ଅଯୋଧ୍ୟାରେ ରାମଲାଲାଙ୍କ ପ୍ରାଣପ୍ରତିଷ୍ଠା ପାଇଁ ମାତ୍ର ୮୪ ସେକେଣ୍ଡ ଶୁଭ ମୁହୂର୍ତ୍ତ, କାଶୀ ପଣ୍ଡିତ ଚୟନ କଲେ ସମୟ

ଆସନ୍ତା ଜାନୁଆରୀ ୨୨ରେ ଅଯୋଧ୍ୟା ରାମମନ୍ଦିରରେ ରାମଲାଲାଙ୍କ ପ୍ରାଣପ୍ରତିଷ୍ଠା ହେବ । ପ୍ରଧାନମନ୍ତ୍ରୀ ମୋଦି ଏହାର ଉଦ୍‌ଘାଟନ କରିବେ । ଆଉ ପ୍ରାଣ ପ୍ରତିଷ୍ଠା ପାଇଁ ୮୪ ସେକେଣ୍ଡ ବେଶ ଶୁଭ ମୁହୂର୍ତ୍ତ । ରାମ ମନ୍ଦିର ତୀର୍ଥ କ୍ଷେତ୍ର ଟ୍ରଷ୍ଟ ରାମଲାଲାଙ୍କ ପ୍ରାଣ ପ୍ରତିଷ୍ଠା ପାଇଁ ସମଗ୍ର ଦେଶର ବିଦ୍ୱାନ ଏବଂ ଜ୍ୟୋତିଷାଚାର୍ଯ୍ୟଙ୍କ ସହିତ ପ୍ରାଣ ପ୍ରତିଷ୍ଠା ସମୟ ନିର୍ଦ୍ଧାରିତ କରିବା ପାଇଁ କହିଥିଲେ ।

ତେବେ କାଶୀର ଜ୍ୟୋତିଷାଚାର୍ଯ୍ୟ ପଣ୍ଡିତ ଗଣେଶ୍ୱର ଶାସ୍ତ୍ରୀ ଦ୍ରାବିଡ ଯେଉଁ ମୁହୂର୍ତ୍ତ ଚୟନ କରିଛନ୍ତି, ତାହାକୁ ସଠିକ୍‌ ମାନି ରାମଲାଲାଙ୍କ ପ୍ରାଣପ୍ରତିଷ୍ଠା କରାଯିବ । ଏହି ଶୁଭ ମୁହୂର୍ତ୍ତ ଜାନୁଆରୀ ୨୨ ତାରିଖ ଦିନ ୧୨ଟା ୨୯ ମିନିଟ ୮ ସେକେଣ୍ଡରୁ ୧୨ଟା ୩୦ ମିନିଟ ୩୨ ସେକେଣ୍ଡ ପର୍ଯ୍ୟନ୍ତ ରହିଛି ।

ପୂର୍ବରୁ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ରାମଲାଲାଙ୍କ ସ୍ଥାପନା ପାଇଁ ଅନେକ ତାରିଖ ବିକଳ୍ପ ଭାବେ ଧାର୍ଯ୍ୟ କରିଥିଲା । ଏଥିରେ ୧୭ ଜାନୁଆ, ୨୫ ଜାନୁଆରୀ ସହିତ ଅନ୍ୟ ୫ଟି ତାରିଖ ଥିଲା । କିନ୍ତୁ ୨୨ ଜାନୁଆରୀକୁ ଶୁଭ ମୁହୂର୍ତ୍ତ ବୋଲି ଧରାଯାଇଛି । ଏହି ତାରିଖରେ ଶୁଭ ମୁହୂର୍ତ୍ତ ଅନେକ ବାଣ ଦୋଷରୁ ମୁକ୍ତ । ଯେପରିକି ଅଗ୍ନିବାଣ, ମୃତ୍ୟୁବାଣ, ଚୋରବାଣ, ନୃପବାଣ ଏବଂ ରୋଗବାଣ ।

ରାମ ମନ୍ଦିର ପ୍ରାଣ ପ୍ରତିଷ୍ଠା ପାଇଁ ସମାରୋହ ୧୬ ଜାନୁଆରୀରୁ ଆରମ୍ଭ ହେବ । ଏହାକୁ ପ୍ରଧାନମନ୍ତ୍ରୀ ମୋଦି ଉଦ୍‌ଘାଟନ କରିବେ । ଏହି ଅବସରରେ ବିଶ୍ୱର ୮୦ଟି ରାଷ୍ଟ୍ରର ମୁଖ୍ୟଙ୍କୁ ନିମନ୍ତ୍ରଣ ପତ୍ର ପଠାଯିବ । ମନ୍ଦିର ଟ୍ରଷ୍ଟ ପକ୍ଷରୁ ଏନେଇ ଏକ ଲିଷ୍ଟ ପ୍ରସ୍ତୁତ କରାଯାଇଛି ।