କାଉ ବଂଶ ଲୋପ କରିବାକୁ ନିଷ୍ପତ୍ତି ନେଇଛନ୍ତି କେନିଆ ସରକାର, ଜାଣନ୍ତୁ କାହିଁକି
ଭାରତୀୟ କାଉଙ୍କ ବିରୋଧରେ ଯୁଦ୍ଧ ଆରମ୍ଭ କରିଛନ୍ତି କେନିଆ ସରକାର । କେନିଆ ବନ୍ୟପ୍ରାଣୀ ସେବା (କେଡବ୍ଲ୍ୟୁଏସ୍) କହିଛି ଯେ ଭାରତୀୟ କାଉ ଏକ ବିଦେଶୀ ପକ୍ଷୀ, ଯାହା ଗତ କିଛି ଦଶନ୍ଧି ଧରି ସେଠାରେ ରହୁଥିବା ଲୋକଙ୍କୁ ହଇରାଣ କରୁଛି ।
୨୦୨୪ ଶେଷ ସୁଦ୍ଧା କେନିଆର ସମଗ୍ର ଉପକୂଳରୁ ୧୦ ଲକ୍ଷ କାଉଙ୍କୁ ହଟାଇବାକୁ କେଡବ୍ଲ୍ୟୁଏସ୍ ଘୋଷଣା କରିଛି । ଏହି କଳା କାଉମାନେ ଭାରତୀୟ ବଂଶୋଦ୍ଭବ ବୋଲି କୁହାଯାଉଛି । ୧୯୪୦ ମସିହାବେଳକୁ ସେମାନେ ପୂର୍ବ ଆଫ୍ରିକାରେ ପହଞ୍ଚିଥିଲେ । ସେବେଠାରୁ ସେମାନଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଛି ଏବଂ ସେମାନେ ଆକ୍ରମଣାତ୍ମକ ହେବାରେ ଲାଗିଛନ୍ତି ।
କେନିଆ ସରକାର କହୁଛନ୍ତି କି, ଏହି ବିଦେଶୀ କାଉଙ୍କ ଯୋଗୁଁ କେନିଆର ପ୍ରକୃତ ପକ୍ଷୀଙ୍କ ସଂଖ୍ୟା ବହୁତ କମିଯାଇଛି । ଏମାନଙ୍କ ମଧ୍ୟରେ ସ୍କାଲି ବବଲର, ପିଡ୍ କାଉ, ମୂଷା ରଙ୍ଗର ସୂର୍ଯ୍ୟପକ୍ଷୀ, ବୁଣାକାର ପକ୍ଷୀ, ସାଧାରଣ ମହମବିଲ ଏବଂ ପାଣି ପକ୍ଷୀ ଅନ୍ତର୍ଭୁକ୍ତ ।
କେନିଆର ଜଣେ ପକ୍ଷୀ ବିଶେଷଜ୍ଞ କଲିନ୍ ଜ୍ୟାକସନ୍ କହନ୍ତି ଯେ, ଏହି ଭାରତୀୟ କାଉଙ୍କ ଯୋଗୁଁ କେନିଆର ସାମୁଦ୍ରିକ ଅଞ୍ଚଳରେ ଛୋଟ, ସ୍ଥାନୀୟ ପକ୍ଷୀଙ୍କ ସଂଖ୍ୟା ବହୁତ ହ୍ରାସ ପାଇଛି । ଏହି ଭାରତୀୟ କାଉମାନେ ଛୋଟ ଛୋଟ ପକ୍ଷୀଙ୍କ ଘର ନଷ୍ଟ କରିଦିଅନ୍ତି । ତା’ପରେ ସେମାନଙ୍କ ଅଣ୍ଡା ଓ ଛୁଆଙ୍କୁ ଖାଇ ଦିଅନ୍ତି ।
ପୋକ ଓ ଅନ୍ଯାନ୍ୟ କ୍ଷୁଦ୍ର ଜୀବ ଅତ୍ୟଧିକ ବୃଦ୍ଧି ପାଉଥିବାରୁ ଗୋଟିଏ ପରେ ଗୋଟିଏ ସମସ୍ୟା ସୃଷ୍ଟି ହେଉଛି । ଏହି କାଉ ମାନେ କେବଳ ପୋକଜୋକ ଖାଉଥିବା ପକ୍ଷୀଙ୍କୁ ପ୍ରଭାବିତ କରନ୍ତି ନାହିଁ, ବରଂ ସମଗ୍ର ପରିବେଶକୁ ମଧ୍ୟ କ୍ଷତି ପହଞ୍ଚାଇଥାନ୍ତି । ସେଥିପାଇଁ ୧୦ ଲକ୍ଷ କାଉଙ୍କୁ ହଟାଇବାକୁ କେଡବ୍ଲ୍ୟୁଏସ୍ ଘୋଷଣା କରିଛି ।
