥିବା ୩ଟି କମ୍ପାନୀଙ୍କୁ ୪୦ ହଜାର ବୃକ୍ଷ ରୋପଣ ପାଇଁ ନିର୍ଦ୍ଦେଶ ଦେଇଛନ୍ତି । ଖାଲି ସେତିକି ନୁହେଁ, ଏସବୁ ଗଛ ଲଗାଇ ଆଗାମୀ ବର୍ଷା ୠତୁ ପର୍ଯ୍ୟନ୍ତ ଏହାର ରକ୍ଷଣା ବେକ୍ଷଣ କରିବାକୁ ମଧ୍ୟ ରାୟରେ କହିଛନ୍ତି ।
ପୃଥିବୀ ବୃକ୍ଷଶୂନ୍ୟ ହେଉଥିବାରୁ ପ୍ରାକୃତିକ ବିପର୍ଯ୍ୟୟ ଘଟୁଛି । ତେଣୁ ପାର୍ବତ୍ୟାଞ୍ଚଳରେ ବୃକ୍ଷରୋପଣ ପାଇଁ ଏଭଳି ଏକ ନିଆରା ରାୟ ଦେଇଛନ୍ତି ବିଚାରପତି ନଜମି ବଜିର । ଦକ୍ଷିଣ ଦିଲ୍ଲୀ ଅଞ୍ଚଳରେ ପ୍ରତ୍ୟେକ ଅଭିଯୁକ୍ତ ବ୍ୟକ୍ତି ଓ ସଂସ୍ଥା ୩ ହଜାର ଲେଖାଏଁ ଗଛ ଲଗାଇବେ । ତେଣୁ ଆସନ୍ତା ୧୫ ତାରିଖ ଦିନ ସ୍ଥାନୀୟ ଅଞ୍ଚଳର ବନ ବିଭାଗ ଅଧିକାରୀଙ୍କୁ ଭେଟି ଏ ସମ୍ପର୍କରେ ଆଲୋଚନା କରିବାକୁ ବିଚାରପତି କହିଛନ୍ତି । ଏହି ପକ୍ଷମାନଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ ‘ଇଡି’ ତାର ରିପୋର୍ଟ ଦେବା ଭିତରେ ଏଭଳି ଦଣ୍ଡ ଦେଇଛନ୍ତି ହାଇକୋର୍ଟ ।
ଏହି ଟେଲିକମ୍ ଦୁର୍ନୀତିରେ ପୂର୍ବତନ ବିଭାଗୀୟ ମନ୍ତ୍ରୀ ଏ. ରାଜା ଏବଂ ସାଂସଦ କାନିମୋଝିଙ୍କ ସମେତ ଦୁଇଜଣ ବ୍ୟକ୍ତି ଓ ତିନିଟି କମ୍ପାନୀକୁ କୋର୍ଟ ଦୋଷମୁକ୍ତ ଘୋଷଣା କରିଛନ୍ତି । ଏହା ପରେ ଅନ୍ୟ କିଛି ଅଭିଯୁକ୍ତ ବ୍ୟକ୍ତି ଓ କମ୍ପାନୀ ସେମାନଙ୍କୁ ଦୋଷମୁକ୍ତ କରିବା ଲାଗି ଆବେଦନ କରିଛନ୍ତି । ମାମଲାର ପରବର୍ତ୍ତୀ ଶୁଣାଣି ୨୬ ତାରିଖରେ ହେବ ।
