ଅଧିକ ଯୌତୁକ ମାଗି କନ୍ୟାପକ୍ଷ ଲୋକଙ୍କୁ ମାରପିଟ୍ କରୁଥିବା ବର ଘର ବିରୋଧରେ ଥାନାରେ ଅଭିଯୋଗ କଲା ନିଜେ କନ୍ୟା। ଏମିତି ଘଟଣା ଦେଖବାକୁ ମିଳିଛି ବିହାରର ରାଜଧାନୀ ପାଟନାରେ। ଏଠାରେ ଏକ ବିବାହ ମଧ୍ୟରେ ଘମାସାନ ଲଢ଼େଇ ହୋଇଛି। ବର ଘର ଲୋକ ଯୌତୁକ ଦାବି କରି ଝିଅ ଘର ଲୋକଙ୍କ ସହ ମାରପିଟ୍ କରିଥିବା ନେଇ ଅଭିଯୋଗ ହୋଇଛି। ଏହା ପରେ କନ୍ୟା ବେଦୀରୁ ଉଠି ସିଧାସଳଖ ଥାନାରେ ପହଞ୍ଚିଛି। ଘଣ୍ଟା ଘଣ୍ଟା ଧରି ଥାନାରେ ବସି କନ୍ୟା ବରର ପରିବାରର ସଦସ୍ୟଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛି। ଏଥିସହ ଶାଶୁ ଘର ଯିବାକୁ ବି ସିଧାସଳଖ ମନା କରିଦେଇଛି କନ୍ୟା।
କୁହାଯାଉଛି ଯେ ବିବାହ ଉତ୍ସବ ମଧ୍ୟରେ ବର ଓ କନ୍ୟାପକ୍ଷ ମଧ୍ୟରେ ମାରପିଟ୍ ହୋଇଥିଲା। ବର ଯାତ୍ରୀ କନ୍ୟା ପକ୍ଷ ଲୋକଙ୍କୁ ପ୍ରବଳ ମାଡ଼ ମାରିଥିଲେ। ଏହି ଘଟଣାରେ କନ୍ୟା ପକ୍ଷର ୮ ଜଣ ଗୁରୁତର ହୋଇଛନ୍ତି। ରିପୋର୍ଟ ମୁତାବକ, ନାଳନ୍ଦା ଜିଲ୍ଲାର ମୋହନ ପ୍ରସାଦଙ୍କ ଝିଅର ବିବାହ ଦାନାପୁରର ମେବାଲାଲ ସାବଙ୍କ ପୁଅ ଗୋପାଳ କୁମାରଙ୍କ ସହ ସ୍ଥିର ହୋଇଥିଲା। ଦାମାପୁରର ମଣ୍ଡପରେ ଏହି ବିବାହ ହେଉଥିଲା। ସବୁ କିଛି ଠିକ୍ ଠାକ୍ ଚାଲିଥିବା ବେଳେ ବରପକ୍ଷ ଲୋକ ଅଧିକ ଯୌତୁକ ଦାବି କରିଥିଲେ। ଫଳରେ ବିବାଦ ଉପୁଜିଥିଲା। ପ୍ରଥମେ ପାଟିତୁଣ୍ଡ ଆଉ ତା’ପରେ ହାତାହାତି ହୋଇଥିଲା।
ପରେ ଉଭୟ ପକ୍ଷ ଥାନାରେ ପହଞ୍ଚିଥିଲେ। ଥାନାରେ କନ୍ୟାର ବାପା ଅଭିଯୋଗ କରିଥିଲେ ଯେ ପୂର୍ବରୁ ବରଘର ତରଫରୁ ୧୫ ଲକ୍ଷ ଟଙ୍କା ଯୌତୁକ ମାଗିଥିଲେ। ସେ ୧୦ ଲକ୍ଷ ଟଙ୍କା ଆକାରରେ ଓ ୫ ଲକ୍ଷର ଗହଣା ଦେଇଥିଲେ। ତଥାପି ବରଘର ଲୋକେ ସନ୍ତୁଷ୍ଟ ନାହାନ୍ତି। ତେବେ ଏନେଇ କନ୍ୟା କହିଛି, ଯେଉଁମାନେ ବିବାହ ପୂର୍ବରୁ ଏଭଳି ବ୍ୟବହାର କରୁଛନ୍ତି ସେମାନେ ବିବାହ ପରେ କେମିତି ବ୍ୟବହାର କରିବେ। ଏଣୁ ସେ ଏହି ବିବାହ କରିବେ ନାହିଁ କି ଶାଶୁଘରକୁ ଯିବେ ନାହିଁ। ତେବେ ପୋଲିସ ଘଟଣାର ତଦନ୍ତ କରୁଛି ଓ ଦୋଷୀକୁ ଉଚିତ ଦଣ୍ଡ ଦିଆଯିବ ବୋଲି ଥାନାଧିକାରୀ କହିଛନ୍ତି।