ଉତ୍ତର କୋରିଆ ରାଷ୍ଟ୍ରପତି କିମ୍ ଜୋଙ୍ଗ୍ ଉନ୍ଙ୍କ ଅଦ୍ଭୁତ ଘୋଷଣା, ପ୍ରାକୃତିକ ବିପର୍ଯ୍ୟୟକୁ ରୋକି ପାରି ନଥିବା ଅଧିକାରୀଙ୍କୁ ମିଳିବ କଠୋର ଦଣ୍ଡ
ୟୋଙ୍ଗ୍ୟାଙ୍ଗ୍ : ନିଜର ଖିଆଲ୍ ମନୋଭାବ ପାଇଁ ବେଶ୍ ଜଣାଶୁଣା ଉତ୍ତର କୋରିଆର ରାଷ୍ଟ୍ରପତି କିମ୍ ଜୋଙ୍ଗ୍ ଉନ୍ । କଠୋର ଦଣ୍ଡ ପାଇଁ ସେ ସାରା ବିଶ୍ୱରେ ଚର୍ଚ୍ଚିତ । ଏଥର ତାଙ୍କର ଏକ ଅଦ୍ଭୁତ ନିଷ୍ପତ୍ତିକୁ ନେଇ ଦେଶରେ କୋକୁଆ ଭୟ ସୃଷ୍ଟି କରିଛନ୍ତି ସେ । ଉତ୍ତର କୋରିଆ ଟାଇଫୁନ୍ ମହାବାତ୍ୟା କାରଣରୁ ଧ୍ୱସ୍ତ ବିଧ୍ୱସ୍ତ ।
ଦେଶରେ ମହାବାତ୍ୟା କାରଣରୁ ବିପୁଳ ପରିମାଣ ଫସଲ ହାନୀ ହେବା ସହ ରାସ୍ତା ଘାଟ ଓ ବିଦ୍ୟୁତ୍ ସେବା ବାଧାପ୍ରାପ୍ତ । ମହାବାତ୍ୟା ଓ ପ୍ରବଳ ଜଳ କାରଣରୁ ଶହ ଶହ ଘର ଭାଙ୍ଗିବା ସହ ଶତାଧିକ ଲୋକ ବେଘର ହୋଇଛନ୍ତି । ଡଜନରୁ ଅଧିକ ଲୋକଙ୍କ ପ୍ରାଣହାନୀ ଘଟିଛି । ଏହିସବୁ କଥାକୁ ନେଇ ରାଗିଯାଇଛନ୍ତି ରାଷ୍ଟ୍ରପତି କିମ୍ ଜୋଙ୍ଗ୍ ଉନ୍ । ମହାବାତ୍ୟା ପୂର୍ବରୁ ଉଚିତ୍ ପଦକ୍ଷେପ ନେବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ କିମ୍ ଉନ୍ ।
ତେବେ ଏତେ ସତ୍ତ୍ୱେ ଦେଶରେ କ୍ଷୟକ୍ଷତିକୁ ରୋକାଯାଇ ପାରିନାହିଁ । ଉଚିତ୍ ସମୟ ପୂର୍ବରୁ ଲୋକଙ୍କୁ ଅନ୍ୟତ୍ର ସ୍ତାନାନ୍ତର କରାଯାଇ ପାରି ନଥିବାରୁ ନାହିଁ ନଥିବା କ୍ଷୟକ୍ଷତି ଘଟିଛି । ଏକ ପକ୍ଷରେ କରୋନା କାରଣରୁ ଉତ୍ତର କୋରିଆ ଆର୍ଥିକ ସ୍ଥିତିରେ ଅସୁବିଧା ଦେଖାଦେଇ ଥିବାବେଳେ ମହାବାତ୍ୟା ଦେଶର ଆର୍ଥିକ ମେରୁଦଣ୍ଡ ଦୋହଲାଇ ଦେଇଛି । ଏହାକୁ ନେଇ ରାଷ୍ଟ୍ରପତି କିମ୍ ଜୋଙ୍ଗ୍ ଅଦ୍ଭୁତ ଘୋଷଣା କରିଛନ୍ତି ।
ଯେଉଁ ବିଭାଗୀୟ ଅଧିକାରୀଙ୍କ ପାଇଁ ପ୍ରାକୃତିକ ବିପର୍ଯ୍ୟୟକୁ ରୋକାଯାଇ ପାରିନାହିଁ । ମାତ୍ରାଧିକ କ୍ଷୟକ୍ଷତି ପାଇଁ ଯେଉଁ ଅଧିକାରୀ ଦାୟୀ ହେବେ ସେମାନଙ୍କୁ କଠୋର ଦଣ୍ଡ ଦିଆଯିବ ବୋଲି କିମ୍ ଜୋଙ୍ଗ୍ ଉନ୍ ଘୋଷଣା କରିଛନ୍ତି । ଏହାକୁ ନେଇ ଦେଶର ଅଧିକାରୀଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି । କାରଣ ସେମାନେ ଜାଣିଛନ୍ତି ଯେ କିମ୍ ଉନ୍ଙ୍କ ଦଣ୍ଡରୁ ମୁକୁଳିବା ସମ୍ଭବ ନୁହେଁ ।
ଅତୀତରେ ଏପରି ବହୁ ଉଦାହରଣ ଦେଖିବାକୁ ମିଳିଛି । ଦେଶର ଆର୍ଥିକ ଅବସ୍ଥାକୁ ନେଇ ଦ୍ୱନ୍ଦ୍ୱରେ ଥିବା କିମ୍ ଉନ୍ କିଛି ବି କରିପାରନ୍ତି ବୋଲି ଅଧିକାରୀମାନେ ଭୟଭୀତ ରହିଛନ୍ତି ।